Şəkidə Prezident Kuboku uğrunda 9-cu çövkən milli oyunları keçirilir

Bakı:

16 °C

72 %

8 m/s

Əlaqə

AZ RU EN

Ana səhifə / İdman / Şəkidə Prezident Kuboku uğrunda 9-cu çövkən milli oyunları keçirilir

Şəkidə Prezident Kuboku uğrunda 9-cu çövkən milli oyunları keçirilir

20.12.2014 [12:18]

16 şəhər və rayonun komandalarının iştirak etdiyi yarışlarda dekabrın 22-də final oyunu və iştirakçılarının mükafatlandırılması mərasimi baş tutacaq
Dekabrın 17-də Şəki rayonunun Daşüz kəndində yerləşən Respublika Atçılıq Turizm Mərkəzində artıq ənənə halını alan Prezident Kuboku uğrunda çövkən yarışlarının növbətisi - 9-cu çövkən milli oyunları üzrə yarışlar başlayıb. Mədəniyyət və Turizm Nazirliyi və Şəki şəhər İcra Hakimiyyətinin dəstəyi ilə reallaşan yarışlar dekabrın 22-nə qədər davam edəcək. Şəki rayon Mədəniyyət və Turizm Şöbəsinin müdiri Mirvari Zeynalovanın verdiyi məlumata görə, Prezident Kuboku uğrunda 9-cu çövkən milli oyunları çövkən, sürpapaq və yaylıq oyunları üzrə keçirilir. Onun sözlərinə görə, yarışlarda 16 şəhər və rayonun komandaları iştirak edir (Bakı şəhərinin “Kövsər”, “Sərhədçi”, “Polad”, Şəki, Yevlax şəhər, Ağcabədi, Ağdam, Ağstafa, Balakən, Goranboy, İsmayıllı, Qax, Qəbələ, Oğuz, Laçın və Xaçmaz rayon komandaları). Dekabrın 22-də final oyunu və yarış iştirakçılarının mükafatlandırılması mərasimi də keçiriləcək.
Çövkən oyununun Azərbaycan xalqının qədim milli oyunu olduğunu vurğulayan Mirvari Zeynalova deyib ki, ənənəvi olaraq hər il keçirilən bu yarışlar xalqımızın mədəni irsi olan milli atüstü oyunların qorunub saxlanması və təbliği məqsədi daşıyır. Xatırladaq ki, bir il əvvəl, ötən ilin dekabrında Bakıda UNESCO-nun Qeyri-Maddi Mədəni İrsin Qorunması üzrə Hökumətlərarası Komitəsinin 8-ci sessiyasında Azərbaycanın çövkən oyununun UNESCO-nun Təcili Qorunmaya Ehtiyacı Olan Qeyri-Maddi Mədəni İrs Siyahısına daxil edilməsi, heç şübhəsiz ki, ölkəmizdə mədəni irsin qorunması sahəsində həyata keçirilən tədbirlərin, aparılan məqsədyönlü işin məntiqi nəticəsidir. Onun sözlərinə görə, bu gün xalqımızın mədəni irsi olan milli atüstü oyunların qorunub saxlanılması, qədim tarixə malik atçılıq ənənələrinin bərpası, ölkəmizdə atçılıq turizminin təbliği, gənc nəsildə bu sahələrə marağın oyadılması və kütləviliyinin artırılması istiqamətində ardıcıl tədbirlər görülməkdədir. Ənənəvi olaraq Prezident Kuboku uğrunda çövkən yarışlarının keçirilməsi də buna sübutdur. Belə ki, 2005-ci ildən başlayaraq Prezident Kuboku uğrunda keçirilən turnir ənənəvi olaraq Şəkinin Daşüz kəndində yerləşən Respublika Atçılıq Turizm Mərkəzinin bazasında təşkil edilir. İndiyə kimi bu mərkəzdə Marafon - 45, Prezident Kuboku turnirləri təşkil edilib. Prezident Kuboku uğrunda çövkən milli oyunu üzrə turnirin ilk qalibi Ağstafa rayonunun komandası olub. Yeri gəlmişkən, əgər əvvəllər çövkənlə məşğul olan və yarışlarda iştirak edən cəmi 3 rayon vardısa, ötən 2 il müddətində onların sayı 13-ə çatıb. “Biz çox böyük məmnunluq hissi ilə bildiririk ki, ulu əcdadlarımızın bizə miras olaraq qoyub getdiyi mənəvi sərvətləri yaşatmaq və təbliğ etmək missiyası bizim nəslin payına düşür. Bu mənada biz üzərimizə düşən məsuliyyət hissinin böyüklüyünü və vacibliyini yaxşı dərk edir, keçmiş nəsillərdən bizə əmanət qalan milli dəyərlərimizi dirçəltməyi və onları gələcək nəsillərə daha təkmil bir formada təqdim etməyi özümüzün başlıca vəzifəsi və vətəndaşlıq borcu kimi qəbul edirik”, - deyə Mirvari Zeynalova vurğulayıb.
OKTAY

Paylaş:

Baxılıb: 1097 dəfə