Prezident İlham Əliyev Bakının Şağan qəsəbəsində Olimpiya-İdman Kompleksinin açılışında iştirak edib

Bakı:

31 °C

48 %

3 m/s

AZ RU EN

Ana səhifə / Gündəm / Prezident İlham Əliyev Bakının Şağan qəsəbəsində Olimpiya-İdman Kompleksinin açılışında iştirak edib

Prezident İlham Əliyev Bakının Şağan qəsəbəsində Olimpiya-İdman Kompleksinin açılışında iştirak edib

26.12.2009 [10:09]

Dünən Bakının Şağan qəsəbəsində Olimpiya-İdman Kompleksinin açılışı olub. Azərbaycan Respublikasının Prezidenti İlham Əliyev mərasimdə iştirak edib. Dövlətimizin başçısı rəmzi açılışı bildirən lenti kəsib, ölkəmizdə sayca 24-cü olan Olimpiya-İdman Kompleksi ilə tanış olub. Gənclər və idman naziri Azad Rəhimov məlumat verib ki, kompleks “Bakı şəhərinin qəsəbələrinin sosial-iqtisadi inkişafının sürətləndirilməsinə dair Tədbirlər Proqramı”na əsasən inşa olunub.
Tikintisinə 2007-ci ilin noyabrında başlanmış kompleksin ümumi sahəsi 3,25 hektardır. Əsas korpus ikimərtəbəlidir. Korpusun birinci mərtəbəsində ümummilli liderimiz Heydər Əliyevin və Prezident İlham Əliyevin respublikamızda bədən tərbiyəsinin və idmanın inkişafına göstərdikləri diqqət və qayğını, idmançılarımızın müxtəlif beynəlxalq yarışlarda uğurlarını əks etdirən fotostend quraşdırılıb. Burada universal idman, güləş və trenajor zalları, hakimlər otağı, soyunub-geyinmə və digər xidmət otaqları yerləşir.
Dövlətimizin başçısı kompleksin universal idman zalı ilə tanış olub. İdmanın futbol, həndbol, voleybol, basketbol növləri ilə məşğul olmaq və yarışlar keçirmək üçün nəzərdə tutulan bu zaldakı tribunada 620 oturacaq quraşdırılıb.
İdmanın güləş, boks və digər döyüş növləri üçün nəzərdə tutulmuş zala baxan Azərbaycan Prezidentinə məlumat verilib ki, burada 615 tamaşaçı yeri quraşdırılıb. Dövlətimizin başçısı trenajor zalına da baş çəkib. Buradakı avadanlıq müasirliyi ilə diqqəti cəlb edir. İndi ölkəmizdə ənənəvi olmayan idman növlərinin inkişafı da diqqət mərkəzindədir. Azərbaycanda bədən tərbiyəsi və idmanın hərtərəfli inkişafı üçün 2009-2020-ci illəri əhatə edən milli strategiya bu baxımdan geniş imkanlar açır.
Bildirilib ki, kompleksdəki zallarda həm mini futbol, basketbol, voleybol, həm də gimnastika, boks, güləş üzrə beynəlxalq səviyyəli yarışlar keçirmək mümkündür.
Binanın ikinci mərtəbəsində yeməkxana, konfrans zalı, həkim otağı və digər xidmət bölmələri fəaliyyət göstərir. Prezident İlham Əliyev yeməkxana ilə tanış olub.
Sonra Prezident İlham Əliyev qapalı üzgüçülük hovuzunun yerləşdiyi korpusa gəlib. Burada uzunluğu 25, eni isə 12,5 metr olan hovuzun ətrafında 135 oturacaq quraşdırılıb. Korpusun inzibati hissəsi ikimərtəbəlidir. İkinci mərtəbədə məşqçi və şərhçi otaqları, şahmat otağı, həmçinin yarışları izləmək üçün lojalar var.
Dövlətimizin başçısı kompleksin ərazisində inşa olunmuş mehmanxana ilə tanış olub. İkimərtəbəli mehmanxana 25 nəfər üçün nəzərdə tutulub. Burada 12 standart və bir lüks otaq var.
Açıq havadakı idman qurğuları ilə tanış olan Prezident İlham Əliyevə məlumat verilib ki, burada tennis kortları, mini futbol və voleybol meydançaları yaradılıb. Prezident İlham Əliyev kompleksin ərazisində 1032 tamaşaçı yeri olan süni örtüklü stadiona da baxıb. Ən yüksək standartlara cavab verən stadionda idmançılar, məşqçilər və xidmət heyəti üçün hər cür şəraiti olan pavilyon var.
Şağan Olimpiya-İdman Kompleksi üçün ayrıca qazanxana, transformator yarımstansiyası, üç su anbarı tikilib, ərazidə abadlıq və yaşıllaşdırma işləri aparılıb, ağaclar və gül kolları əkilib.
Dövlətimizin başçısı kompleksdə görülən işləri yüksək qiymətləndirib, tapşırıq və tövsiyələrini verib.

Paylaş:

Baxılıb: 1442 dəfə