“Azərbaycan səfirliyinə edilən hücum Türkiyəyə hücumdur”

Bakı:

26 °C

62 %

10 m/s

Əlaqə

AZ RU EN

Ana səhifə / Xəbər lenti / “Azərbaycan səfirliyinə edilən hücum Türkiyəyə hücumdur”

“Azərbaycan səfirliyinə edilən hücum Türkiyəyə hücumdur”

02.02.2023 [12:57]

“Şuşa Bəyannaməsini xatırladıram”

Günel ABBAS

“Ev sahibi olan ölkə diplomatik və konsulluq üzvlərinin müdafiəsinə cavabdehdir. Yəni İran Azərbaycan diplomatlarını qorumalıdır. Həmin məsələ 1961-ci il Vyana Konvensiyasında açıq şəkildə əksini tapıb. Hücuma görə İran məsuliyyət daşıyır. İranda güclü kəşfiyyat təhlükəsizlik sistemi mövcuddur, hücumun baş verməsini qəbul etmək mümkün deyil. Rəsmi Tehran terroru həyata keçirən, hücuma kömək edən hər kəsi ortaya çıxarmalıdır”.

Bunu yeniazerbaycan.com-a açıqlamasında Türkiyənin Azərbaycandakı keçmiş səfiri Hulusi Kılıç deyib.

O bildirib ki, Azərbaycanın səfirliyi Azərbaycanın torpağıdır: “Yəni, Azərbaycanın torpağına hücum edilib. 44 günlük Vətən müharibəsindən sonra rəsmi Tehranın fərqli davranışlar sərgilədiyini müşahidə edirik. Azərbaycanın tarixi zəfəri nədənsə İranı narahat edir. İranın Azərbaycanla sərhəddə təlimlər keçirməsini, Zəngəzur dəhlizi ilə bağlı etirazlarını və s. anlamaq mümkün deyil. İran Türkiyə ilə Azərbaycanın qonşusudur. Qonşuluq əlaqələrini davam etdirməlidir. İran ağlını başına yığmalıdır. Həm Türkiyə, həm də Azərbaycanla əlaqələrini normallaşdırmalıdır. İran unutmamalıdır ki, 15 iyul “Şuşa Bəyannaməsi” ilə Türkiyə-Azərbaycan bir millət, bir dövlətə çevrilib. “Şuşa Bəyannaməsi” bizə böyük güc verir. Azərbaycan səfirliyinə edilən hücum Türkiyəyə hücum kimi qəbul edilir, yaxud əksinə. Prezident səviyyəsində verilən açıqlamalar Azərbaycan-Türkiyə qardaşlığının bariz nümunəsidir. Azərbaycan yalnız deyil”.

Sabiq səfirin sözlərinə görə, İran sülh üçün səy göstərməlidir: “Rəsmi Tehranla problemimiz yoxdur. Amma görünür, İranın bizimlə problemi var. Hücumu edən bir nəfər deyil. Əlbəttə, arxasında dayanan şəxslər vardır. Onları da tutmaq, ortaya çıxarmaq gərəklidir. Can Azərbaycanın Tehrandakı səfirliyinə xain terror hücumunu şiddətlə və nifrətlə pisləyirəm. Yaralılara Allahdan şəfa diləyirəm, şəhidimizə Allah rəhmət etsin. Ailəsinə, Azərbaycan xalqına, millətimizə baş sağlığı verirəm!”.

Xatırladaq ki, yanvarın 27-də Bakı vaxtı ilə səhər saat 8:30 radələrində Azərbaycanın İrandakı səfirliyinə terror hücumu olub. “Kalaşnikov” markalı avtomatla silahlanan şəxs mühafizə postunu yararaq, mühafizə xidmətinin rəisi Orxan Əsgərovu qətlə yetirib. Terrorçu səfirliyin əməkdaşları tərəfindən saxlanılıb. 29 yanvar 2023-cü il tarixində Azərbaycanın İrandakı səfirliyinin əməkdaşları, onların ailə üzvləri, səfirliyimizə qarşı törədilmiş terror aktı nəticəsində yaralananlar təxliyyə edilib.

Paylaş:

Baxılıb: 532 dəfə