Cəlilabad seçiciləri bələdiyyə seçkilərində YAP-ın namizədlərinə səs verəcəklər

Bakı:

25 °C

65 %

1 m/s

Əlaqə

AZ RU EN

Ana səhifə / YAP xəbərləri / Cəlilabad seçiciləri bələdiyyə seçkilərində YAP-ın namizədlərinə səs verəcəklər

Cəlilabad seçiciləri bələdiyyə seçkilərində YAP-ın namizədlərinə səs verəcəklər

04.12.2009 [09:32]

Yeni Azərbaycan Partiyası Cəlilabad rayon təşkilatının təbliğat-təşviqat qrupu Qaracəncir, Alar və Günəşli kəndlərinin seçiciləri ilə görüş keçirib
Dünən Yeni Azərbaycan Partiyası (YAP) Cəlilabad rayon təşkilatının təbliğat-təşviqat qrupunun üzvləri bələdiyyə seçkiləri ilə bağlı rayonun Qaracəncir, Alar və Günəşli kəndlərində seçicilərlə görüşüb. YAP Cəlilabad rayon təşkilatının sədr müavini Hafiz Cavadov bildirib ki, rayon üzrə 35 bələdiyyəyə 343 nəfərin namizədliyi irəli sürülüb. Builki seçkilərdə əvvəlki bələdiyyə seçkiləri ilə müqayisədə qadınların, gənclərin və ali təhsilli şəxslərin sayı 2 dəfədən çox artıb. Belə ki, 343 namizədin 164 nəfərini gənclər təşkil edir.
YAP Cəlilabad rayon təşkilatının sədr müavini qeyd edib ki, yerli özünüidaretmə orqanları olan bələdiyyələr ölkəmizin ictimai-siyasi, sosial-iqtisadi həyatında mühüm rol oynayan strukturdur və bu quruma keçirilən seçkilərə hazırlıq partiya üzvləri qarşısında ciddi vəzifələr qoyur: “özünüidarəetmə orqanları bir struktur kimi Azərbaycanda 1999-cu ildə yaradılıb və tarix baxımından bu qurumları gənc də hesab etmək olar. Ona görə də, bəzi hallarda təcrübəsizlik öz sözünü deyib və müxtəlif qüsurlar ortaya çıxıb. Amma son illər ərzində qanunvericilikdə edilən dəyişikliklər və əldə olunmuş təcrübə onu deməyə əsas verir ki, artıq növbəti illərdə bələdiyyələrin daha effektiv fəaliyyətinin şahidi olacağıq”.
Hafiz Cavadov onu da bildirib ki, bələdiyyələr ölkəmizdə həyata keçirilən sosial, iqtisadi, mədəni, humanitar tədbirlərdə fəal iştirak etmək və vətəndaşların sosial məişət qayğılarının həllində aktivlik nümayiş etdirmək üçün səylərini gücləndirməlidir. Onun fikrincə, bələdiyyələrin fəaliyyətinin təkmilləşdirilməsi onların qarşıdakı illərdə ölkə həyatının müxtəlif sahələrində aktiv iştirak etməsinə səbəb olacaq. H.Cavadov Cəlilabad seçicilərinin dekabrın 23-də yerli özünüidareətmə orqanlarına keçiriləcək seçkilərdə layiqli namizədlərə səs verəcəklərinə əmin olduğunu qeyd edib.
Yeni Azərbaycan Partiyasının səlahiyyətli nümayəndəsi, YAP Siyasi Şurasının üzvü, millət vəkili Mirkazım Kazımov bələdiyyə seçkiləri ilə bağlı partiyanın seçki proqramı haqqında ətraflı məlumat verib. YAP-ın ümumxalq partiyası olduğunu deyən səlahiyyətli nümayəndə dekabrın 23-də xalqın gücü ilə partiyanın namizədlərinin qələbəni təmin edə biləcəklərinə əmin olduğunu söyləyib: “Hər zaman xalqın dəstəyinə güvənən partiyamız dekabrın 23-də növbəti dəfə bu inamı təsdiq edəcək. Prezident İlham Əliyevin həyata keçirdiyi sosial-iqtisadi siyasət ölkəmizin inkişafını sürətləndirib və hər bir vətəndaş bunu öz sosial həyatında hiss edir. Azərbaycanın ümumi inkişafına öz töhfəsini verən YAP-ın resurslarının güclənməsi də məhz keçirilən seçkilərdə öz təsdiqini tapır”.
Mirkazım Kazımov qeyd edib ki, YAP Azərbaycanın və regionun ən mütəşəkkil güclü siyasi təşkilatı kimi qarşısına qoyduğu bütün hədəflərə asanlıqla nail olmağa qadirdir: “Bu gün əhalinin sosial məsələlərinin həll edilməsi, onların ən yüksək infrastruktur xidmətləri ilə əhatə olunması partiyaya olan rəğbəti və inamı daha da artırmış olur”.
Builki seçkilərdə qadınların və gənclərin aktivliyinə toxunan M.Kazımov yerli özünüidarəetmə orqanlarında onların təmsilçiliyinin artmasının, ümumilikdə, cəmiyyətin tərəqqisinə, bölgələrdə mühüm sosial-humanitar məsələlərin həllinə köməklik göstərəcəyinə ümidvar olduğunu diqqətə çatdırıb. Cəlilabad sakinlərinin dövlətə və dövlətçiliyimizə daim sədaqət nümayiş etdirdiyini qeyd edən M.Kazımov bələdiyyə seçkilərində də bunun bir daha təsdiqlənəcəyini söyləyib.
Tədbirdə çıxış edən seçicilər əvvəlki seçkilərdə olduğu kimi, Yeni Azərbaycan Partiyasının qələbəsinə əmin olduqlarını vurğulayıblar. Onlar bildiriblər ki, Cəlilabad sakinləri Azərbaycanın inkişafı, dövlətçiliyimizin möhkəmlənməsi yolunda həyata keçirilən davamlı islahatları həmişə dəstəkləyərək, bu proseslərdə fəal iştirak ediblər. İctimai-siyasi proseslərdə aktivlik nümayiş etdirən cəlilabadlılar dekabrın 23-də bu fəallığı göstərməklə YAP-a olan rəğbətlərini təsdiqləmiş olacaqlar.
ELBRUS CƏFƏRLİ

Paylaş:

Baxılıb: 1472 dəfə