Ermənistan vətəndaşları konstitusiya dəyişikliklərinə qarşı etiraz aksiyaları keçirirlər

Bakı:

10 °C

87 %

7 m/s

Əlaqə

AZ RU EN

Ana səhifə / Dünya / Ermənistan vətəndaşları konstitusiya dəyişikliklərinə qarşı etiraz aksiyaları keçirirlər

Ermənistan vətəndaşları konstitusiya dəyişikliklərinə qarşı etiraz aksiyaları keçirirlər

06.10.2015 [10:05]

Ekspertlər isə hesab edirlər ki, “konstitusiya islahatları” cinayətkar rejimin ömrünü uzatmağa xidmət edir
Məlum olduğu kimi, Ermənistan dərin sosial-iqtisadi böhran içərisindədir. Bu ölkənin belə bir acınacaqlı duruma düşməsi isə, ilk növbədə, onun işğalçılıq siyasəti ilə bağlıdır. Azərbaycanın torpaqlarının 20 faizini işğal altında saxlaması Ermənistanın iqtisadiyyatını tamamilə tənəzzülə uğradıb. İqtisadi tənəzzül isə əhalinin sosial durumunun ağırlaşmasında birbaşa rol oynayır. Bu da işğalçı ölkə əhalisinin səbrini daşırmaqdadır. Məhz bu səbəbdəndir ki, Ermənistanda vətəndaşlar kütləvi etiraz aksiyalarına başlayıblar. Paytaxt Yerevanda və digər bölgələrdə etiraz aksiyalarının böyük vüsət alması bu reallığı bir daha təsdiqləyir.
Erməni ekspertlər isə siyasi gərginliyin daha da kəskinləşərək vətəndaş müharibəsi həddinə çatacağını bəyan edirlər. Qeyd edilir ki, mövcud problemlər bu ölkədə sosial inqilab çağırışlarını aktuallaşdırır və siyasi kataklizmləri şiddətləndirir. Məhz bu, Ermənistanın gələcəyini sual altına alan başlıca faktorlardandır.
Hazırda isə Ermənistan hakimiyyəti konstitusiya dəyişiklikləri ilə bağlı referendum keçirməyə hazırlaşır. Ölkədə bu dəyişikliklər ciddi etirazla qarşılanır. Gümrüdə konstitusiya islahatlarına qarşı keçirilən etiraz aksiyası işğalçı ölkədə ciddi rezonans yaradıb.
Hərəkatın növbəti mitinqi oktyabrın 2-də paytaxt Yerevanın “Azadlıq” meydanında keçirilib. Vətəndaş cəmiyyəti və müxalifətdə olan siyasi partiyaların nümayəndələri aksiyada çıxış edərkən hakimiyyətin konstitusiyada düzəliş etmək planını kəskin tənqid edib və əhalini ona “yox” deməyə çağırıblar. Deputat Zauri Postancyan hər kəsi konstitusiya islahatlarına qarşı çıxmağa və Serj Sarkisyan hökumətinin istefasını tələb etməyə səsləyib. “Ermənistan Milli Konqresi” partiyasının sədri Levon Ter-Petrosyan isə sözügedən islahatların dəyişiklik deyil, dövlətçiliyə zidd olan yeni konstitusiya olduğunu bildirib. “İrs “partiyasının sədr müavini Armen Martirosyan, “Erməni Milli Konqresi”nin parlamentdəki deputatı Aram Manukyan və digər çıxış edənlər bir daha bildiriblər ki, mövcud rejim bu dəyişiklikləri öz hakimiyyəti naminə edir. Erməni politoloqları da yeni konstitusiyanın qəbulu ilə ölkədə insan hüquqlarının məhdudlaşacağını deyirlər.
Onu da bildirək ki, Avropada geniş oxucu kütləsinə malik “Eureporter” jurnalında isə işğalçı ölkədə insan hüquqlarının pozulması halları tənqid olunub. Jurnal yazır ki, Ermənistanda bütün sahələrdə yaşanan böhran kütləvi narazılıqları artırıb: “Artıq 4-cü aydır ki, paytaxt Yerevanda hər gün etiraz aksiyası keçirilir. Nümayişlərin dalğası getdikcə genişlənir. Hökumət mitinqləri zor gücünə dağıtmağa çalışsa da, fəallar və siyasi qüvvələr geri çəkilmirlər. Etirazçılara qarşı zorakılıq “Sərhədsiz İnsan Hüquqları” təşkilatının Ermənistanda insan hüquqlarının pozulması ilə bağlı hesabatında da yer alıb”.
Qeyd edilir ki, müstəqil məhkəmə hakimiyyətinin olmaması ölkədə insan hüquqlarının ümumi vəziyyətinin pisləşməsinin nümunələrindən biridir. Avropa İttifaqı Ermənistan hakimiyyətini baş verən hadisələrə səssiz qalmamağa, problemlərin aradan qaldırılması üçün tədbirlər görməyə çağırıb. Təhlükəli faktlar Ermənistanın insan hüquqları üzrə ombudsmanı, həmçinin BMT və digər qurumlar tərəfindən qeydə alınıb.
Nardar BAYRAMLI

Paylaş:

Baxılıb: 1224 dəfə