İlk görüş Moskvada...

Bakı:

31 °C

41 %

4 m/s

Əlaqə

AZ RU EN

Ana səhifə / Xəbər lenti / İlk görüş Moskvada...

İlk görüş Moskvada...

07.01.2022 [10:09]

Yanvarın 14-də Türkiyə və Ermənistanın xüsusi nümayəndələri bir araya gələcək

Nardar BAYRAMLI

Bir müddət öncə Türkiyə-Ermənistan münasibətlərinin normallaşdırılması məqsədilə hər iki tərəfdən xüsusi nümayəndə təyin olunub. Xüsusi nümayəndələr olaraq Türkiyəni Serdar Kılıç, Ermənistanı isə Ruben Rubinyan təmsil edir. Artıq xüsusi nümayəndələrin görüşünün keçirilməsi məsələsi gündəmə gəlib. Türkiyə və Ermənistanın xüsusi nümayəndələrinin ilk görüşü yanvarın 14-də baş tutacaq. Görüşün Rusiyanın paytaxtı Moskva şəhərində keçirilməsi nəzərdə tutulur.

Xüsusi nümayəndələrin Moskvada keçiriləcək ilk görüşündə hansı nəticələr əldə oluna bilər? Məsələ ilə bağlı qəzetimizə açıqlama verən politoloq Ramiz Alıyev bildirib ki, Türkiyə Cümhuriyyəti Ermənistanla sərhəddi 1993-cü ildə bu ölkənin Azərbaycana qarşı işğalçı siyasətinə görə bağlayıb: “Məhz Azərbaycan torpaqlarının işğalı səbəbinə görə Ermənistan 30 ilə yaxın regionda tam təcrid vəziyyətində yaşayıb. Artıq işğala son qoyulub və Qarabağ münaqişəsi keçmişdə qalıb. Düşünürəm ki, Ermənistan Azərbaycana qarşı ərazi iddialarına birdəfəlik son qoyduğu təqdirdə, bu ölkənin Türkiyə ilə sərhədlərinin açılması üçün heç bir maneə qalmayacaq”.

Politoloq hesab edir ki, iki ölkə arasında münasibətlərin normallaşmağa doğru getməsi, xüsusən tərəflərin qarşılıqlı şəkildə xüsusi nümayəndələr təyin etməsi və həmin nümayəndələrin Moskvada görüşü ilə bağlı razılığın əldə olunması regionun gələcək taleyi baxımından son dərəcə mühüm hadisədir: “Bu, ilk növbədə, Ermənistan hakimiyyətinin 44 günlük Vətən müharibəsindən sonra yaranmış yeni reallıqları qəbul etmək niyyətində olmasından xəbər verir. Rəsmi İrəvan nəhayət başa düşür ki, qonşulara qarşı ərazi iddiaları ilə çıxış etmək bu ölkəyə ancaq fəlakət vəd edə bilər. Ona görə də Ermənistanın iflasdan yeganə çıxış yolu Azərbaycan və Türkiyə ilə əməkdaşlıqdan keçir. Erməni tərəfi regionun gələcəyi ilə bağlı irəli sürülən təşəbbüslərə qoşulmalıdır”.

R.Aliyev söyləyib ki, Türkiyə dövləti bu prosesi Azərbaycanla koordinasiyalı şəkildə həyata keçirməkdədir: “Hər halda regionda kommunikasiyaların açılması və Azərbaycan-Ermənistan sərhədlərinin müəyyən olunması, ən əsası, yekun sülh müqaviləsinin imzalanması istiqamətində müsbət dinamika yaşanmaqdadır. Soçi və Brüssel görüşləri də onu göstərdi ki, Azərbaycanın yaratmış olduğu yeni vəziyyətin legitimliyi dünya gücləri tərəfindən tanınır. Ermənistan isə başqa bir alternativ seçimin olmadığını başa düşərək hər iki görüşdə öz öhdəliklərini birmənalı şəkildə təsdiq etdi. Son vaxtlar Nikol Paşinyanın verdiyi pozitiv mesajlar da bu reallıqlardan qaynaqlanır. Hadisələrin ümumi inkişaf dinamikası onu deməyə əsas verir ki, bütün müstəvilərdə Azərbaycan şərtləri diktə edən tərəfdir. Bir sözlə, əgər bu gün Türkiyə-Ermənistan sərhədlərinin açılması gündəmdədirsə və bu xüsusda görüşlərin keçirilməsi qərara alınıbsa, istisna deyil ki, Ermənistan ən qısa zamanda Azərbaycanın ərazi bütövlüyünü tanımaq barədə öhdəlik götürüb. Hesab edirəm ki, xüsusi nümayəndələrin Moskva görüşündə bu məsələlər geniş müzakirə olunacaq. Əlbəttə, bir görüşdə bütün problemlərin həll olunması real görünmür. Amma bu görüş ilkin addımların atılması və regionun gələcək mənzərəsinin müəyyənləşdirilməsi baxımından vacibdir”.

Paylaş:

Baxılıb: 939 dəfə