İran “terrorçu siması”nı gizlətmək istəyir

Bakı:

29 °C

54 %

9 m/s

Əlaqə

AZ RU EN

Ana səhifə / Xəbər lenti / İran “terrorçu siması”nı gizlətmək istəyir

İran “terrorçu siması”nı gizlətmək istəyir

02.02.2023 [10:44]

Rəsmi Tehran AQEM-də terrorun pislənilməsinə dair sənədin qəbuluna mane olub

Yanvarın 27-də Azərbaycanın İrandakı səfirliyinə qarşı həyata keçirilmiş terror hücumunun beynəlxalq səviyyədə pislənməsi, terror aktını təşkil edənlərin və törədənlərin müəyyənləşdirilərək tezliklə cəzalandırılması, eləcə də Diplomatik Əlaqələr haqqında Vyana Konvensiyasından irəli gələn öhdəliklərin yerinə yetirilməsi barədə çağırışların yer aldığı müvafiq sənədlər qəbul edilmək məqsədilə aidiyyəti beynəlxalq təşkilatlar və platformalara təqdim edilib.

Azərbaycan Xarici İşlər Nazirliyinin Mətbuat xidməti idarəsindən verilən məlumata görə, sözügedən terror aktı törədiləndən indiyə qədər səfirliyimizə qarşı silahlı hücum ayrı-ayrılıqda 100-ə yaxın ölkə və bir sıra beynəlxalq təşkilatların katiblikləri tərəfindən pislənib və bu aktı törədənlərin cəzalandırılmasının zəruriliyi verilmiş bəyanatlarda vurğulanıb.

İran tərəfi üzvü olduğu və qərarların konsensusla qəbul edildiyi beynəlxalq təşkilatlarda terror hücumunun beynəlxalq müstəvidə geniş şəkildə ifşa olunmasının qarşısının alınmasına çalışıb. Bu xüsusda, hücumdan dərhal sonra Qoşulmama Hərəkatının (QH) Əlaqələndirici Bürosuna və Asiyada Qarşılıqlı Fəaliyyət və Etimad Tədbirləri üzrə Müşavirəyə (AQEM) Azərbaycan tərəfindən təqdim edilmiş kommünike və bəyanat layihələrinə İran tərəfi etiraz edib və bu sənədlərin qəbuluna mane olub.

İran tərəfi bununla yanaşı, sözügedən təşkilatlarda öz mövqeyinə dəstək məqsədilə bir çox ölkələrə müraciət etsə də, Qoşulmama Hərəkatında 120 ölkə arasından İranın mövqeyinə dəstək verən yalnız Suriya və Hindistan olub. Bu üç ölkə sözügedən sənədlərin qəbuluna qarşı çıxan zaman səsləndirdiyi əsas iddia guya əvvəllər Qoşulmama Hərəkatında ayrı-ayrı ölkələrdə terror hücumlarının pislənmədiyi və bu ölkələr arasında ikitərəfli məsələlərin Qoşulmama Hərəkatı kimi beynəlxalq platformalara gətirilmədiyi olub. Halbuki, Qoşulmama Hərəkatı bir çox hallarda üzv ölkələrində baş vermiş terror hücumlarını pisləyən, diplomatik missiyaların mühafizəsinə vurğu edən bir sıra sənədlər qəbul edib.

“İran tərəfinin bu təxribatçı addımını pisləyir və beynəlxalq öhdəliklərinə riayət etməsinin zəruri olduğunu bildiririk. Azərbaycan tərəfi səfirliyinə qarşı terror aktının geniş şəkildə pislənməsi və terror aktını törədənlərin cəzalandırılması üçün bütün müvafiq beynəlxalq platformalardan istifadə edəcək”, - məlumatda qeyd edilib.

Məsələ ilə bağlı qəzetimizə açıqlama verən politoloq İlyas Hüseynov bildirib ki, Azərbaycanın İrandakı səfirliyində törədilən terror hücumuna beynəlxalq qiymət verilməlidir. Terror aktı törədildikdən qısa müddət sonra bir sıra diplomatik nümayəndəliklər, ölkələr bu terroru qınadılar. Rəsmi Bakı bu terror aktına hüquqi qiymətin verilməsi, beynəlxalq müstəvidə lazımi tədbirlərin görülməsi istiqamətində addımlar atır. Bu xüsusda AQEM-də də müzakirələr keçirilib. “Amma burada İran tərəfinin etirazı, yekun sənədin qəbul olunmasına qarşı çıxması kifayət qədər suallar doğurur, bir sıra mətləblərdən xəbər verir. Əgər İran tərəfi terror aktının dövlətin iradəsindən kənar, hər hansı qruplaşma tərəfindən törədilməsinə əmindirsə, yaxud bu yöndə istintaqın ilkin izləri məlum olubsa, onda bu terror aktının beynəlxalq müstəvidə pislənilməsinə qarşı çıxmamalıdır”, - deyən politoloqun fikrincə, bu fakt bizim üçün müəyyən ipucları formalaşdırır.

Onun sözlərinə görə, ola bilsin İran öz adının beynəlxalq sənədlərdə terrorla eyni çəkilməməsinə çalışıb: “Lakin nəzərə alınmalıdır ki, bir sıra beynəlxalq sənədlərdə İranın adı dövlət səviyyəsində terroru dəstəkləyən ölkələr sırasında əksini tapır. Əgər Tehrandakı səfirliyimizin mühafizəçisi Vasif Tağıyev cinayətkarı zərərsizləşdirə bilməsəydi, onda həmin terrorun miqyası daha böyük olardı. Yəni, o, daha genişmiqyaslı terror aktının qarşısını almış oldu. Prezident İlham Əliyev də bu hadisəni terror aktı kimi qiymətləndirib və qeyd edib ki, İran polisi hərəkətsiz olub. Halbuki, polis terrorun qarşısını vaxtında almalı idi. Təəssüflər olsun ki, belə bir terror aktı baş verdi. Bu hadisəyə mütləq hüquqi qiymət verilməlidir. Hadisə siyasi müstəvidə də dərindən araşdırılmalıdır”.

N.BAYRAMLI

Paylaş:

Baxılıb: 540 dəfə