Çoxşaxəli islahatlar Azərbaycanın yüksəlişinə xidmət edir

Bakı:

30 °C

39 %

4 m/s

Əlaqə

AZ RU EN

Ana səhifə / Arxiv / Çoxşaxəli islahatlar Azərbaycanın yüksəlişinə xidmət edir

Çoxşaxəli islahatlar Azərbaycanın yüksəlişinə xidmət edir

09.09.2026 [15:47]

Sentyabrın 9-da Yeni Azərbaycan Partiyası (YAP) Xəzər rayon təşkilatının XIII konfransı keçirilib.

Əvvəlcə xalqımızın Ümummilli Lideri Heydər Əliyevin büstü ziyarət olunub, önünə gül dəstələri düzülüb.

Tədbirdə Ulu Öndər Heydər Əliyevin, ölkəmizin ərazi bütövlüyü və suverenliyi uğrunda canlarından keçmiş şəhidlərin xatirəsi bir dəqiqəlik sükutla anılıb. Azərbaycan Respublikasının Dövlət Himni səsləndirilib.

Konfransda hesabat məruzəsi ilə çıxış edən YAP Xəzər rayon təşkilatının sədri Namiq Əhmədov bildirib ki, partiyanın VII qurultayından ötən müddət ərzində ərazi partiya təşkilatlarında fəaliyyətin gücləndirilməsi, üzvlərlə işin təkmilləşdirilməsi, partiya sıralarının genişləndirilməsi və ictimai-siyasi tədbirlərin keçirilməsi istiqamətində ardıcıl iş aparılıb. Bildirilib ki, YAP Xəzər rayon təşkilatı bundan sonra da qarşıya qoyulan vəzifələrin icrasını təmin etmək üçün fəaliyyətini sistemli şəkildə davam etdirəcək.

N.Əhmədov vurğulayıb ki, Prezident, Yeni Azərbaycan Partiyasının Sədri İlham Əliyevin rəhbərliyi ilə həyata keçirilən uğurlu siyasət Azərbaycanın hərtərəfli inkişafını təmin edib, ölkəmizin ərazi bütövlüyünün və suverenliyinin tam bərpa olunması isə xalqımızın çoxəsrlik tarixinin ən mühüm hadisələrindən biri kimi yadda qalıb. Onun sözlərinə görə, bu gün ölkəmizdə davamlı islahatlar həyata keçirilir və bu, Azərbaycanın yüksəlişinə xidmət edir.

Çıxış edən Xəzər Rayon İcra Hakimiyyətinin başçısı Elşən Salahov Yeni Azərbaycan Partiyasının ölkənin ictimai-siyasi həyatında mühüm rolundan danışıb. O, YAP Xəzər rayon təşkilatının rayonun ictimai həyatında fəal iştirak etdiyini, həyata keçirilən sosial və ictimai təşəbbüslərin əhəmiyyətini qeyd edib. E.Salahov təşkilatın şəhid ailələri, qazilər və digər həssas sosial qruplarla bağlı gördüyü işlərin təqdirəlayiq olduğunu deyib və qarşıdakı dövrdə də əməkdaşlığın uğurla davam etdirilməsinin vacibliyini vurğulayıb.

YAP İdarə Heyətinin üzvü Rauf Əliyev çıxışında Ümummilli Lider Heydər Əliyevin müəyyən etdiyi siyasi kursun Prezident İlham Əliyev tərəfindən uğurla davam etdirildiyini bildirib. O, Azərbaycanın son illərdə əldə etdiyi mühüm siyasi, iqtisadi və hərbi nailiyyətlərə toxunaraq Vətən müharibəsində qazanılan tarixi Zəfərin və ölkəmizin ərazi bütövlüyünün bərpasının xüsusi əhəmiyyət daşıdığını qeyd edib. R.Əliyev YAP-ın yerli təşkilatlarının qarşısında duran əsas vəzifələrdən, partiya üzvlərinin fəallığının artırılmasının və vətəndaşlarla əlaqələrin daha da gücləndirilməsinin vacibliyindən danışıb.

YAP Mərkəzi Aparatının Təşkilat şöbəsinin müdir müavini Rəfael Gülməmmədov isə çıxışında yerli təşkilatların partiyanın fəaliyyətində mühüm rol oynadığını qeyd edib. O, ərazi partiya təşkilatlarında işin düzgün və sistemli qurulmasının, partiya üzvləri ilə əlaqələrin möhkəmləndirilməsinin, təşkilati intizamın və hesabatlılığın gücləndirilməsinin vacibliyini bildirib.

Daha sonra Əfqan Əliyev adına 125 nömrəli tam orta ümumtəhsil məktəbin direktoru, Məmməd Səid Ordubadi küçəsi 7 ərazi partiya təşkilatının sədri Zeynəb Əliyeva, Milli Məclis sədrinin birinci müavininin köməkçisi İsgəndər-Zadə Mustafayev çıxış ediblər.

Konfransda təşkilatın hesabat dövründəki fəaliyyəti qənaətbəxş hesab edilib və YAP-ın VIII Qurultayına nümayəndələr seçilib.

Tədbirin sonunda Yeni Azərbaycan Partiyasının himni səsləndirilib.

Paylaş:

Baxılıb: 323 dəfə