Qəbul imtahanlarında 600 baldan yüksək nəticə göstərən yevlaxlı məzunlarla onlayn formatda görüş keçirilib

Bakı:

22 °C

83 %

0 m/s

AZ RU EN

Ana səhifə / YAP xəbərləri / Qəbul imtahanlarında 600 baldan yüksək nəticə göstərən yevlaxlı məzunlarla onlayn formatda görüş keçirilib

Qəbul imtahanlarında 600 baldan yüksək nəticə göstərən yevlaxlı məzunlarla onlayn formatda görüş keçirilib

14.09.2020 [10:26]

Bu il ali məktəblərə keçirilən qəbul imtahanlarında 600 baldan yüksək nəticə göstərən bir qrup yevlaxlı məzunla onlayn formatda görüş keçirilib.

Yeni Azərbaycan Partiyası (YAP)Yevlax rayon təşkilatının təşkilatçılığı ilə keçirilən tədbiri giriş sözü ilə açan rayon təşkilatının Aparat rəhbəri Rafiq Əliyev öncə bütün məzunları rayon təşkilatı adından təbrik edib. Rafiq Əliyev ölkəmizdə hər zaman bilikli və bacarıqlı gənclərə böyük önəm verildiyini bildirərək, bu gün yüksək nəticələr əldə etmiş məzunların da gələcəkdə dövlətimiz üçün savadlı mütəxəssis kimi formalaşacağını deyib.

Çıxış edən YAP Yevlax rayon təşkilatının sədri, Milli Məclisin deputatı İlham Məmmədov Ümummilli Liderimiz Heydər Əliyevin "Təhsil millətin gələcəyidir" sözlərini xatırladaraq bildirib ki, bu gün dövlətimiz tərəfindən təhsilin inkişafına böyük önəm verilir. Cənab Prezident İlham Əliyevin, Birinci vitse-prezident Mehriban xanım Əliyevanın rəhbərliyi ilə son illərdə təhsilimizin yüksələn xətlə inkişafından danışan millət vəkili, ölkəmizin hər bir bölgəsində, hətta ucqar dağ kəndlərində belə müasir tələblərə cavab verən yeni məktəb binalarının tikilərək istifadəyə verildiyini diqqətə çatdırıb. İlham Məmmədov yüksək bal toplayaraq universitetlərə qəbul olan tələbələrin hər birini təbrik edərək əmin olduğunu bildirib ki, onlar müstəqil Azərbaycanın, o cümlədən Yevlağın gələcək həyatında yaxından iştirak edəcək və öz bilik-bacarıqları ilə dövlətimizin gələcək inkişafı naminə səylə çalışacaqlar. Yevlax Şəhər İcra Hakimiyyəti başçısının müavini, YAP Yevlax rayon təşkilatının sədr müavini Elnarə Əzizova isə yüksək nəticə göstərən məzunları Yevlax şəhər İcra Hakimiyyətinin rəhbərliyi adından təbrik edib.

YAP Yevlax rayon təşkilatı Qadınlar Şurasının sədri,"Kür" qəzetinin baş redaktoru Əminə Əhmədova isə bu gənclərin gələcəkdə harda olmalarından asılı olmayaraq Yevlağın hər zaman onların uğurları ilə fəxr edəcəyini bildirib.

Çıxış edən Yevlax şəhər Təhsil şöbəsinin müdiri Namidə Abbasova ötən illərə nisbətən bu il ali məktəblərə qəbul imtahanlarında Yevlax məktəblilərinin yüksək nəticələr göstərdiyini və bu göstəricilərin şəhərdə təhsilin inkişafının bariz göstəricisi olduğunu vurğulayıb. Bu uğurlu nəticələrə görə həm bütün məzunları, həm də onların müəllimlərini təbrik edən Namidə Abbasova məzunlara gələcək təhsil həyatlarında uğurlar arzulayıb.

Yevlax gəncləri adından çıxış edən YAP Yevlax rayon təşkilatı Gənclər Birliyinin sədr müavini Fərid Vaqifli elm yolunda çəkilən bütün əziyyətlərin heç zaman hədər getmədiyini bildirib.

Videkonfrans öz işini qarşılıqlı müzakirələrə davam etdirib.

Qeyd edək ki, həmin tədbirdən sonra ali təhsil müəssələrinə qəbul imtahanlarında 600 baldan yuxarı nəticə göstərən bir qrup yevlaxlı abituriyent YAP Yevlax rayon təşkilatının qərargahına dəvət olunub. Qərargahda onlar YAP Yevlax rayon təşkilatının sədri, Milli Məclisin deputatı İlham Məmmədov tərəfindən fəxri fərman və hədiyyələrlə təltif olunublar.

Paylaş:

Baxılıb: 771 dəfə