Kibertəhlükəsizliyin təmin olunmasında önəmli addım

Bakı:

10 °C

93 %

1 m/s

Əlaqə

AZ RU EN

Ana səhifə / Xəbər lenti / Kibertəhlükəsizliyin təmin olunmasında önəmli addım

Kibertəhlükəsizliyin təmin olunmasında önəmli addım

07.07.2022 [10:07]

Yeni Fərman özündə nələri ehtiva edir?

Nicat PAŞA

Dövlətin və millətin mövcudluğu üçün təhlükəsizlik və milli maraqlar önəmli məsələlərdən biridir. İnformasiyanın çox böyük sürətlə yayıldığı bir dövrdə ölkənin hər bir vətəndaşı informasiya təhlükəsizliyinə ciddi şəkildə riayət etməlidir. Ələlxüsus, insanların informasiyadan asılı olduğu hazırkı dövr informasiya təhlükəsizliyinin yüksək səviyyədə təmin olunmasını zəruri və qaçılmaz edir. Ölkəmizdə aidiyyəti qurumlar bu məsələ ilə bağlı öz təkliflərini hazırlayır, müxtəlif layihələr, konsepsiyalar təqdim edirlər. Sadalananların praktik təcrübədə nə qədər önəmli olduğunun isə 44 günlük Vətən müharibəsi dövründə bir daha əyani şahidi olduq.

Bununla yanaşı, informasiya təhlükəsizliyi yalnız iqtisadi, hərbi, siyasi məsələlərdə deyil, istifadəçilərin bu və ya digər səbəbdən müxtəlif kiberhücumlara məruz qalmaları, aldadılmaları aspketindən də olduqca əhəmiyyətlidir. Belə ki, təhlükəli bir silaha çevrilən informasiyadan zərərli məqsədlə istifadə olunduqda ciddi problemlərə yol aça bilər.

Xatırladaq ki, Azərbaycanda “İnformasiya, informasiyalaşdırma və informasiyanın mühafizəsi haqqında” Qanun 1998-ci il aprelin 3-də qəbul edilib. Azərbaycan Respublikasının Prezidenti İlham Əliyev “İnformasiya təhlükəsizliyi sahəsində fəaliyyətin təkmilləşdirilməsi tədbirləri haqqında” Fərmanı imzaladıqdan sonra ölkəmizdə milli informasiya təhlükəsizliyi üzrə mükəmməl strategiyanın yeni mərhələsi başladı.

Ölkəmizdə informasiya təhlükəsizliyinin təmin olunması prioritet istiqamətlər sırasındadır. Dövlətimizin başçısı hər zaman bu məsələyə xüsusi həssaslıqla yanaşır, öz tapşırıq və tövsiyələrini verir. İki gün öncə ölkə başçımızın imzaladığı “İnformasiya, informasiyalaşdırma və informasiyanın mühafizəsi haqqında” Azərbaycan Respublikasının Qanununda dəyişiklik edilməsi barədə” Qanun və bu Qanunun tətbiqi barədə Fərmanı informasiya təhlükəsizliyinin təmin edilməsi istiqamətində atılan mühüm addımlardan biridir.

Azərbaycanda son dövrlərdə bu istiqamətdə müəyyən addımlar atılsa da, son illərdə baş verən problemlər göstərirdi ki, bizim kritik informasiya infrastrukturu adlandırdığımız sahədə ciddi problemlər var. Kritik informasiya infrastrukturu nədir? Minlərlə, on minlərlə vətəndaşa xidmət göstərən qurumlar var. Bu qurumların informasiya sistemində, kibermühitində nə isə bir problem olduqda böyük çaxnaşmalar olur, ciddi kəm-kəsirlər ortaya çıxır, vətəndaşlara xidmət göstərmək mümkün olmur və s. Kritik informasiya infrastrukturuna biz çoxsaylı vətəndaşlarla işləyən qurumları - “Azəriqaz”, “Azərenerji”, “Azərsu” digər dövlət qurumları və hətta özəl sektoru - daxil edirik. Qanunvericilikdə olan dəyişiklik də bu sahədə olan problemlərin qarşısının alınmasına, daha da yaxşı tənzimlənməsinə yönələn dəyişikliklərdir.

Bu fikirləri “Yeni Azərbaycan” qəzetinə açıqlamasında Azərbaycan İnternet Forumunun prezidenti Osman Gündüz səsləndirib. İKT mütəxəssisi bildirib ki, yeni qanunla kritik informasiya infrastrukturuna verilən tələblər müəyyən olunacaq: “Yəni bu infrastruktur hansıdır? Hansı qurumlar daxildir? Səlahiyyətli dövlət qurumları kimlərdir? Onlar hansı addımları ata biləcəklər? Məsələn, indiki halda səlahiyyətli dövlət qurumu gedib hansısa kritik dövlət qurumunda audit apara bilməz. Bu audit könüllüdür. Yəni gərək həmin qurumun özü orada kibermühitin necə olmasını audit etmək üçün səlahiyyətli qurumu dəvət etsin. Könüllü olmağı da problemlər yaradır. Amma qanunda bütün bunlar yəqin ki, sərtləşdiriləcək, məcburi olacaq, ildə 1-2 dəfə yoxlanışdan keçmək tələb olunacaq”.

“Hesab edirəm ki, qanunda olan dəyişikliklər, kibermühitin tənzimlənməsinə yönəlik məsələlər bu mühitin inkişafına böyük təsir edəcək. İndiki vaxtda buna ciddi ehtiyac var. Hesab edirəm ki, qanunun qəbulu Azərbaycanın kibermühitinin inkişafı üçün, kiberinfrastrukturun dayanıqlılığı üçün mühüm rol oynayacaq” - deyə O.Gündüz qeyd edib.

Paylaş:

Baxılıb: 576 dəfə