Diaspor Komitəsi dünya azərbaycanlılarına müraciət edib

Bakı:

26 °C

65 %

11 m/s

Əlaqə

AZ RU EN

Ana səhifə / Xəbər lenti / Diaspor Komitəsi dünya azərbaycanlılarına müraciət edib

Diaspor Komitəsi dünya azərbaycanlılarına müraciət edib

21.11.2022 [15:30]

Diasporla İş üzrə Dövlət Komitəsi dünya azərbaycanlılarına müraciət edib.

Mətndə Fransa Senatının noyabrın 15-də Azərbaycana qarşı sanksiyaları nəzərdə tutan qətnamə qəbul etdiyi, noyabrın 28-də isə sənədin Milli Assambleyada müzakirəyə çıxarılacağı qeyd olunub.

Bildirilib ki, ATƏT-in Minsk qrupunun həmsədrliyində təmsil olunan Fransa dövləti 30 il ərzində Azərbaycan həqiqətlərinə ikili standartlar əsasında yanaşıb, anti-Azərbaycan qərar və bəyanatları ilə fərqlənib: "Fransa Senatında qəbul olunan və Milli Assambleyada müzakirəyə çıxarılacaq son qətnamə də uzun illər davam edən münasibətin nəticəsidir. Sözügedən qətnamə layihəsi gündəmə gələn ilk gündən dünya azərbaycanlıları buna etiraz etmək məqsədilə səfərbər olaraq qüvvələrini birləşdirib. Bununla bağlı bəyanatlar yayılıb, məqalə dərc olunub, sosial şəbəkələrdə kampaniyalar keçirilib, xüsusilə bütün senatorların rəsmi elektron ünvanlarına 418 müraciət göndərilib, 348 senatorun tviter hesabları vahid həştəqlə işarələnərək erməni yalanlarına uymamaq, təcavüzkar ölkəni dəstəkləməmək və Azərbaycana qarşı obyektiv olmaq çağırışları edilib. Eyni zamanda feysbuk, tviter və instaqram sosial şəbəkələrində minlərlə paylaşımlar olunub. Aparılan tviter kampaniyası nəticəsində azərbaycanlıların haqq səsi təkcə bir gün ərzində 45 min fransıza çatdırılıb. Bu paylaşımlarda Fransa və fransızların Azərbaycan həqiqətləri - Xocalı soyqırımı, Oxçuçayın çirkləndirilməsi, Azərbaycan ərazilərinin minalarla çirkləndirilməsi, Azərbaycanla dövlət sərhədində Ermənistanın təxribatları kimi mövzulara səssiz qalmaması və bundan sonra ikili standartlardan kənar həssas yanaşma nümayiş etdirmək tələb olunub. Bundan başqa, qətnamə layihəsi müzakirə olunan gün diaspor üzvləri Fransa Senatının binası qarşısında icazəli piket keçiriblər".

Vurğulanıb ki, son illər Azərbaycan dövlətinin diqqət və qayğısı nəticəsində Azərbaycan diasporunun sıralarında və fəaliyyətində keyfiyyət dəyişikliyi baş verib: "Uğurlu islahatlar nəticəsində artıq 50-dən çox ölkədə sistemli və müntəzəm diaspor fəaliyyəti təşkil edilib, dünyanın 40-a yaxın ölkəsini və 140-dan çox diaspor təşkilatını əhatə edən Azərbaycanlıların 15 Koordinasiya Şurası fəaliyyət göstərir, dünya ölkələri üzrə Azərbaycan Evlərinin sayı 19-a çatıb. İstər pandemiya, istərsə də Vətən müharibəsi dövründə dünyanın müxtəlif ölkələrində yaşayan soydaşlarımız öz fəaliyyətləri ilə Azərbaycan dövlətinə və onun Liderinə dəstək olublar. 44 günlük müharibə dövründə Komitənin koordinasiyası ilə 300-ə yaxın diaspor təşkilatı, beynəlxalq təşkilatlar və Azərbaycandakı icmalar müxtəlif ölkələrin dövlət və hökumət rəhbərlərinə, parlament üzvlərinə, BMT, Avropa Parlamenti, Avropa Şurası və digər beynəlxalq qurumlara 23 dildə 500-dən artıq bəyanat göndərib. Avropa Parlamentinin üzvlərinə 775 bəyanat çatdırılıb, müxtəlif ölkələrin 641 nəfər parlament üzvünə isə bəyanat və müraciətlər birbaşa təqdim olunub, diaspor nümayəndələri xarici TV-lərdə 98 dəfə canlı yayıma qatılıblar. Dünyanın 60 ölkəsindən minlərlə soydaşımızın qatıldığı 300-dən çox videokonfrans təşkil olunub, diaspor təşkilatları və üzvləri 60 ölkədə 32 dildə 535 məqalə dərc etdiriblər. Məhz diasporumuzun iştirakı ilə 36 xarici ölkədə 198 tədbir keçirilib, onların da 111-i aksiya, yürüş, avtoyürüş olub. Aparılan sistemli və ardıcıl işin nəticəsidir ki, xaricdəki Azərbaycan icmaları vətənpərvərlik adı ilə manipulyasiya edən təsadüfi adamlardan təmizlənir, dövlətçilik maraq və mənafelərini hər şeydən üstün tutan insanların güc birliyinə çevrilir. Təbliğat işlərinin, keçirilən etiraz piketlərinin mahiyyətinə kölgə salmaq istəyən, düşmən dəyirmanına su tökən bəzi “vətənpərvər” müxalif qüvvələr çirkin məqsədlərini yenidən ortaya qoyur, sosial mediada heç bir faktoloji əsası olmayan məlumatlar yaymaqla həmvətənlərimizi yanıltmağa, dövlətimizin beynəlxalq arenadakı uğurlarına xələl gətirməyə çalışırlar. Bununla da Azərbaycan dövlətinə qarşı aparılan çirkin kampaniyaların iştirakçısına çevrilirlər. Qeyd edək ki, Diasporla İş üzrə Dövlət Komitəsi heç bir xarici ölkədə kütləvi aksiyaların təşkilatçısı olmayıb, lakin Azərbaycanın haqq səsini və ədalətli mövqeyini dünya ictimaiyyətinə çatdırmağa çalışan, istənilən zamanda güc birliyi və bərabərlik nümayiş etdirən bütün soydaşlarımıza dəstək durur, təşəkkür edir, onlarla fəxr etdiyimizi və bundan sonra da davamlı olaraq onların yanında olacağımızı bildiririk".

Diaspor Komitəsi sonda dünya azərbaycanlılarına çağırış edib: "Noyabrın 28-də Azərbaycana qarşı bədnam qətnamənin Fransa Milli Assambleyasında müzakirəyə çıxarılacağını nəzərə alaraq sizləri bir daha səfərbər olmağa, Azərbaycanın haqq səsini və ədalətli mövqeyini Assambleya üzvlərinə çatdırmaq üçün qüvvələrinizi birləşdirməyə və yaşadığınız ölkənin qanunvericiliyinin tələblərinə uyğun olaraq öz münasibətinizi bildirməyə çağırırıq. Biz birlikdə güclüyük!"

Paylaş:

Baxılıb: 713 dəfə