ÜST: Əlcəklər əllərin gigiyenasını əvəz etmir

Bakı:

19 °C

82 %

4 m/s

Əlaqə

AZ RU EN

Ana səhifə / Dünya / ÜST: Əlcəklər əllərin gigiyenasını əvəz etmir

ÜST: Əlcəklər əllərin gigiyenasını əvəz etmir

05.05.2025 [19:57]

Əlin gigiyenası infeksiyaların ötürülməsinin qarşısını almaq, habelə keyfiyyətli, təmiz və təhlükəsiz tibbi xidmət göstərmək üçün istifadə edə bildiyimiz ən effektiv, əlçatan və universal vasitələrdən biridir.

Tibbi əlcəklər, məsələn, qan və bioloji mayelərlə təmas riski olduqda infeksiyanın yayılmasının qarşısını almaqda mühüm rol oynasa da, onlar əllərin vaxtında yuyulmasını əvəz etmir.

AZƏRTAC Ümumdünya Səhiyyə Təşkilatının (ÜST) saytına istinadla xəbər verir ki, mayən 5-də qeyd edilən Ümumdünya Əl Gigiyenası Günündə təşkilat hökumətləri, tibb müəssisələrini və orta tibb işçilərini dünyada əl gigiyenası təcrübəsini gücləndirməyə çağırıb.

ÜST-nin ümumdünya səhiyyə xidmətlərinə çıxış üzrə baş direktorunun köməkçisi Bryus Eylvardın sözlərinə görə, tibbi əlcəklər infeksiyaya yoluxma riskini azalda bilər, lakin onlar heç vaxt əl gigiyenasını əvəz etmir: “Gəlin, Ümumdünya Əl Gigiyenası Günündə tibbi müəssisələrdə pasiyentlərin və tibb işçilərinin təhlükəsizliyini təmin etmək üçün əl gigiyenasının yaxşılaşdırılması istiqamətində öhdəliklərimizi və fəaliyyətimizi ikiqat artıraq".

Əl gigiyenasına yatırılan hər 1 dollar 24,6 dollara qədər iqtisadi fayda verə bilər. Buna baxmayaraq, hər 5 tibbi müəssisədən 2-də hələ də tibbi yardım göstərilən yerlərdə əsas gigiyena xidmətləri mövcud deyil ki, bu da 3,4 milyard insanı risk altına atır. Əlcəklərdən düzgün istifadə edilməməsi yalnız infeksiyaların qarşısının alınması və onlara nəzarət təcrübəsini zəiflətmir, həm də səhiyyə sahəsində tullantıların miqdarını əhəmiyyətli dərəcədə artırır. Əgər əl gigiyenasına düzgün riayət olunsa və əlcəklər yalnız zərurət olduqda istifadə edilsə, bu tullantıların böyük hissəsinin qarşısını almaq olar”, — deyə ÜST-nin bəyanatında qeyd olunur.

Əlcəklər də əllər kimi çirklənə bilər və əksər hallarda düzgün istifadə olunmur. Məsələn, tibb işçiləri onları bir pasiyentdən digərinə keçərkən və ya eyni pasiyentə bir neçə prosedur tətbiq edərkən uzun müddət çıxarmadan geyinirlər. Bundan başqa, əlcəklərin həddindən artıq istifadəsi ətraf mühitə mənfi təsir göstərir.

ÜST siyasətçiləri və tibb ictimaiyyətini tibb müəssisələrində əlcəklərdən məqsədəuyğun istifadəni və əl gigiyenasını yaxşılaşdırmaq üçün aşağıdakı addımları atmağa çağırır:

• 2024–2030-cu illər ərzində infeksiyalarla mübarizə və profilaktika üzrə monitorinq çərçivəsində Qlobal Fəaliyyət Planına uyğun olaraq 2026-cı ilədək əl gigiyenasına riayət olunmasını milli səhiyyə sisteminin fəaliyyət göstəricisi kimi müəyyən etmək;

• ÜST-nin əllərin gigiyenası üzrə rəhbərliyi ilə bu sahədə milli səyləri razılaşdırmaq;

• Tibb işçilərinə əlcəklərdən düzgün istifadə və ÜST-nin “Əl gigiyenası üçün 5 əsas an” rəhbərliyinə əsasən təlim keçmək;

• Səhiyyə tullantılarını azaltmaq üçün artıq əlcək istifadəsini minimuma endirmək və fokuslanmaq; tibbi yardım göstərilən yerlərdə əl gigiyenasının təmin olunması məqsədilə lazım olan resursları təmin etmək;

• Keyfiyyətli əlcəklərin kifayət qədər əlçatan olmasını təmin etməklə onlardan sui-istifadənin qarşısını almaq.

Paylaş:

Baxılıb: 421 dəfə