28 May – Müstəqillik Gününün Tarixi Əhəmiyyəti və Milli Qürur Mənbəyi

Bakı:

22 °C

51 %

1 m/s

Əlaqə

AZ RU EN

Ana səhifə / YAP xəbərləri / 28 May – Müstəqillik Gününün Tarixi Əhəmiyyəti və Milli Qürur Mənbəyi

28 May – Müstəqillik Gününün Tarixi Əhəmiyyəti və Milli Qürur Mənbəyi

29.05.2026 [15:08]

Nərminə Qədirova

YAP Nərimanov rayon təşkilatının məsləhətçisi

28 May Azərbaycan xalqının tarixində ən şərəfli və qürurverici günlərdən biridir. Bu tarix xalqımızın azadlıq iradəsinin, milli dövlətçilik ənənələrinin və müstəqillik arzularının gerçəkləşdiyi gündür. 1918-ci il mayın 28-də Azərbaycan Xalq Cümhuriyyətinin elan olunması ilə müsəlman Şərqində ilk parlamentli demokratik respublika yaradıldı və xalqımız öz taleyinin sahibi olduğunu bütün dünyaya nümayiş etdirdi.

Azərbaycan Xalq Cümhuriyyəti qısa müddət fəaliyyət göstərsə də, onun həyata keçirdiyi mühüm islahatlar milli dövlətçilik tariximizin əsasını təşkil etdi. Demokratik idarəetmə prinsiplərinin tətbiqi, parlamentin yaradılması, qadınlara seçki hüququnun verilməsi, milli ordunun formalaşdırılması və üçrəngli bayrağımızın qəbul olunması həmin dövrün böyük nailiyyətləri idi. Bu addımlar Azərbaycan xalqının müasir, azad və demokratik dövlət qurmaq əzmini göstərirdi.

Lakin tariximizin sonrakı mərhələlərində xalqımız müstəqilliyini itirmək və müxtəlif siyasi təzyiqlərlə üzləşmək məcburiyyətində qaldı. Buna baxmayaraq, azadlıq arzusu heç zaman xalqımızın qəlbindən silinmədi. 1991-ci ildə dövlət müstəqilliyimizin yenidən bərpası Azərbaycanın yeni inkişaf mərhələsinin başlanğıcı oldu. Ancaq həmin illərdə ölkədə hökm sürən siyasi böhran, xaos və parçalanma təhlükəsi dövlətçiliyimizi ciddi sınaq qarşısında qoymuşdu.

Məhz belə çətin və taleyüklü bir dövrdə xalqın təkidli tələbi ilə hakimiyyətə qayıdan Ulu Öndər Heydər Əliyev öz böyük siyasi iradəsi, uzaqgörənliyi və fədakarlığı sayəsində Azərbaycan dövlətçiliyini qoruyub saxladı. Onun rəhbərliyi ilə ölkədə sabitlik bərpa edildi, qanunsuz silahlı qarşıdurmalara son qoyuldu, dövlət institutları möhkəmləndirildi və Azərbaycanın gələcək inkişaf strategiyası müəyyənləşdirildi. Ulu Öndərin həyata keçirdiyi uğurlu siyasət nəticəsində Azərbaycan beynəlxalq aləmdə etibarlı tərəfdaş kimi tanındı, iqtisadi inkişafın və milli birliyin əsası qoyuldu.

Bu siyasi kurs bu gün də uğurla davam etdirilir. Ulu Öndərin layiqli davamçısı, Azərbaycan Respublikasının Prezidenti cənab İlham Əliyevin qətiyyətli və uzaqgörən siyasəti nəticəsində ölkəmiz daha da gücləndi, regionun aparıcı dövlətinə çevrildi. Xüsusilə 2020-ci ildə əldə olunan tarixi Zəfər Azərbaycanın müstəqillik tarixinin ən parlaq səhifələrindən biri oldu. Ali Baş Komandan İlham Əliyevin rəhbərliyi altında rəşadətli Azərbaycan Ordusu torpaqlarımızı işğaldan azad etdi və xalqımızın illərlə yaşadığı ədalət arzusu reallığa çevrildi. Bu böyük Qələbə Azərbaycanın müstəqilliyini daha da möhkəmləndirdi və xalqımızın milli qürurunu dünyaya nümayiş etdirdi.

Bu gün üçrəngli bayrağımızın Qarabağda və Şərqi Zəngəzurda dalğalanması hər bir azərbaycanlının qəlbini sevinc və qürur hissi ilə doldurur. Şəhidlərimizin qəhrəmanlığı, qazilərimizin şücaəti və xalqımızın birliyi sayəsində Azərbaycan öz ərazi bütövlüyünü və suverenliyini tam təmin etdi.

28 May – Müstəqillik Günü bizə keçmişimizi xatırlatmaqla yanaşı, gələcək qarşısında məsuliyyətimizi də xatırladır. Müstəqilliyi qorumaq və onu daha da möhkəmləndirmək hər bir vətəndaşın müqəddəs borcudur. Gənc nəsil tarixini dərindən öyrənməli, dövlətinə və milli dəyərlərinə sahib çıxmalıdır.

Bu əlamətdar gün münasibətilə bütün Azərbaycan xalqını ürəkdən təbrik edir, ölkəmizə əbədi müstəqillik, davamlı inkişaf və daim yüksələn Zəfərlər arzulayıram. Yaşasın müstəqil və qüdrətli Azərbaycan!

Paylaş:

Baxılıb: 24 dəfə