Rəsul Çunayev Azərbaycan yığmasına beşinci Olimpiya medalını qazandırdı

Bakı:

7 °C

81 %

3 m/s

Əlaqə

AZ RU EN

Ana səhifə / İdman / Rəsul Çunayev Azərbaycan yığmasına beşinci Olimpiya medalını qazandırdı

Rəsul Çunayev Azərbaycan yığmasına beşinci Olimpiya medalını qazandırdı

18.08.2016 [11:24]

Onu qarşıda hələ neçə-neçə Olimpiya Oyunları və medalları gözləyir!
Avqustun 5-dən Braziliyanın ikinci ən böyük şəhəri olan Rio-de-Janeyroda start götürən XXXI Yay Olimpiya Oyunları həyəcanı davam edir. 200-dən artıq ölkənin qatıldığı bu möhtəşəm idman bayramında Azərbaycan 56 idmançı ilə iştirak edir. Yarışların 11-ci gününədək Azərbaycan milli komandası aktivlərinə 2 gümüş və 3 bürünc medal yazdırıb. Nəzərə alsaq ki, Olimpiya Oyunlarında medal qazana biləcək potensiala sahib idmançılarımızın bəziləri hələ də mübarizəyə qoşulmayıblar, onda bu nəticəni qənaətbəxş hesab etmək olar.
Qeyd etmək yerinə düşər ki, Azərbaycan milli komandasına 5-ci medalı yunan-Roma güləşi üzrə Avropa və dünya çempionu, 2015-ci ildə Bakıda keçirilən ilk Avropa Oyunlarının çempionu Rəsul Çunayev gətirib. 66 kq çəki dərəcəsində yarışan Çunayev mübarizəyə 1/16 finaldan start verib. O, ilk görüşdə kubalı Migel Palasio Martinezlə münasibətinə aydınlıq gətirib. Görüş həmyerlimiz üçün uğursuz başlasa da, Çunayev məğlubiyyətdən qaça bilib. Pəhləvanımız 0:2 hesabı ilə geridə olduğu görüşü 4:2 hesabı ilə öz xeyrinə başa vurub. Rəsulun 1/8 finalda rəqibi rusiyalı Olimpiya çempionu İslambek Albiyev olub. Bu döyüş də həmyerlimizin qələbəsi ilə yekunlaşıb. Çunayev yenə də 0:2 hesabı ilə geri düşməsinə baxmayaraq, rəqibini 3:2 hesabı ilə məğlub edib. Güləşçimiz 1/4 finalda Tarek Aziz Benaissa (Əlcəzair) ilə üz-üzə gəlib. Qarşılaşma həmyerlimizin təmiz qələbəsi ilə yekunlaşıb. Rəsul görüşün taleyini elə ilk hissədə həll edib - 10:2. Yarımfinal görüşündə ani bir diqqətsizlik təmsilçimizin məğlubiyyətinə səbəb olsa da, Azərbaycan güləş məktəbinin ən parlaq nümayəndələrindən olan Rəsulun medal qazanmaq şansı davam edib. O, bürünc medal uğrunda görüşdə Cənubi Koreyadan rəqibi Hansu Ryu ilə güləşib. 8:0 hesabı ilə qalib gələn pəhləvanımız Olimpiya Oyunlarının bürünc medalını qazanıb.
Doğrudur, yarımfinaldakı məğlubiyyətindən sonra sosial şəbəkələrdə Rəsul Çunayevin ünvanına qeyri-adekvat ifadələr işlədilib. Amma nəzərə almalıyıq ki, bu idmandır, üstəlik Olimpiya Oyunlarıdır. Burada nəinki idman ilinin qalibləri, hətta “yaxşıların ən yaxşısı” olan idmançılar yalnız lisenziya əsasında iştirak etmək hüququ qazanırlar. Hansı idmançı istəməz ki, təmsil etdiyi dövlətin bayrağını Olimpin zirvəsinə qaldırsın?! 25 yaşlı Rəsul Çunayevin də elə arzusu bu idi. O, müsahibələrində həmişə özünü Azərbaycan dövlətinin əsgəri adlandırır, bu dövlətin şərəfini hər zaman qorumağa hazır olduğunu vurğulayır. Bu günə qədər də bizə yaşatdığı böyük qələbələrlə Rəsul ölkəmizi ən yüksək səviyyədə təmsil etdiyini sübuta yetirdi. Xatırlayaq, ötən il Bakıda keçirilən ilk Avropa Oyunlarında final görüşündə qalib gələn Rəsul Çunayevin qələbəsini hərbi salamla qeyd etməsi idmansevərlərin xatirindədir. Bax bu idi əsl Vətən sevgisi! Nə qədər ki, idmançının qəlbində Vətəninə, dövlətinə, millətinə bu sevgi hissi güclüdür, o, mütləq yarışlarda qalib gələcəkdir. Rəsul Çunayevin isə cəmi 25 yaşı vardır. Demək, onu hələ qarşıda neçə-neçə Olimpiya Oyunları və medalları gözləyir!
Hər bir idmansevər inanır, hətta əmindir ki, Rəsul Çunayevin Rio-dakı məğlubiyyəti sırf texniki xarakter daşıyırdı və o qarşıdakı Olimpiya Oyunlarında mütləq bu məğlubiyyətin əvəzini çıxaraq vətənə Olimpiya qızılı ilə dönəcək. Elə buna Rəsulun özü də əmindir.
Görüşlərdən sonra mediaya açıqlamasında “Mən çoxdandır 66 kq çəki dərəcəsində çıxış etmirdim. Olimpiadaya düşmək üçün 1 çəki aşağı dərəcədə mübarizə aparmalı oldum. Bunda, əlbəttə ki, çəki azaltmağım böyük rol oynadı. Rəqiblərim çətin idi, tanıdığım rəqiblər idi - Olimpiya çempionu, dünya çempionu. Qalib gəlmək üçün gərək ki, güclünü udasan. Yalnız yarımfinal görüşündə nəsə səhvə yol verdim”, - deyən Rəsul Çunayev Rioya qızıl medal dalınca gəldiyini də gizlətməyib: “Mən Rio-ya qızıl medal üçün gəlmişdim. Lakin təəssüflər olsun ki, bunu bacarmadım. Mənə dəstək verən və verməyənlərə, hamısına minnətdarlığımı bildirirəm... Qismət olmadı. Buna baxmayaraq Vətən üçün bürünc medalı əldən vermədim”.
Odur ki, gəlin hamılıqla Rəsul Çunayevə dəstəyimizi əsirgəməyək. Onu qarşıdakı turnirlərə, Olimpiya Oyunlarına ruhlandıraq! 2020-ci ilədək, Rəsul! Sənin Tokiodan Vətənə Olimpiya qızıl medalı ilə dönəcəyinə əminik!
Səlim LOĞMANOĞLU

Paylaş:

Baxılıb: 846 dəfə