Tarix yazan lider və milli birliyin təntənəsi

Bakı:

22 °C

64 %

4 m/s

Əlaqə

AZ RU EN

Ana səhifə / YAP xəbərləri / Tarix yazan lider və milli birliyin təntənəsi

Tarix yazan lider və milli birliyin təntənəsi

08.05.2026 [16:01]

Azərbaycan xalqının taleyində elə şəxsiyyətlər var ki, onların adı təkcə bir dövrü deyil, bütöv bir xalqın xilası və yüksəlişini ifadə edir. Heydər Əliyev məhz belə nadir liderlərdən idi. O, xalqın ən ağır, ən çətin günlərində öz siyasi uzaqgörənliyi, qətiyyəti və misilsiz dövlətçilik təcrübəsi ilə Azərbaycanın müstəqilliyini qoruyub saxlayan, onu parçalanmaq təhlükəsindən xilas edən böyük xilaskar kimi tarixə adını həkk etdi.

Heydər Əliyevin həyat yolu yalnız siyasi fəaliyyət deyil, həm də xalqa sonsuz sədaqət nümunəsidir. O, Azərbaycanın gələcəyini düşünərək hər zaman milli maraqları üstün tutdu. Ölkənin taleyüklü məqamlarında xalqın səsinə çevrilən bu böyük lider bir daha sübut etdi ki, əsl dövlət adamı zamanın fövqündə dayanmağı bacarmalıdır. Azərbaycan xalqı məhz buna görə Heydər Əliyevi yalnız lider kimi deyil, həm də milli yaddaşın, milli qürurun simvolu kimi qəbul edir.

1990-cı illərin əvvəllərində Azərbaycan xaos, anarxiya və siyasi qarşıdurmalar girdabında boğulurdu. Dövlətçiliyin sütunları sarsılmış, xalq ümidsizlik içində gələcəyə baxırdı. Belə bir ağır zamanda xalq öz xilaskarını çağırdı. Heydər Əliyevin hakimiyyətə qayıdışı Azərbaycanın yenidən doğuluşu oldu. Onun qətiyyətli addımları nəticəsində ölkədə sabitlik təmin edildi, dövlət institutları möhkəmləndirildi, xalqın gələcəyə inamı bərpa olundu.

Məhz bu mürəkkəb və taleyüklü dövrdə Azərbaycanın siyasi həyatında yeni bir mərhələ başlandı – Yeni Azərbaycan Partiyası yaradıldı. 1992-ci ilin noyabrında Naxçıvanda təsis edilən Yeni Azərbaycan Partiyası sadəcə siyasi təşkilat deyildi. Bu partiya xalqın ümidi, dövlətçiliyin dayağı və milli birliyin rəmzi kimi meydana çıxdı. Yeni Azərbaycan Partiyasının yaranması əslində milli həmrəyliyin təntənəsi idi. Heydər Əliyev bu partiyanı şəxsi siyasi ambisiyalar üçün deyil, Azərbaycan dövlətinin gələcəyini qorumaq üçün yaratdı. O, yaxşı bilirdi ki, güclü dövlətin təməlində xalqın birliyi dayanır. Elə buna görə də YAP qısa müddətdə ümumxalq partiyasına çevrildi və milyonlarla insanın etimadını qazandı.

Bu gün Yeni Azərbaycan Partiyası Heydər Əliyev ideyalarının daşıyıcısı kimi ölkənin ictimai-siyasi həyatında mühüm rol oynayır. Partiyanın fəaliyyəti Azərbaycanın inkişafı, sabitliyi və milli maraqlarının qorunması istiqamətində mühüm töhfələr verir. Ulu Öndərin siyasi kursu isə bu gün İlham Əliyev tərəfindən uğurla davam etdirilir. Prezident İlham Əliyevin rəhbərliyi ilə Azərbaycan regionun ən güclü dövlətlərindən birinə çevrilib, ölkəmiz beynəlxalq arenada böyük nüfuz qazanıb, tarixi Zəfərə imza atılıb.

Heydər Əliyevin adı Azərbaycan xalqının yaddaşında daim yaşayacaq. Çünki o, yalnız bir dövlət rəhbəri deyil, milli iradənin, vətən sevgisinin və xalqına bağlılığın canlı simvolu idi. Onun yaratdığı siyasi məktəb bu gün də Azərbaycanı inamla gələcəyə aparır. Hər bir azərbaycanlı yaxşı anlayır ki, müstəqil Azərbaycanın bugünkü uğurlarının təməlində məhz Heydər Əliyevin zəngin irsi və uzaqgörən siyasəti dayanır.

Bu böyük şəxsiyyətin əziz xatirəsi xalqımızın qəlbində daim yaşayacaq, onun ideyaları isə gələcək nəsillərə yol göstərəcək. Azərbaycanın hər uğurunda, hər qələbəsində Heydər Əliyev irsinin işığı görünür. Bu işıq isə xalqımızın yolunu daim aydınlatmağa davam edəcək.

Sevinc Xəlilova

YAP Samux rayon təşkilatının sədr müavini

Paylaş:

Baxılıb: 308 dəfə