15 İyun – Tarixi Qələbəyə Aparan Yol

Bakı:

27 °C

39 %

4 m/s

Əlaqə

AZ RU EN

Ana səhifə / Arxiv / 15 İyun – Tarixi Qələbəyə Aparan Yol

15 İyun – Tarixi Qələbəyə Aparan Yol

12.06.2026 [14:38]

Əmir Babayev

YAP Şərur rayon təşkilatının sədri

Azərbaycan xalqının müasir tarixində mühüm yer tutan 15 İyun – Milli Qurtuluş Günü dövlət müstəqilliyimizin qorunmasının, milli birliyin təmin edilməsinin və ölkəmizin gələcək inkişafının əsasını qoyan taleyüklü bir tarixdir. Bu gün Azərbaycan dövlətçiliyinin xilas edildiyi, xalqın gələcəyinə ümidlə baxmağa başladığı və sonrakı böyük qələbələrə aparan yolun təməlinin atıldığı gün kimi tarixə həkk olunmuşdur.

XX əsrin sonlarında yenidən müstəqilliyini bərpa edən Azərbaycan Respublikası ciddi siyasi, iqtisadi və hərbi problemlərlə üz-üzə qalmışdı. Ölkədə hakimiyyət böhranı hökm sürür, iqtisadiyyat tənəzzülə uğrayır, Ermənistanın hərbi təcavüzü nəticəsində torpaqlarımız işğal edilir, daxildə isə separatçılıq və qarşıdurmalar güclənirdi. Dövlət müstəqilliyinin itirilməsi təhlükəsi getdikcə daha real xarakter alırdı. Belə mürəkkəb və həlledici bir zamanda xalqın təkidli tələbi ilə ümummilli lider Heydər Əliyev yenidən siyasi hakimiyyətə qayıtdı.

1993-cü il iyunun 15-də Heydər Əliyevin Azərbaycan Ali Sovetinin sədri seçilməsi ölkənin həyatında yeni bir mərhələnin başlanğıcı oldu. Bu hadisə Azərbaycan dövlətçiliyinin xilası, sabitliyin bərpası və inkişaf strategiyasının müəyyənləşdirilməsi baxımından dönüş nöqtəsinə çevrildi. Məhz buna görə də həmin tarix sonralar Milli Qurtuluş Günü elan edildi.

Heydər Əliyevin hakimiyyətə qayıdışından sonra ölkədə siyasi sabitliyin təmin olunması istiqamətində mühüm addımlar atıldı. Qanunsuz silahlı dəstələrin fəaliyyəti məhdudlaşdırıldı, dövlət idarəçiliyi gücləndirildi, hüquqi və demokratik dövlət quruculuğu prosesinə başlanıldı. Cəmiyyət daxilində birlik və həmrəylik möhkəmləndirildi. Azərbaycanın müstəqil dövlət kimi mövcudluğunu təhlükə altına alan amillər aradan qaldırıldı və ölkə inkişaf yoluna qədəm qoydu.

Milli Qurtuluşdan sonra Azərbaycanın iqtisadi dirçəlişi üçün də möhkəm zəmin yaradıldı. Xarici investisiyaların cəlb olunması, beynəlxalq iqtisadi əlaqələrin genişləndirilməsi və strateji layihələrin həyata keçirilməsi nəticəsində ölkə iqtisadiyyatında canlanma baş verdi. Xüsusilə enerji siyasətinin uğurla həyata keçirilməsi Azərbaycanın dünya miqyasında etibarlı tərəfdaş kimi tanınmasına səbəb oldu. Bu siyasət sonradan ölkənin iqtisadi qüdrətinin artmasına və sosial rifahın yüksəlməsinə böyük töhfə verdi.

15 İyun həm də Azərbaycanın müasir dövlətçilik tarixinin başlanğıcı hesab olunur. Ümummilli Lider tərəfindən müəyyən edilmiş inkişaf strategiyası nəticəsində güclü ordu quruculuğuna xüsusi diqqət yetirildi. Azərbaycanın hərbi potensialı ilbəil artırıldı, Silahlı Qüvvələr müasir standartlara uyğun şəkildə formalaşdırıldı. Bu siyasətin nəticəsi olaraq Azərbaycan regionun ən güclü dövlətlərindən birinə çevrildi.

Tarix göstərdi ki, 15 İyun yalnız bir qurtuluş günü deyil, həm də gələcək zəfərlərin başlanğıcı idi. Milli Qurtuluşdan sonra yaradılan siyasi sabitlik, iqtisadi güc və hərbi potensial sonrakı illərdə ölkəmizin ən böyük məqsədinə – ərazi bütövlüyünün bərpasına xidmət etdi. Azərbaycan Prezidenti, Müzəffər Ali Baş Komandan İlham Əliyev tərəfindən uğurla davam etdirilən siyasət nəticəsində Azərbaycan 2020-ci ildə 44 günlük Vətən müharibəsində tarixi Qələbə qazandı. Bu Qələbə uzun illər ərzində həyata keçirilən məqsədyönlü dövlət siyasətinin məntiqi nəticəsi oldu.

Bu gün işğaldan azad edilmiş torpaqlarda genişmiqyaslı bərpa və yenidənqurma işlərinin aparılması, Azərbaycan Bayrağının Qarabağda və Şərqi Zəngəzurda qürurla dalğalanması Milli Qurtuluş ideyalarının təntənəsidir. Vaxtilə dağılmaq təhlükəsi ilə üzləşən Azərbaycan bu gün güclü iqtisadiyyata, qüdrətli orduya və yüksək beynəlxalq nüfuza malik müstəqil dövlətdir.

15 İyun – Milli Qurtuluş Günü Azərbaycan xalqının birlik, həmrəylik və dövlətçilik iradəsinin təcəssümüdür. Bu gün bir daha sübut edir ki, güclü liderlik, milli birlik və xalqın öz dövlətinə sədaqəti ən çətin sınaqlardan belə uğurla çıxmağa imkan verir. Məhz buna görə də 15 İyun Azərbaycan tarixində tarixi qələbəyə aparan yolun başlanğıcı, müstəqilliyimizin xilası və dövlətçiliyimizin yenidən yüksəlişi kimi böyük ehtiramla qeyd olunur. Azərbaycanın bu gün əldə etdiyi bütün uğurların təməlində məhz 1993-cü il 15 İyun tarixində başlanmış Milli Qurtuluş yolu dayanır.

Paylaş:

Baxılıb: 173 dəfə