Azərbaycan əməkdaşlıqda maraqlıdır

Bakı:

27 °C

65 %

6 m/s

Əlaqə

AZ RU EN

Ana səhifə / YAP xəbərləri / Azərbaycan əməkdaşlıqda maraqlıdır

Azərbaycan əməkdaşlıqda maraqlıdır

13.10.2023 [16:16]

Məlum olduğu kimi, Azərbaycan Respublikasının İqtisadi Əməkdaşlıq Təşkilatına sədrliyi çərçivəsində oktyabrın 10-da Şuşa şəhərində Xarici İşlər Nazirləri Şurasının 27-ci iclası keçirilib.

Prezident İlham Əliyevin iclas iştirakçılarına müraciət ünvanlayıb. Müraciətdə Azərbaycan İqtisadi Əməkdaşlıq Təşkilatının fəal üzvü olduğu və təşkilata üzv olan dövlətlərlə münasibətlərinə xüsusi əhəmiyyət verdiyi, Azərbaycan təşkilat çərçivəsində əməkdaşlığın bütün sahələrdə genişlənməsinin tərəfdarı olduğu vurğulayıb. Dövlət başçımız müraciətində bir neçə gün öncə Şuşa şəhərinin 2026-cı il üçün İƏT-in turizm paytaxtı elan edilməsinə görə təşəkkürünü bildirib.

Prezident İlham Əliyev müraciətdə postmünaqişə dövründə bölgədə yaranmış əməkdaşlıq perspektivlərinə də toxunub. Dövlət başçımız müraciətdə Azərbaycanın daim sülhün tərəfdarı və bölgədə sülh təşəbbüslərinin müəllifi oluduğunu, regional məsələlərin bilavasitə region ölkələrinin iştirakı ilə həll edilməsi prinsipindən çıxış etdiyini, ölkəmizin 3+3 əməkdaşlıq formatını irəli sürdüyünü vurğulayıb. Eyni zamanda müraciətdə hazırda Ermənistan-Azərbaycan münasibətlərinin normallaşdırılması, sülh müqaviləsinin imzalanması və Cənubi Qafqaz bölgəsinin sülh və əməkdaşlıq məkanına çevrilməsi üçün tarixi şərait yarandığı diqqətə çatdırılıb.

Müraciətdə həmçinin Azərbaycanın təşəbbüsü ilə İƏT-in illik mövzusunun “Yaşıl keçid və qarşılıqlı bağlantılar” olaraq müəyyən edildiyi öz əksini tapıb. Habelə ölkəmizin milli, o cümlədən beynəlxalq səviyyədə bu istiqamətdə olduqca mühüm işlər gördüyü diqqətə çatdırılıb. Qeyd edilib ki, dekarbonlaşma, “yaşıl enerji” növlərinin artırılması kimi məsələlər Azərbaycanın dayanıqlı inkişaf gündəliyinin əsasını təşkil edir. Eyni zamanda “yaşıl enerji” zonası elan edilmiş Qarabağ və Şərqi Zəngəzurda aparılan genişmiqyaslı yenidənqurma və bərpa işləri “ağıllı şəhər” və “ağıllı kənd” konsepsiyasına uyğun olaraq həyata keçirilir.

Prezident cənab İlham Əliyev müraciətində 2020-ci ildə Ermənistanın işğalından azad edilmiş torpaqlarımızda aparılan irimiqyaslı bərpa-quruculuq işlərindən bəhs edərək məlumat verib ki, qısa zaman kəsiyində bu ərazilərdə vacib infrastruktur layihələri həyata keçirilmiş, o cümlədən iki yeni hava limanı tikilib istifadəyə verilmişdir. Üçüncü hava limanı isə hazırda Laçında inşa edilir. Eyni zamanda dövlət başçımız Füzuli şəhərində artıq inşası başa çatmış məktəbə və tikilməkdə olan yaradıcılıq mərkəzinə görə qardaş Özbəkistana və Qazaxıstana təşəkkürünü bildirib. Cənab İlham Əliyev bunu ölkələrimiz arasında qardaşlığın, həmrəyliyin və dostluğun növbəti bariz təzahürü kimi qiymətləndirib.

“İşğaldan azad edilmiş ərazilərə “Böyük Qayıdış” proqramı milli prioritetlərimiz sırasındadır” Deyən ölkə başçısı uğurla icra edilən proqram çərçivəsində bu günə qədər Laçın, Füzuli şəhərlərinə, Ağalı, Zabux və Talış kəndlərinə köçkünlərin qayıtmasının təmin olunduğunu, növbəti 3 ildə 100 minə qədər köçkünün doğma yurd-yuvalarına dönməsinin planlaşdırıldığını diqqətə çatdırıb.

Müraciətində erməni vandalizminə də toxunan cənab İlham Əliyev 30 illik işğal zamanı düşmənin bəşəri əhəmiyyətə malik mədəni irsimizə, o cümlədən İslam dininə aid bütün abidələrə qəsdən ziyan vurduğunu, bu dövrdə 67 məsciddən 65-i yerlə-yeksan etdiklərini, qalan məscidlərdə isə heyvanların saxlanılması kimi təhqiramiz əməllər törətdiyini, bu günlərdə daha bir məscidin – Malıbəyli məscidinin dağıdılması və tövlə kimi istifadə edilməsi faktının aşkar edildiyini iclas iştirakçılarının diqqətinə çatdırıb. Dövlət başçımız bildirib ki, bütün bunlar təkcə azərbaycanlıların deyil, bütün dünya müsəlmanlarının hisslərinin təhqir olunması deməkdir.

Gələcək planlar, qarşıya qoyulan hədəflərdən bəhs edən ölkə başçısı

Azərbaycanın etibarlı tranzit ölkəsi olduğunu, Şərq-Qərb marşrutu üzrə yükdaşımalara tələbatın artdığını nəzərə alaraq ölkəmiz Bakı-Tbilisi-Qars dəmir yolu ilə daşınan yüklərin həcminin 1 milyon tondan 5 milyon tona çatdırmağı hədəflədiyini, həmçinin İran İslam Respublikasının ərazisi vasitəsilə Naxçıvan Muxtar Respublikasına çıxış imkanı yaradacaq avtomobil və dəmir yolunun çəkilməsi barədə bu ölkə ilə razılıq əldə olunduğunu məlumat olaraq bildirib. Cənab İlham Əliyev ünvanladığı müraciətdə Azərbaycanın Şimal-Cənub Nəqliyyat Dəhlizinin ötürücülük qabiliyyətinin daha da genişləndirilməsi üzərində fəal çalışdığını diqqətə çatdırıb.

Beləliklə, Şuşa şəhərində keçirilən İqtisadi Əməkdaşlıq Təşkilatının Nazirlər Şurasının 27-ci iclası iştirakçı ölkələrin və bütövlükdə regionun davamlı inkişafına töhfə verməklə yanaşı, eyni zamanda Azərbaycan həqiqətlərini , mövcud reallıqları diqqətə çatdırılması baxımından da olduqca əhəmiyyətli platforma kimi yadda qaldı.

Sahib Şükürov

YAP Göyçay rayon təşkilatının sədri

Paylaş:

Baxılıb: 577 dəfə