Ermənistanda siyasi qarşıdurma yeni mərhələyə qədəm qoyub

Bakı:

23 °C

94 %

3 m/s

Əlaqə

AZ RU EN

Ana səhifə / Dünya / Ermənistanda siyasi qarşıdurma yeni mərhələyə qədəm qoyub

Ermənistanda siyasi qarşıdurma yeni mərhələyə qədəm qoyub

28.05.2021 [10:06]

Məğlub Ermənistandakı siyasi qarşıdurma növbədənkənar parlament seçkilərinin vaxtının elan olunmasından sonra bir qədər fərqli məcraya yönəlib. Lakin 26 mayda seçkidə iştirak etmək istəyən partiya və blokların seçki komissiyasına müraciətindən sonra məğlub ölkədə hakimiyyət böhranının yeni mərhələyə qədəm qoyması müşahidə edilir. Erməni mediası yazır ki, partiyaların və blokların seçki siyahılarını elan etməsi siyasi qüvvələrin daxilində yeni narazılıqlara səbəb olub.
Qeyd edək ki, artıq seçki siyahılarını Mərkəzi Seçki Komissiyasına (MSK) təqdim edən partiya və blokların adları da bəllidir. Onların adlarını təqdim edən “Novosti-Armeniya” agentliyinin məlumatına görə, ümumilikdə, 23 partiya və 4 blok daxil olmaqla 27 siyasi qüvvə siyahılarını MSK-ya təqdim edib. Seçkiqabağı ittifaqlar arasında “Yüksələn Ermənistan” partiyası və “Daşnaksütyun” erməni inqilabi federasyası ilə ittifaqdan yaranan “Ermənistan” bloku, “Azad vətən” bloku, Respublikaçı və “Vətən” partiyalarının “Şərəfim var” bloku, “Demokratlar ittifaqı” - Şirinyan-Babacanyan blokunu göstərmək olar.
Təkbaşına seçkiyə qatılan partiyalara gəlincə, məlumatda qeyd edilir ki, onların arasında baş nazir vəzifəsini icra edən Nikol Paşinyanın rəhbərlik etdiyi “Vətəndaş müqaviləsi”, habelə Edmon Marukyanın “Maariflənən Ermənistan”, Qagik Çarukyanın “Çiçəklənən Ermənistan”, Aram Sarkisyanın “Respublika”, Levon Ter-Petrosyanın “Erməni milli konqresi”, sabiq baş nazir Hrant Baqratyanın “Azadlıq” partiyaları və digərləri var. Agentliyin yaydığı digər xəbərə görə, MSK tərəfindən müəyyən olunmuş qrafikə uyğun olaraq, seçkilərdə iştirak edən partiyaların və partiya bloklarının seçki siyahılarının qeydiyyatı mayın 31-dək aparılacaq.
“Aysor.am” yazır ki, artıq seçkilərdə əsas siyasi rəqabətin gedəcəyi güman edilən “Ermənistan” ittifaqı, “Şərəfim var” bloklarının və “Vətəndaş müqaviləsi” partiyasının seçki siyahılarında yer alan əksər namizədlərin adları mətbuata sızıb. Məsələn, hakim partiyanın siyahısında olan ilk 30 nəfərin adı açıqlanıb. Ekspertlərin fikrincə, ilk sıralarda yer almayan şəxslərin narazılıqlarına görə, bəzi partiyaların və hakimiyyətin daxilində ziddiyyətlər dərinləşir.
Qeyd edək ki, Paşinyanın komandasında istefalar da davam edir. Belə ki, Ermənistan hökuməti cümə axşamı keçirilən iclasda Kotayk vilayətinin qubernatoru Mesrop Mesropyanın istefasını qəbul edib. İstefanın səbəbinə gəlincə, keçmiş qubernator öz arzusu ilə istefa etdiyini qeyd edib. Onun sözlərinə görə, vilayətdəki kadr təyinatları ilə əlaqədar fikir ayrılığına görə istefa verib.
Göründüyü kimi, Ermənistanda siyasi qarşıdurma yeni mərhələyə qədəm qoyub. Bu isə gələcəkdə məğlub ölkədə böhranın daha da dərinləşəcəyindən xəbər verir.
Qaşqay ZİYƏDDİNOĞLU

Paylaş:

Baxılıb: 894 dəfə