Tərtərdə Yeni Azərbaycan Partiyasının yaranmasının 24-cü ildönümü ilə əlaqədar tədbir keçirilib

Bakı:

30 °C

51 %

3 m/s

AZ RU EN

Ana səhifə / YAP xəbərləri / Tərtərdə Yeni Azərbaycan Partiyasının yaranmasının 24-cü ildönümü ilə əlaqədar tədbir keçirilib

Tərtərdə Yeni Azərbaycan Partiyasının yaranmasının 24-cü ildönümü ilə əlaqədar tədbir keçirilib

19.11.2016 [10:03]

Dünən Tərtərdə Yeni Azərbaycan Partiyasının (YAP) yaranmasının 24-cü ildönümü ilə əlaqədar tədbir keçirilib. Tədbir iştirakçıları əvvəlcə Ulu öndər Heydər Əliyevin rayonun mərkəzi meydanında ucaldılmış abidəsi önünə gül-çiçək dəstəsi qoyaraq, xatirəsini ehtiramla yad ediblər. Sonra rayon təşkilatının qərargahında öz işini davam etdirən tədbiri giriş sözü ilə YAP Tərtər rayon təşkilatının sədri Ramiz Şabanov açaraq geniş məruzə ilə çıxış edib. Məruzəsində partiyanın yaranma tarixindən söhbət açan natiq həmin illərin xalqımızın yaddaşında dərin izlər buraxdığını bildirib.
Tədbirdə çıxış edən Tərtər rayon İcra Hakimiyyətinin başçısı Müstəqim Məmmədov Yeni Azərbaycan Partiyasının ölkəmiz üçün olduqca mürəkkəb bir vaxtda yarandığını deyib. Natiq bildirib ki, 1993-cü ildə xalqın təkidli tələbi ilə yenidən siyasi hakimiyyətə qayıdan Ulu öndər Heydər Əliyev dərin düşünülmüş siyasəti, qətiyyəti və müdrik qərarları sayəsində Azərbaycanı düşdüyü böhranlı vəziyyətdən çıxara bilib, qısa müddətdə böyük uğurların qazanılmasında müstəsna xidmətlər göstərib, xalqın etimadını layiqincə doğruldub. Məhz bütün bunların nəticəsidir ki, Ulu öndərin yaratdığı və hazırda Prezident İlham Əliyevin Sədri olduğu YAP ümumxalq partiyası kimi Azərbaycan tarixinə düşüb.
Çıxışında Ümummilli lider Heydər Əliyevin bilavasitə rəhbərliyi altında təşəkkül tapmış partiyanın bu gün möhtərəm Prezidentimiz, YAP-ın Sədri cənab İlham Əliyevin rəhbərliyi ilə ölkəmizin surətli sosial-iqtisadi inkişafında oynadığı roldan da danışan Müstəqim Məmmədov Yeni Azərbaycan Partiyasının, Ulu öndərin qeyd etdiyi kimi, dünənin, bu günün və gələcəyin partiyası statusunu şərəflə qoruyaraq daşıdığını qeyd edib.
Sonra YAP Tərtər rayon təşkilatı Qadınlar Şurasının sədri Xatirə Məmmədova, Qapanlı kənd tam orta məktəbinin direktoru Fitat Əliyeva, YAP Tərtər rayon təşkilatının Gənclər Birliyinin sədri Emin Pənahov və başqaları məruzə ətrafında çıxış ediblər. Natiqlər ölkəmizdə həyatın bütün sahələrində qazanılmış uğurlarda Yeni Azərbaycan Partiyasının rolunu yüksək qiymətləndirib, YAP-ın Sədri, Prezident İlham Əliyevin həyata keçirdiyi düzgün, məqsədyönlü siyasət nəticəsində Azərbaycanın Cənubi Qafqazda lider dövlətə çevrildiyini diqqətə çatdırıblar.
Tədbirin sonunda Yeni Azərbaycan Partiyasının yaranmasının 24-cü ildönümü münasibəti ilə bir qrup partiya fəalına Fəxri fərmanlar, həmçinin YAP sıralarına yeni qoşulmuş şəxslərə üzvlük vəsiqələri verilib.
NADİR

Paylaş:

Baxılıb: 846 dəfə