“Olimpiya hərəkatı” proqramı çərçivəsində badminton üzrə Nərimanov rayon birinciliyinə yekun vurulub

Bakı:

22 °C

56 %

2 m/s

AZ RU EN

Ana səhifə / İdman / “Olimpiya hərəkatı” proqramı çərçivəsində badminton üzrə Nərimanov rayon birinciliyinə yekun vurulub

“Olimpiya hərəkatı” proqramı çərçivəsində badminton üzrə Nərimanov rayon birinciliyinə yekun vurulub

09.12.2015 [09:47]

Beynəlxalq Olimpiya Komitəsinin, Olimpiya Oyunlarının ümumdünya tərəfdaşı olan “Coca-Cola” şirkətinin, Azərbaycan Milli Olimpiya Komitəsinin (MOK), Gənclər və İdman, Təhsil nazirliklərinin birgə həyata keçirdiyi “Olimpiya hərəkatı” proqramı çərçivəsində dekabrın 8-də badminton üzrə Nərimanov rayon birinciliyi keçirilib.
AZƏRTAC xəbər verir ki, “ABU Arena”da keçirilən yarışda rayonun 22 məktəbindən 100-dən artıq qız və oğlan şəxsi və qarışıq-qoşa formatda güclərini sınayıblar.
Əvvəlcə iştirakçıların paradı olub və dövlət himni səsləndirilib.
Açılış mərasimində çıxış edən MOK-un Marketinq departamentinin rəhbəri Mehman Kərimov layihənin Bakının 350-dək orta məktəbini əhatə etdiyini vurğulayıb. Qeyd olunub ki, layihə çərçivəsində idmanın dörd növü - atletika, badminton, basketbol 3x3 və velosiped üzrə yarışlar keçirilir. Bu yarışlardan bəziləri uğurla başa çatıb. Layihənin məqsədi yeniyetmələrin asudə vaxtlarının səmərəli təşkili və onların fəal fiziki hazırlığa cəlb olunmasından ibarətdir.
Təhsil Nazirliyinin Məktəbdənkənar fəaliyyətin təşkili şöbəsinin müdiri Vasif Məmmədov, Gənclər və İdman Nazirliyinin əməkdaşı Əlşad Nəsibov layihənin əhəmiyyətini yüksək qiymətləndirib, iştirakçılara uğurlar arzulayıblar.
Olimpiya sistemi üzrə keçirilən yarışda 212 nömrəli orta məktəbin komandası birinci yeri tutub. Birincilikdə 258 nömrəli məktəb ikinci, 45 nömrəli məktəbin komandası isə üçüncü olub.
Qeyd edək ki, ilk dəfə 2003-cü ildə Niderlandda həyata keçirilən “Olimpiya hərəkatı” proqramı genişlənərək digər ölkələri əhatə edib. Azərbaycan “Olimpiya hərəkatı” proqramının icra olunduğu beşinci ölkədir. Proqramın əsas hədəf qrupu Bakının 350-dək orta ümumtəhsil məktəbində təhsil alan 12-16 yaşlı şagirdlərdir. Proqramın icrasını müvafiq idman növləri üzrə fəaliyyət göstərən milli idman federasiyaları da dəstəkləyir. Məktəbdaxili yarışlarla başlayan proqram Bakı şəhərinin rayonları üzrə birinciliklərlə davam edəcək. Proqram gələn ilin əvvəlində “Bakı-2015” ilk Avropa Oyunlarında yarışların keçirildiyi obyektlərin birində təşkil olunacaq final və idman festivalı ilə başa çatacaq.
“Olimpiya hərəkatı” proqramının xüsusi hazırlanmış “Facebook”, “Instagram” və “YouTube” səhifələrində onun icrası, həmçinin məktəblilər arasında idman, sağlam və fəal həyat tərzi təşviq edilir.

Paylaş:

Baxılıb: 1391 dəfə