Milli Mətbuat Günü – Azərbaycan jurnalistikasının şərəfli inkişaf yolu və müasir media çağırışları

Bakı:

28 °C

45 %

4 m/s

Əlaqə

AZ RU EN

Ana səhifə / Arxiv / Milli Mətbuat Günü – Azərbaycan jurnalistikasının şərəfli inkişaf yolu və müasir media çağırışları

Milli Mətbuat Günü – Azərbaycan jurnalistikasının şərəfli inkişaf yolu və müasir media çağırışları

21.07.2026 [14:44]

Hər il iyulun 22-si Azərbaycanda Milli Mətbuat Günü kimi qeyd edilir. Bu əlamətdar tarix Azərbaycan milli mətbuatının banisi, görkəmli maarifçi və ictimai xadim Həsən bəy Zərdabinin təşəbbüsü ilə 1875-ci il iyulun 22-də nəşr olunan “Əkinçi” qəzetinin işıq üzü görməsi ilə bağlıdır. “Əkinçi” qəzeti cəmi iki il fəaliyyət göstərməsinə baxmayaraq, Azərbaycan milli jurnalistikasının təməlini qoymuş, xalqın milli şüurunun formalaşmasına, maariflənməsinə və ictimai-siyasi düşüncəsinin inkişafına mühüm töhfələr vermişdir.

Milli mətbuatın yaranması Azərbaycan xalqının milli oyanış prosesinin mühüm mərhələsi olmuşdur. Həsən bəy Zərdabi mətbuatı yalnız informasiya vasitəsi kimi deyil, həm də xalqın tərəqqisi, elm və təhsilin inkişafı üçün mühüm tribuna hesab edirdi. Onun ideyaları sonrakı dövrlərdə milli mətbuatın inkişaf istiqamətlərini müəyyən etmiş, Azərbaycan ziyalılarının yetişməsində mühüm rol oynamışdır.

Azərbaycan mətbuatı tarix boyu mürəkkəb və şərəfli inkişaf yolu keçmişdir. XIX əsrin sonu və XX əsrin əvvəllərində fəaliyyət göstərən “Şərqi-Rus”, “Həyat”, “İrşad”, “Füyuzat”, “Molla Nəsrəddin” kimi mətbuat orqanları cəmiyyətin maariflənməsi, milli-mənəvi dəyərlərin qorunması və milli azadlıq ideyalarının formalaşmasında mühüm rol oynamışdır. Xüsusilə “Molla Nəsrəddin” jurnalının fəaliyyəti Azərbaycan ictimai fikrinin inkişafında yeni mərhələnin başlanğıcı olmuşdur.

Müstəqillik illərində Azərbaycan mətbuatı keyfiyyətcə yeni inkişaf mərhələsinə qədəm qoymuşdur. Dövlət müstəqilliyinin bərpasından sonra ölkədə demokratik institutların formalaşdırılması və söz azadlığının təmin edilməsi istiqamətində mühüm addımlar atılmışdır. Ümummilli Lider Heydər Əliyevin rəhbərliyi ilə həyata keçirilən islahatlar nəticəsində mətbuatın sərbəst fəaliyyəti üçün geniş imkanlar yaradılmışdır.

1998-ci ildə Azərbaycanda senzuranın ləğv edilməsi milli mətbuat tarixində mühüm dönüş nöqtəsi olmuşdur. Bu qərar ölkədə söz və fikir azadlığının inkişafına, demokratik prinsiplərin möhkəmlənməsinə və medianın müstəqil fəaliyyətinin təmin edilməsinə böyük təkan vermişdir. Ulu Öndər Heydər Əliyevin “Mətbuatın inkişafı dövlətin inkişafının ayrılmaz hissəsidir” fikri bu sahəyə göstərilən yüksək diqqətin bariz nümunəsidir.

