Milli Məclis yaz sessiyasında hansı məsələləri müzakirə edəcək?

Bakı:

30 °C

50 %

2 m/s

Əlaqə

AZ RU EN

Ana səhifə / Xəbər lenti / Milli Məclis yaz sessiyasında hansı məsələləri müzakirə edəcək?

Milli Məclis yaz sessiyasında hansı məsələləri müzakirə edəcək?

25.01.2022 [10:45]

Günel

Milli Məclisdə 2022-ci il yaz sessiyası üçün iş planına daxil edilən məsələlər müəyyənləşib.

İşğaldan azad edilmiş ərazilərdə dini abidələrin bərpası

Parlamentin İctimai birliklər və dini qurumlar komitəsində işğaldan azad edilmiş ərazilərdə dini abidələrin bərpası müzakirə ediləcək. Komitənin iş planına “İşğaldan azad edilmiş ərazilərdə dini abidələrin bərpası sahəsindəki tədbirlərlə bağlı” dinləmənin keçirilməsi daxil edilib.

“Məşğulluq haqqında” qanunun monitorinqi

Əmək və sosial siyasət komitəsində isə “Məşğulluq haqqında” qanunun monitorinqi aparılacaq. Monitorinq zamanı deputatlar öz fikirlərini söyləyəcək və hansı maddələrə dəyişiklik ediləcəyi müəyyənləşəcək. Qeyd edək ki, Əmək və sosial siyasət komitəsinin iclası 26 yanvar 2022-ci ildə keçiriləcək.

Böyük qayıdış ilə bağlı qanun layihəsi hazırlanacaq

İnsan Hüquqları komitəsində işğaldan azad edilmiş ərazilərə böyük qayıdış və reinteqrasiya ilə bağlı qanun layihəsi hazırlanacaq. Yeni qanun layihəsi sessiya müddətində komitədə hazırlanacaq. Həmçinin Böyük qayıdışla bağlı beynəlxalq insan hüquqları və hüquq-müdafiə təşkilatlarının iştirakı ilə əməkdaşlıq layihəsi hazırlanacaq.

Azad olunmuş torpaqlara Böyük qayıdışla bağlı insan hüquqları, postmüharibə dövründə birgəyaşayış istiqamətində qanunverici məsələləri araşdıran Komissiyanın yaradılması, beynəlxalq insan hüquqları və hüquq-müdafiə təşkilatlarının iştirakı ilə bu istiqamətdə əməkdaşlıq layihəsinin təşkil edilməsi komitənin iş planına daxil edilib.

Amnistiya aktı ilə bağlı dinləmə keçiriləcək

Parlamentin İnsan Hüquqları komitəsində Amnistiya aktı ilə bağlı dinləmə keçiriləcək. Komitədə sessiya müddətində “Əfv institutu-Amnistiya aktı İnsan hüquqlarının təminatı institutu kimi: reallaşdırılmasının aktual problemləri” mövzusunda vətəndaş cəmiyyəti və ekspertlərlə birgə ictimai dinləmələr keçiriləcək.

Ermənistan tərəfindən törədilən cinayətlərlə bağlı xüsusi dinləmə

İnsan Hüquqları komitəsində Vətən müharibəsi dövründə Ermənistan tərəfindən törədilən cinayətlərlə bağlı xüsusi dinləmə keçiriləcək. Komitədə sessiya müddətində Vətən müharibəsi dövründə Ermənistan tərəfindən törədilən cinayətlərin, Ermənistan silahlı qüvvələrinin işğalı nəticəsində Azərbaycan Respublikası vətəndaşlarının pozulmuş hüquqlarının müdafiəsinin və Azərbaycan dövlətinə dəymiş ziyanın beynəlxalq instansiyalarda müvafiq iddialar əsasında gerçəkləşdirilməsinin hüquqi mexanizmləri ilə bağlı xüsusi dinləmə keçiriləcək.

Sosial media haqqında qanun layihəsi hazırlanacaq

Milli Məclisin İnsan Hüquqları komitəsində “Rəqəmsal məkanda ölkə vətəndaşlarının hüquqlarının qorunması ilə bağlı” yeni qanun layihəsi hazırlanacaq.

Həmçinin ölkədə medianın (o cümlədən sosial şəbəkələrin) mövcud durumu və yeni inkişaf strategiyası ilə dinləmə keçiriləcək. Qeyd edilib ki, komitədə sessiya müddətində Azərbaycan Respublikasının İnsan hüquqları üzrə müvəkkilinin və aparatının, həmçinin Medianın İnkişaf Agentliyinin iştirakı ilə ölkədə medianın (o cümlədən sosial şəbəkələrin) mövcud durumu və yeni inkişaf strategiyası ilə bağlı müzakirə və dinləmələr təşkil ediləcək, diffamasiya ilə bağlı məsələlər müzakirə ediləcək.

Eyni zamanda sessiya müddətində Azərbaycan Respublikası ilə Türkiyə Respublikası arasında “Media sahəsində strateji əməkdaşlıq haqqında” Anlaşma Memorandumundan irəli gələn məsələlərə həsr olunmuş tədbirlərin keçirilməsi komitənin iş planına daxil edilib.

Komitədə “18 iyun - Milli insan hüquqları gününə həsr olunmuş ictimai dinləmə” və “Diffamasiya haqda qanunvericilik və beynəlxalq təcrübə” ilə bağlı dinləmələrin keçirilməsi nəzərdə tutulur.

Qadın və uşaqların hüquqları ilə bağlı ictimai müzakirə

İnsan Hüquqları komitəsində qadın və uşaqların hüquqları ilə bağlı ictimai müzakirə keçiriləcək. Komitədə sessiya müddətində qadın hüquqları ilə bağlı Ailə Qadın və Uşaq Komitəsi, bu sahədə mövcud olan vətəndaş, QHT təşkilatları ilə birgə video-konfransın keçirilməsi nəzərdə tutulub. Eyni zamanda, görüşün nəticəsi olaraq təkliflərlə bağlı hesabat hazırlanacaq. Komitənin iş planına “Məişət zorakılığı” mövzusunun aktuallığını nəzərə alaraq paytaxt və bölgələrdə dövlət ailə siyasəti, qadın və uşaqların hüquqları ilə bağlı bütün təbəqələrin iştirakı ilə maarifləndirilmə layihələri, ictimai müzakirələr keçirilməsi daxil edilib.

Paylaş:

Baxılıb: 774 dəfə