Dünya çempionatında ikinci turun oyunlarına start verilib

Bakı:

19 °C

72 %

2 m/s

Əlaqə

AZ RU EN

Ana səhifə / İdman / Dünya çempionatında ikinci turun oyunlarına start verilib

Dünya çempionatında ikinci turun oyunlarına start verilib

18.06.2014 [09:52]

Braziliyada keçirilən Futbol üzrə dünya çempionatında ilk turun oyunları dünən keçirilən qarşılaşmalarla tamamlanıb. Turun son görüşlərində Rusiya millisi Cənubi Koreya ilə, Belçika yığması isə Əlcəzairlə üz-üzə gəlib. Dünən həmçinin, ikinci turun ilk oyunu da baş tutub. Ev sahibi Braziliya Meksika ilə üz-üzə gəlib.
Beləliklə, məhz bu turdan sonra bəzi komandalar üçün 3-cü turda keçirəcəyi görüş əhəmiyyətini itirə bilər. Demək olar ki, ikinci oyunlardan sonra 1/8 finala vəsiqə qazanan komandaların bəziləri məlum ola bilər.
Birinci oyunlardan sonra isə əsas diqqət çəkən İspaniya və Portuqaliya yığmalarının acınacaqı məğlubiyyətləri olub. Sonuncu Avropa və dünya çempionlarının turnirin favoritləri arasında göstərilən Hollandiya qarşısında məğlub olması bir çoxları üçün sürpriz sayılmasa da, 5-1-lik ağır məğlubiyyət və ispanların sönük futbolu gözlənilməz kimi qiymətləndirilir. Eynilə, dünyanın ən yaxşı futbolçularından olan Kriştiano Ronaldonun liderlik etdiyi Portuqaliya yığmasının almanlar qarşısındakı 4-0 hesablı məğlubiyyəti də bəzi azarkeşlərə əsl “soyuq duş” effekti verib. Uruqvayın Kosta - Rika qarşısındakı 3-1 hesablı məğlubiyyəti də bəzi mütəxəssislər tərəfindən gözlənilməz nəticə kimi dəyərləndirilir.
Hər çempionatda olduğu kimi, Braziliyada da ən çox müzakirə olunan mövzulardan biri, şübhəsiz, hakimlərin meydanda qəbul etdikləri qərarlarla bağlıdır. Xüsusən, Braziliya - Xorvatiya matçında yaponiyalı hakim Yuiçi Nişimuranın görüşün 71-ci dəqiqəsində xorvatların qapısına təyin etdiyi penalti, italiyan Nikola Rizzolinin ispanlarla oyunda hollandların əleyhinə penalti qərarı, serbiyalı “ədalət keşikçisi” Milorad Maziçin Portuqaliya - Almaniya qarşılaşmasında verdiyi mübahisəli qərarlar, Kolumbiyalı hakim Vilmar Roldanın Kameronla matçda Meksikanın iki nizami qolunu qeydə almaması və s. kimi qərarlar futbol mütəxəssisləri tərəfindən ciddi şəkildə tənqid olunur. Doğrudur, FİFA Hakimlər komitəsinin sədri Massimo Busakka verilən bəzi qərarların doğru olduğunu əsaslandırmağa çalışır. Bununla belə, onun arqumentləri narazılıqların qarşısını almaqda kifayət deyil.
Çempionatın diqqət çəkən digər məqammı isə şübhəsiz, oyunlarda yüksək qol məhsuldarlığının yaşanmasıdır. 1958-ci ildən sonrakı dünya çempionatlarında ilk turun oyunları adətən sönük və məhsuldarlığın aşağı olması ilə yadda qalsa da, bu dəfə azarkeşlər kifayət qədər qol izləmək imkanı qazanıblar. Növbəti turlarda mübarizənin daha da kəskinləşəcəyini nəzərə alsaq, bizi qarşıda daha maraqlı görüşlərin gözlədiyini söyləmək mümkündür.
İlk turda bu nəticələr qeydə alınıb:
Braziliya - Xorvatiya: 3-1
Meksika - Kameron: 1-0
İspaniya - Hollandiya: 1-5
Çili - Avtraliya: 3-1
Kolumbiya - Yunanıstan: 3-0
Kot-D-İvuar - Yaponiya: 2-1
Uruqvay - Kosta -Rika: 1-3
İngiltərə - İtaliya: 1-2
İsveçrə-Ekvador: 2-1
Fransa - Honduras: 3-0
Argentina - Bosniya-Herseqovina: 2-1
İran - Nigeriya: 0-0
Almaniya - Portuqaliya: 4-0
Qana - ABŞ: 1-2
Belçika - Əlcəzair: 2-1
Bu gün keçiriləcək oyunların saatları isə belədir:
21-00. Avstraliya - Hollandiya
00-00. İspaniya - Çili
03-00. Kameron - Xorvatiya