Qanunsuz tikililərin qarşısı alınır

Bakı:

29 °C

40 %

0 m/s

Əlaqə

AZ RU EN

Ana səhifə / Xəbər lenti / Qanunsuz tikililərin qarşısı alınır

Qanunsuz tikililərin qarşısı alınır

16.03.2023 [10:23]

Məlumatlar elektron qaydada təqdim olunacaq

Nicat Dilqəmli

Ötən gün Milli Məclisin Hüquq siyasəti və dövlət quruculuğu və İqtisadi siyasət, sənaye və sahibkarlıq komitələrinin birgə iclasında müzakirəyə çıxarılan Şəhərsalma və Tikinti Məcəlləsinə təklif olunan dəyişiklikdə əksini tapan məsələlərdən biri də dövlət vəsaitləri hesabına maliyyələşdirilən tikintilər üzrə texniki-iqtisadi əsaslandırma (və smeta) sənədlərinin hazırlanmasından ibarətdir. Dəyişikliyə əsasən, qeyd edilən sənədlər elektron formada hazırlanacaq.

Eyni zamanda, tikintiyə icazə üçün tələb olunan məlumatların şəhərsalma və tikinti fəaliyyətinin vahid informasiya təminatı sistemi vasitəsilə elektron qaydada Tikintilərin Dövlət reyestrinə ötürülməsi təmin ediləcək. Məlumatlandırma icraatı çərçivəsində təqdim olunan sənədlərin Elektron Hökumət İnformasiya Sistemi vasitəsilə əldə edilməsi imkanları yaradılacaq. Tikinti layihəsi (o cümlədən onun bölmələri) də elektron formada hazırlanacaq.

Məsələ ilə bağlı “Yeni Azərbaycan” qəzetinə danışan əmlak məsələləri üzrə mütəxəssis Ramil Qasımzadə Şəhərsalma və Tikinti Məcəlləsinə təklif olunan dəyişikliyi şərtləndirən amillərdən söz açıb. Ekspert deyir ki, hazırkı qaydaya əsasən vətəndaşlarla yanaşı, bir sıra dövlət qurumları tərəfindən də hansısa tikinti işləri aparılarkən rayon icra hakimiyyətlərinə müraciətlər olunmalı, tikinti ilə bağlı müvafiq sərəncamlar alınmalı idisə, bundan sonra qeyd edilən məsələlər artıq birbaşa olaraq Dövlət Şəhərsalma və Arxitektura Komitəsi tərəfindən nəzarətə götürüləcək: “Önəmli olan digər məqam isə gələcəkdə sənədləşmə, balansa qəbul kimi məsələlərin aidiyyəti üzrə həyata keçirilməsindən ibarətdir. Yəni, bütün sənədlər ekspertizadan keçirildikdən sonra rəylər veriləcək. Vətəndaşların həyata keçirdikləri tikintilərlə bərabər dövlət qurumlarının da maliyyəsi ilə həyata keçirilən bütün tikililər nəzarətlə həyata keçiriləcək. Həm müvafiq icazələrin verilməsi, həm tikinti yerinin müəyyən edilməsi, tikintisi aparılacaq binanın baş plana uyğunluğu, həm də təbii ki, oradakı sakinlərin gediş-gəlişinə maneə yaradıb-yaratmaması ilə bağlı bir çox məsələlər hərtərəfli şəkildə araşdırıldıqdan sonra binanın inşasının həyata keçirilməsinə müvafiq rəy veriləcəkdir”.

Ekspert diqqətə çatdırıb ki, fiziki və hüquqi şəxslər kimi dövlət qurumlarının da həyata keçirdiyi layihələr tam elektron formada qəbul olunub, baxılıb, ekspertizadan keçirildikdən sonra onların tikintisi üçün müvafiq icazələr veriləcək.

Dəyişikliyi müsbət qiymətləndirən R.Qasımzadə indiyə qədər rast gəlinən neqativ hallar barədə də danışıb: “Təbii ki, bunu zəruri edən amillər də var idi. Çünki elə dövlət qurumları var ki, inşa etdikləri binadan istifadə etmələrinə baxmayaraq, hələ də bu binalar reyestrdə qeydiyyata düşməyib, müvafiq icazələr və rəylər alınmayıb. Yəni, dövlət qurumlarının faktiki olaraq istifadəsində olan belə binalar mövcuddur. Təcrübədə bəzi dövlət qurumlarının balansında olan torpaq sahələrinin təyinatı üzrə istifadə edilməməsi, binalara artırmaların edilməsi kimi bir çox hallara da rast gəlinir. Yaxud həmin qurumlar bəzən müəyyən kadrların səhlənkarlığı ucbatından reyestrdə qeydiyyata alınmırdı. Qeyd edilən dəyişiklikdən sonra isə bu kimi hallara rast gəlinməyəcək”.

Xatırladaq ki, Qanun layihəsi qəbul ediləcəyi halda bu tələblər 2023-cü il oktyabrın 1-dən qüvvəyə minəcək.

Paylaş:

Baxılıb: 569 dəfə