Hafiz Paşayev: Ölkəmizin yeni inkişaf mərhələsinin aparıcı qüvvələri gənc, peşəkar, Vətənini sevən insanlar olacaqlar

Bakı:

26 °C

70 %

2 m/s

AZ RU EN

Ana səhifə / Elm / Hafiz Paşayev: Ölkəmizin yeni inkişaf mərhələsinin aparıcı qüvvələri gənc, peşəkar, Vətənini sevən insanlar olacaqlar

Hafiz Paşayev: Ölkəmizin yeni inkişaf mərhələsinin aparıcı qüvvələri gənc, peşəkar, Vətənini sevən insanlar olacaqlar

19.09.2017 [10:13]

“ADA” Universiteti yeni tədris ilində ənənəvi “Şərəf andiçmə mərasimi”ni keçirib. Bu ali təhsil ocağına qəbul olunan 500-dən çox bakalavr və magistr, eləcə də müəllim heyətinin yeni üzvləri universitetin Şərəf Məcəlləsini imzalayaraq sənədin akademik əxlaq və dürüstlüklə bağlı beş əsas qaydasına riayət edəcəklərinə söz veriblər. Bu qaydalar tədris prosesində və imtahan zamanı yalan danışmamaq, köçürməmək, plagiatlıq etməmək, ayrı-seçkilik salmamaq və bu müddəaları pozmaqda başqalarına yardım etməməyi nəzərdə tutur.
Tədbir zamanı “ADA”nın bayraqları marşına universitetə ilk dəfə tələbələri qəbul edilən xarici ölkələr də qoşulub. Estoniya, Filippin, Peru və Somali “ADA” Universitetində tələbə və müəllim heyəti təmsil olunan ölkələrin sayını bu il 46-ya çatdırıb.
Ötən semestrin nəticələrinə görə adları əlaçı kimi rektorun fəxri siyahısına düşən tələbələr çıxış edərək keyfiyyətli təhsil almaları üçün yaradılan şəraitə görə minnətdarlıqlarını bildiriblər. Onlar universitetə yeni qəbul olunanları biliklərə səylə yiyələnməyə, təhsildə uğurlar qazanmağa, öz hədəflərinə çatmaq üçün əzmlə çalışmağa, “ADA”nın tələbələr üçün yaratdığı hərtərəfli şəraitdən faydalanmağa çağırıblar.
AZƏRTAC xəbər verir ki, andiçmə mərasimini yekunlaşdıran xarici işlər nazirinin müavini, “ADA” Universitetinin rektoru, səfir Hafiz Paşayev birinci kursa qəbul olunmuş tələbələri təbrik edib, uğurlar arzulayıb. Rektor bildirib ki, dünyanın bütün ölkələrinin gələcəyi öz universitetlərinin uğurundan müəyyən mənada asılıdır. Çünki elm mərkəzləri təkcə innovativ tədqiqat və yeni fikirlər irəli sürmür, həm də sahəsinə böyük rəğbətlə yanaşan, fərqli düşüncə tərzi ilə çalışmağa hazır olan yüksək intellektli məzunlar buraxır. H.Paşayev vurğulayıb ki, bu həftə “Azəri-Çıraq-Günəşli” neft yatağının işlənilməsi sahəsində imzalanan yeni müqavilə ilə Azərbaycan rəhbərliyi öz xalqının rifahının 2050-ci ilədək təmin edilməsinə möhür vurmuş oldu. Rektor deyib: “Ulu öndər Heydər Əliyevin Azərbaycan xalqı qarşısında misilsiz xidmətlərindən biri olan “Əsrin müqaviləsi”nin imzalanmasından 23 il ötüb. Azərbaycan xalqı ilk müqavilənin nəticələrini bu gün bütün sahələrdə görür. “ADA” Universitetinin yaranması da məhz bu mərhələdə baş verən inkişafın nəticəsində mümkün olub. İkinci müqavilə ölkəmizin inkişafını daha da sürətləndirəcək, vətəndaşlarımızın həyat səviyyəsini daha da yüksəldəcək. Bir faktı qeyd edim ki, əgər əvvəllər xarici neft-qaz layihələrinin icrasında Azərbaycan mütəxəssislərinin sayı çox deyildisə, bu gün onlar əksəriyyət təşkil edirlər. Bu isə özlüyündə ilk müqavilənin bizə açdığı imkandır. Belə ki, neftdən gələn gəlirlərdən istifadə etməklə Azərbaycan öz insan kapitalını da artırdı, möhkəmləndirdi. Ölkəmizi irəlidə gözləyən yeni inkişaf mərhələsinin “mühərriki” məhz insan kapitalı - sizin kimi gənc, peşəkar, öz işini, xalqını və Vətənini sevən insanlar olacaqlar”.

Paylaş:

Baxılıb: 1481 dəfə