Bu gün Prezident İlham Əliyevin rəhbərliyi ilə Azərbaycanda media siyasəti yeni mərhələyə qədəm qoymuşdur. Müasir dövrün çağırışlarına uyğun olaraq informasiya təhlükəsizliyinin təmin olunması, rəqəmsal medianın inkişafı, jurnalistlərin peşəkarlığının artırılması və media subyektlərinin iqtisadi dayanıqlığının gücləndirilməsi istiqamətində mühüm islahatlar həyata keçirilir.

Medianın İnkişafı Agentliyinin yaradılması, jurnalistlərin sosial rifahının yaxşılaşdırılması, media qanunvericiliyinin təkmilləşdirilməsi və müasir informasiya texnologiyalarının tətbiqi milli mətbuatın inkişafına yeni imkanlar açmışdır. Bu tədbirlər Azərbaycan mediasının beynəlxalq rəqabət qabiliyyətinin artırılmasına və milli informasiya məkanının gücləndirilməsinə xidmət edir.

Müasir dövrdə informasiya müharibələri dövlətlərin milli təhlükəsizlik məsələlərinin mühüm tərkib hissəsinə çevrilmişdir. Xüsusilə sosial media və rəqəmsal platformaların sürətli inkişafı informasiya məkanında yeni çağırışlar formalaşdırmışdır. Dezinformasiya, saxta xəbərlər və məqsədli təbliğat kampaniyaları ilə mübarizə medianın qarşısında duran əsas vəzifələrdən biridir.

44 günlük Vətən müharibəsi zamanı Azərbaycan mediası informasiya cəbhəsində yüksək peşəkarlıq nümayiş etdirmişdir. Jurnalistlər operativ və obyektiv məlumatlar təqdim etməklə Azərbaycanın haqq səsini dünya ictimaiyyətinə çatdırmış, erməni təbliğatının ifşasında mühüm rol oynamışlar. Prezident İlham Əliyevin beynəlxalq media nümayəndələrinə verdiyi çoxsaylı müsahibələr və Azərbaycan jurnalistlərinin fəaliyyəti nəticəsində ölkəmizin ədalətli mövqeyi dünya ictimaiyyətinə geniş şəkildə çatdırılmışdır.

Postmüharibə dövründə Azərbaycan mediasının qarşısında yeni vəzifələr dayanır. İşğaldan azad olunmuş ərazilərdə həyata keçirilən bərpa və quruculuq işlərinin, Böyük Qayıdış proqramının, regionda formalaşan yeni reallıqların və Azərbaycanın beynəlxalq nüfuzunun daha da artmasının operativ şəkildə işıqlandırılması mühüm əhəmiyyət kəsb edir.

Bu gün Azərbaycan mətbuatı zəngin tarixi ənənələrə söykənərək müasir inkişaf mərhələsini yaşayır. Milli maraqlara sadiqlik, obyektivlik, peşəkarlıq və dövlətçilik prinsipləri jurnalistikanın əsas fəaliyyət istiqamətləri olaraq qalır. Güclü və peşəkar media cəmiyyətin inkişafının, milli həmrəyliyin və dövlətin informasiya təhlükəsizliyinin mühüm təminatlarından biridir.

22 İyul – Milli Mətbuat Günü münasibətilə bütün jurnalistləri, media nümayəndələrini və qələm sahiblərini səmimi qəlbdən təbrik edir, onlara möhkəm cansağlığı, yaradıcılıq uğurları və peşə fəaliyyətlərində yeni nailiyyətlər arzulayırıq. Əminik ki, Azərbaycan mətbuatı gələcəkdə də milli dövlətçilik maraqlarının qorunmasına, cəmiyyətin maariflənməsinə və ölkəmizin inkişafına layiqli töhfələr verməyə davam edəcəkdir.

Elnur Qəhrəmanov,

YAP Gədəbəy rayon təşkilatının əməkdaşı

Paylaş:

Baxılıb: 60 dəfə