Şərq Tərəfdaşlığı Sammiti ölkəmizin haqlı mövqeyinin təsdiqində əhəmiyyətli rol oynadı

Bakı:

25 °C

55 %

3 m/s

Əlaqə

AZ RU EN

Ana səhifə / Xəbər lenti / Şərq Tərəfdaşlığı Sammiti ölkəmizin haqlı mövqeyinin təsdiqində əhəmiyyətli rol oynadı

Şərq Tərəfdaşlığı Sammiti ölkəmizin haqlı mövqeyinin təsdiqində əhəmiyyətli rol oynadı

16.12.2021 [19:41]

Milli Məclisin deputatı Əliabbas Salahzadə bu gün dünyanın diqqətində olan Şərq Tərəfdaşlığının VI Sammitinin Azərbaycanın diplomatik uğurlarının təqdimatında mühüm əhəmiyyət kəsb etməsindən bəhs edərək bildirib ki, dövlət başçısı İlham Əliyev Sammitdəki çıxışında, həmçinin keçirdiyi görüşlərdə postmünaqişə dövrünün çağırışlarını bir daha səsləndirərək Ermənistanın sülh sazişi ilə bağlı danışıqlara başlamasının vacibliyini diqqətə çatdırıb: “Dövlət başçısının Brüssel səfəri görüşlərlə zəngin olmaqla yanaşı, müzakirə edilən məsələlərin aktuallığı baxımından da diqqətçəkəndir. Bu məqamı xüsusi qeyd etmək lazımdır ki, Azərbaycanın yürütdüyü siyasət, həmçinin Vətən müharibəsində tarixi Zəfəri iki və çoxtərəfli çərçivədə əlaqələrini daha da möhkəmləndirir, ölkəmizə beynəlxalq dəstəyi artırır. Ölkə Prezidentinin keçiridiyi görüşlər, ən əsası Avropa İttifaqı Şurasının Prezidentinin təşəbbüsü ilə Azərbaycan Prezidentinin və Ermənistanın baş nazirinin görüşləri, Şarl Mişelin üçtərəfli görüşün nəticəsi ilə bağlı Bəyanatında yer alan fikirlər ölkəmizin söz sahibliyini nümayiş etdirir. Azərbaycanla Avropa İttifaqı arasında münasibətlərdə yeni səhifə açılır. Azərbaycan hər zaman bu gün artıq tarixə qovuşan Dağlıq Qarabağ münaqişəsinin nizamlanması prosesində bütün beynəlxalq təşkilatların potensialından istifadə etmək niyyətini açıqlayırdı. Təəssüflər olsun ki, bəzi qurumlar qəbul etdikləri qərar və qətnamələrdə Azərbaycanın mövqeyini dətəkləsələr də real məqam yetişəndə susmağa daha çox üstünlük verirdilər.”

Əliabbas Salahzadə qeyd edib ki, 30 ilə yaxın işğal, həmçinin 44 günlük Vətən müharibəsi dövründə seyrçi mövqedə dayanan əksər dövlətlər, beynəlxalq təşkilatlar bu gün Ermənistanla Azərbaycan arasında münasibətlərin tənzimlənməsinə yardımçı olmağa çalışırlar: “Bu, Azərbaycanın artan nüfuzu ilə yanaşı, bölgədə dayanıqlı sülhün və təhlükəsizliyin təmin olunmasının artıq hər bir dövlətin, beynəlxalq təşkilatın marağında olduğunu göstərir. Dövlət başçısı İspaniyanın “El Pais” qəzetinə müsahibəsində bildirir ki, uzunmüddətli sülhdə maraqlı olan beynəlxalq ictimaiyyətin, təsisatların, ölkələrin bu səyləri çox müsbət nəticə verə bilər. Çünki uzun illər davam edən işğaldan və düşmənçilikdən sonra beynəlxalq oyunçular prosesə birmənalı şəkildə dəstək nümayiş etdirməlidirlər.

Kommunikasıyaların açılması, yeni əməkdaşlıq formatlarının yaradılması və sair kimi məsələlərin həlli də öz növbəsində sülh müqaviləsinin imzalanmasını zəruri edir. Bu sazişin imzalanması Ermənistanla Azərbaycanın qarşılıqlı şəkildə bir-birinin ərazi bütövlüyünü dəstəkləməsidir. Ermənistan rəhbərliyi çox yaxşı bilir ki, sərsəm “Qarabağ Ermənistandır və nöqtə” bəyanatı, törətdiyi təxribatlar danışıqları gərəksiz etdi, 44 günlük İkinci Qarabağ müharibəsinə səbəb oldu. Artıq Azərbaycan “Dəmir yumruğ”unu nümayiş etdirib.”

Avropa İttifaqı Şurasının Prezidentinin üçtərəfli görüşün nəticəsinə dair Bəyanatında Ermənistan ilə Azərbaycan arasındakı münaqişənin aradan qaldırılmasına, Cənubi Qafqazda sülhün bərqərar olunması üçün iki ölkə arasında hərtərəfli sülh müqaviləsinin imzalanmasına çağırış etdiyini xüsusi vurğulayan millət vəkili bildirib ki, ümumiyyətlə, cənab İlham Əliyevin Brüsselə işgüzar səfəri Avropa İttifaqı ilə NATO-nun Azərbaycana dəstəyini nümayiş etdirdi: “Dünyada sülhün, təhlükəsizliyin təminatı missiyasını yerinə yetirən NATO sülh sazişinin imzalanmasına dəstək olmağa hazırdır. Bu, Azərbaycanın ədalətli mövqeyinə dəstəyin ifadəsidir. Avropa İttifaqı Şurasının Prezidentinin üçtərəfli görüşün nəticəsinə dair Bəyanatında da əksini tapan Azərbaycanın haqlı mövqeyinin təsdiqidir. Bugünkü reallıqlar fonunda dövlət başçısı, Müzəffər Ali Baş Komandan İlham Əliyevin Şuşada Vaqif Poeziya Günlərinin açılışı mərasimində səsləndirdiyi bu fikirləri bir daha xatırlatmaq istərdik. Ölkə Prezidenti bildirmişdir ki, işğal dövründə bir çoxlarımız - həm keçmiş məcburi köçkünlər, həm bütün Azərbaycan xalqı, o cümlədən də mən dəfələrlə fikirləşirdik ki, dünyada ədalət yoxdur. Ancaq həyat göstərdi ki, ədalət var, sadəcə, dözümlü, səbirli olmaq, ədalətə inanmaq lazımdır. Ədalətə nail olmaq üçün çalışmaq, hədəfə doğru getmək, fədakarlıq göstərmək lazımdır. Bu gün hamımız deyirik ki, bəli, ədalət var, ədalət bərpa edildi.”

Əliabbas Salahzadə Azərbaycanın xarici siyasət uğurlarını diqqətə çatdıraraq bildirib ki, Soçi, ardınca Brüssel görüşü, həmçinin Şərq Tərəfdaşlığının Sammiti çərçivəsində Fransa Prezidentinin təşəbbüsü ilə Azərbaycan Prezidentinin və Ermənistanın baş nazirinin qeyri-formal görüşü artıq Ermənistanın dalana dirəndiyini, beynəlxalq təzyiqlərin gücləndiyini təsdiqləyir.

Paylaş:

Baxılıb: 900 dəfə