YAP nəinki regionda, dünyada nüfuzlu bir siyasi təşkilat kimi tanınır

Bakı:

29 °C

39 %

7 m/s

Əlaqə

AZ RU EN

Ana səhifə / YAP xəbərləri / YAP nəinki regionda, dünyada nüfuzlu bir siyasi təşkilat kimi tanınır

YAP nəinki regionda, dünyada nüfuzlu bir siyasi təşkilat kimi tanınır

21.11.2019 [09:56]

YAP-ın yaranmasının 27-ci ildönümü münasibətilə Qaradağ rayonunda tədbir keçirilib
Yeni Azərbaycan Partiyasının (YAP) yaranmasının 27-ci ildönümü münasibəti ilə YAP Qaradağ rayon təşkilatı tərəfindən tədbir keçirilib. Tədbir iştirakçıları əvvəlcə Ulu Öndər Heydər Əliyevin Lökbatan qəsəbəsində ucaldılan abidəsini ziyarət edərək önünə gül dəstələri düzüb, Ümummilli Liderin xatirəsini ehtiramla yad ediblər. Qaradağ rayonu Heydər Əliyev Mərkəzində keçirilən tədbirdə əvvəlcə Yeni Azərbaycan Partiyasının fəaliyyətinə həsr olunmuş videoçarx nümayiş etdirilib.
Sonra çıxış edən YAP Qaradağ rayon təşkilatının sədri, Milli Məclisin deputatı Aydın Hüseynov partiyanın keçdiyi şərəfli yoldan danışıb. Bildirilib ki, Ulu Öndər Heydər Əliyevin yaratdığı YAP siyasi mübarizələrlə dolu şərəfli bir yol keçib. “Yeni Azərbaycan Partiyası Ulu Öndər Heydər Əliyevin həyata keçirdiyi siyasətin avanqard qüvvəsi kimi xalqımızın həyatında mühüm rol oynayır”, - deyə millət vəkili qeyd edib.
YAP Siyasi Şurasının üzvü Munis Bayramov Ümummilli Liderin əsasını qoyduğu siyasi kursun Prezident İlham Əliyev tərəfindən uğurla davam etdirildiyini, bu siyasətin nəticəsində hazırda ölkəmizin güclü dövlətə çevrildiyini bildirib.
YAP İcra Katibliyinin şöbə müdiri, Milli Məclisin deputatı Sevinc Fətəliyeva isə çıxışında bildirib ki, YAP nəinki regionda, dünyada nüfuzlu bir siyasi təşkilat kimi tanınır. YAP-ın geniş beynəlxalq əlaqələrə malik olduğunu bildirən S.Fətəliyevanın sözlərinə görə, bu əlaqələr daim genişlənməkdədir: “Həm Avropa, həm də Asiya ölkələrində fəaliyət göstərən siyasi partiyalarla, eləcə də siyasi partiyaların birləşdiyi nüfuzlu beynəlxalq təşkilatlarla sıx əməkdaşlıq edirik”.
Qaradağ Rayon İcra Hakimiyyəti başçısının birinci müavini Emil Abbasov partiyanın cəmiyyətimizdə, müstəqil respublikamızın inkişafında və iqtisadi qüdrətinin durmadan artırılmasında rolunu yüksək dəyərləndirərək yeni-yeni uğurlar arzulayıb.
Tədbirdə həmçinin YAP Qaradağ rayon təşkilatı Gənclər Birliyinin sədri Seyidməmməd Məmmədzadə və gənc fəal Röya Rzayeva çıxış edərək dövlət müstəqilliyimizin qorunmasında və inkişaf etdirilməsində gənclərin qarşısında duran mühüm vəzifələrdən danışıb.
Daha sonra partiya sıralarına yeni qəbul edilmiş üzvlərə vəsiqələr təqdim olunub, bir qrup partiya fəalı isə rayon təşkilatının həyatında iştirakına görə fəxri fərmanla və mükafatlarla təltif edilib. Həmçinin partiyanın 1992-ci ildən üzvü olan və YAP Qaradağ rayon təşkilatının inkişafında xüsusi xidmətləri ilə seçilən təhsil işçisi Hicrət Qaradağlı 70 illiyi manasibətilə İcra Katibliyinin Fəxri Fərmanı ilə təltif olunub.

Paylaş:

Baxılıb: 835 dəfə