Təhdid yaradan əməllərdən çəkinin!

Bakı:

31 °C

36 %

4 m/s

Əlaqə

AZ RU EN

Ana səhifə / Xəbər lenti / Təhdid yaradan əməllərdən çəkinin!

Təhdid yaradan əməllərdən çəkinin!

26.09.2023 [10:55]

DTX Qarabağın erməni əhalisinə müraciət edib

Nardar BAYRAMLI

Azərbaycan rdusunun Qarabağda həyata keçirdiyi lokal antiterror tədbirlərindən sonra dövlət strukturları tərəfindən ərazidə müvafiq tədbirlər görülür. Görülən tədbirlər sırasında mülki əhalinin təhlükəsizliyinin təmin olunması, onlara humanitar yardımların çatdırılması da diqqət mərkəzindədir.

Qeyd edək ki, sentyabrın 25-də Dövlət Təhlükəsizliyi Xidməti Azərbaycanın Qarabağ bölgəsinin erməni əhalisinə müraciət edib. Müraciətdə bildirilir ki, qanunsuz erməni silahlı dəstələrinin tam tərk-silah edilməklə döyüş mövqelərindən çıxarılmasına dair razılıq əldə olunduqdan sonra Azərbaycan Respublikasının Prezidenti İlham Əliyevin göstərişlərinə uyğun olaraq, erməni əhalinin yaşadığı ərazilərdə əmin-amanlığın, yerli sakinlərin şəxsi təhlükəsizliklərinin və sosial problemlərinin təmin edilməsi istiqamətində ardıcıl tədbirlər görülüb, qanunsuz erməni hərbi birləşmələrinin sərəncamında olan döyüş sursatları Azərbaycan Silahlı Qüvvələrinin nəzarətinə götürülüb.

“Dövlət Təhlükəsizliyi Xidməti Qarabağ bölgəsinin erməni sakinlərinə müraciət edərək, Azərbaycan Respublikasının Qarabağ iqtisadi rayonuna daxil olan rayonların ümumi inkişafına, həmçinin erməni əhalinin rifahına, sülh şəraitində Azərbaycan cəmiyyətinə reinteqrasiyasına, sosial və humanitar məsələlərinin həll edilməsinə, qanunçuluğun, sabitliyin və ictimai təhlükəsizliyin qorunmasına təhdid yaradan əməllərdən, əmlakların, sənədlərin məhv edilməsi və sair bu kimi qeyri-qanuni hərəkətlərdən çəkinməyə, qısa müddətdə onlarda olan silah-sursatı təhvil verməyə çağırır. Silahları təhvil vermiş və Azərbaycan Respublikasının müvafiq qanunvericiliyinin tələblərinə əməl edən erməni millətindən olan şəxslərin hüquq və azadlıqlarının qorunmasına tam təminat verilir”- deyə müraciətdə vurğulanıb.

Ümumiyyətlə, Azərbaycan dövlətinin Qarabağın erməni sakinləri barədə mövqeyi tamamilə aydındır. Dövlətimiz Qarabağ bölgəsinin yerli erməni sakinlərinə onların hüquq və azadlıqlarının Azərbaycanın Konstitusiyası və qanunvericilik əsasında təmin olunmasına dair zəmanət verilməsi istiqamətində qətiyyətli olduğunu bir daha təsdiqləyir. Etnik erməni sakinlər də bizim sülhsevər birgə yaşayış modelimizin bir hissəsi olmağa dəvətlidir. Eyni zamanda, Azərbaycan, bütün dövlətlərin beynəlxalq hüquq çərçivəsində digər dövlətlərin daxili işlərinə qarışmamaq, milli azlıqlara mənsub şəxslərin inteqrasiyası istiqamətində göstərilən səylərə zərbə vurmamaq və qonşu dövlətlərin ərazisində separatizmi qızışdırmamaq barədə öhdəliyi olduğunu xatırladır. Azərbaycan, bölgədə sülh, sabitlik və rifahda səmimi marağı olan bütün beynəlxalq tərəfdaşlarla konstruktiv əlaqəyə açıqdır.

Azərbaycan Hökumətinin xüsusi nümayəndəsinin erməni sakinlərlə təmasları isə bu məsələdə mühüm əhəmiyyət daşıyır. Yevlax şəhərində keçirilən görüşdə xüsusi nümayəndə Ramin Məmmədov dövlətin reinteqrasiya ilə bağlı planlarının xülasəsini təqdim edib və infrastrukturların bərpası və işləməsi ilə bağlı məsələlər müzakirə olunub. Sosial və humanitar məsələlərin müzakirəsi kontekstində və erməni sakinlərin müraciəti əsasında uşaq bağçaları və məktəblər, xəstəxanalar və digər fövqəladə xidmətlər sahəsində sosial obyektlərin çalışması üçün yanacağın çatdırılması, eləcə də digər humanitar dəstək tədbirlərinin görülməsi yönündə artıq müvafiq addımlar atılmaqdadır. Halbuki indiyədək belə görüşlərin keçirilməsi Azərbaycanın suveren ərazisində ağır silahlanmış qanunsuz hərbi mövcudiyyətə arxalanan erməni tərəfinin əngəlləri səbəbindən mümkün olmamışdı.

Bəli, dövlətimiz öz xoş niyyətini ifadə edərək erməni sakinlərə reinteqrasiya təklif edib. Qeyd etdiyimiz kimi, müvafiq strukturlar həmin ərazilərdə zəruri addımları həyata keçirirlər. Öz növbəsində, erməni sakinlərdə dövlət strukturlarının çağırışlarına adekvat verməlidirlər. Bu baxımdan, DTX-nn müraciətində qeyd olunduğu kimi, erməni sakinlər hər hansı təxribatçı hərəkətlərdən çəkinməli, qanunsuz silahları təhvil verməlidir. Çünki bölgədə normal yaşayışın təmin olunması üçün sabitlik mühüm şərtdir. Əks halda, dövlətimizin müvafiq strukturları tərəfindən qanun çərçivəsində zəruri addımlar bundan sonra da atılacaq.

Paylaş:

Baxılıb: 534 dəfə