Sabirabadlılar xalqımızın alternativsiz lideri cənab İlham Əliyevə səs verəcəklər

Bakı:

26 °C

38 %

6 m/s

Əlaqə

AZ RU EN

Ana səhifə / YAP xəbərləri / Sabirabadlılar xalqımızın alternativsiz lideri cənab İlham Əliyevə səs verəcəklər

Sabirabadlılar xalqımızın alternativsiz lideri cənab İlham Əliyevə səs verəcəklər

31.03.2018 [09:35]

Yeni Azərbaycan Partiyasının (YAP) Mərkəzi Seçki Qərargahının Sabirabad rayon şöbəsi təbliğat-təşviqat kampaniyası çərçivəsində rayonun mərkəzində seçicilərlə görüş keçirib. Möhtəşəm görüşdə minlərlə seçici iştirak edib.
Görüşü giriş sözü ilə açan YAP Sabirabad rayon təşkilatının sədri Məleykə Ağayeva bildirib ki, görüşə belə çoxlu sayda insanların qatılması sabirabadlıların cənab İlham Əliyevə olan hörmət və etimadının əyani göstəricisidir.
Çıxış edən Milli Məclisin Səhiyyə komitəsinin sədri, akademik Əhliman Əmiraslanov bildirib ki, Azərbaycanın bugünkü uğurları Heydər Əliyev siyasəti ilə bağlıdır. Akademik vurğulayıb ki, səhiyyə, təhsil sahələrində də böyük uğurlarımız vardır. Yaxın keçmişə nəzər salsaq, düşünməzdik ki, bu qədər xəstəxanalar, diaqnostika mərkəzləri tikilib istifadəyə veriləcək, ən əsası, dünya standartlarına cavab verən avadanlıqlarla təchiz ediləcək. Son 15 ildə 642 tibb müəssisəsi istifadəyə verilib. Bu gün elə bir əməliyyat, müalicə üsulu yoxdur ki, onu ölkəmizdə həyata keçirmək mümkünsüz olsun. Xarici ölkələrdən gələn mütəxəssislər bizdə yaradılan şəraiti görəndə heyrətlənirlər: "Ona görə də biz sabirabadlıların 11 apreldə yenidən müdrik qərar verərək cənab İlham Əliyevə etimad göstərəcəklərinə əminik".
YAP İdarə Heyətinin üzvü Yusif Hümbətov görüşdə çıxış edərək bildirib ki, son 15 ildə Heydər Əliyev siyasətinin cənab İlham Əliyev tərəfindən uğurla davam etdirilməsi ölkəmizin hərtərəfli inkişafını daha da sürətləndirib. "Xüsusilə dövlətimizin siyasətində əhalinin sosial müdafiəsinin gücləndirilməsi xüsusi yer tutur. Cənab İlham Əliyev iqtisadi tərəqqiyə uyğun olaraq əməkhaqlarının, pensiyaların artırılmasını qarşıya mühüm vəzifə kimi qoyur. Təkcə son aylarda imzalanan Fərman və sərəncamlara diqqət yetirsək, "güclü dövlət, yüksək rifah" prinsipinin dövlət siyasətinin əsasında dayandığını aydın görərik. Yəni dövlətimizin siyasəti sosialyönümlü, Azərbaycanın inkişafına yönələn siyasətdir ki, bu da öz bəhrəsini verir", - deyə Y.Hümbətov qeyd edib.
Milli Məclisin deputatları Elçin Quliyev, Mirzəcan Xəlilov və Rüstəm Xəlilov, Metrologiya İnstitutunun direktoru Saleh Səmədov və digərləri də çıxış edərək Azərbaycanın cənab İlham Əliyevin rəhbərliyi ilə qazandığı əzəmətli uğurlar haqqında məlumat verərək əmin olduqlarını bildiriblər ki, ölkə vətəndaşları, o cümlədən sabirabadlılar da bu uğurların davamı üçün məhz YAP-ın namizədinə səs verəcəklər.
Görüşündə çıxış edən onlarla sabirabadlı seçici birmənalı şəkildə bildirib ki, onlar yenidən cənab İlham Əliyevə səs verəcəklər.

Paylaş:

Baxılıb: 848 dəfə