Prezidentin tapşırığı ilə...

Bakı:

22 °C

83 %

9 m/s

Əlaqə

AZ RU EN

Ana səhifə / İqtisadiyyat / Prezidentin tapşırığı ilə...

Prezidentin tapşırığı ilə...

04.03.2022 [09:51]

Hökumət üzvləri Qarabağda

Mübariz ABDULLAYEV

Respublikamızda 2030-cu ilədək olan dövrü əhatə edəcək strateji mərhələ üçün müəyyənləşdirilən beş milli prioritetdən biri 44 günlük Vətən müharibəsində işğaldan azad edilən ərazilərə Böyük Qayıdışın təmin edilməsi ilə bağlıdır. Müharibə başa çatdıqdan sonra işğaldan azad edilmiş ərazilərdə intensiv şəkildə reallaşdırılan bərpa layihələrinə istinadən deyə bilərik ki, o gün uzaqda deyil. Bərpa işləri müvafiq qurumlar tərəfindən koordinasiyalı şəkildə həyata keçirilir. Elə bu günlərdə Baş nazir Əli Əsədovun və Prezident Administrasiyasının, Azərbaycan Respublikasının işğaldan azad edilmiş ərazilərində məsələlərin mərkəzləşdirilmiş qaydada həlli məqsədilə yaradılmış Əlaqələndirmə Qərargahının rəhbəri Samir Nuriyevin başçılığı altında aidiyyəti dövlət qurumlarının rəhbər şəxslərindən ibarət nümayəndə heyəti işğaldan azad olunmuş ərazilərə səfərə gedərək burada görülən işlərlə tanış olublar.

İnfrastruktur quruculuğu

Prezident İlham Əliyevin tapşırığına uyğun olaraq bəhs olunan ərazilərdə bərpa işlərinə burada zəruri infrastrukturun yaradılması ilə start verilib. Çünki bunsuz həmin ərazilərə Böyük Qayıdışı təmin etmək mümkün deyil. İndiyədək görülən işlərin miqyası kifayət qədər böyükdür. Prezident İlham Əliyev qarşıya 2021-ci ildə işğaldan azad olunmuş ərazilərin elektrik enerjisi ilə təchizatı sisteminin tam şəkildə qurulması ilə bağlı mühüm vəzifə qoymuşdu. Bu vəzifə artıq yerinə yetirilib. 2021-ci ildə dövlət başçısının iştirakı ilə işğaldan azad olunan ərazilərdə bir neçə elektrik stansiyasının açılışı baş tutdu. Dövlət başçısı sözügedən əraziləri “yaşıl enerji” zonası elan edib. Bəhs olunan səfər çərçivəsində “Azərenerji”nin Füzulidəki elektrik stansiyasına baxış keçirilib. “Azərenerji” ASC-nin prezidenti Baba Rzayev Qarabağ və Şərqi Zəngəzur regionunun mövcud və 2022-2026-cı illər üzrə perspektiv elektrik təchizat sxemi ilə bağlı ətraflı məlumat verib.

İşğaldan azad olunan ərazilərdə zəruri infrastruktur quruculuğunun mühüm bir istiqamətini dağıdılmış yolların bərpası və yenilərinin inşası təşkil edir. Azərbaycan Avtomobil Yolları Dövlət Agentliyi (AAYDA) tərəfindən 2021-ci il ərzində ümumi uzunluğu 1516.3 km təşkil edən 15 avtomobil yolunun layihələndirilməsi və tikintisi işləri həyata keçirilib. Səfər zamanı nümayəndə heyətinin üzvləri Əhmədbəyli-Horadiz-Mincivan-Ağdərə avtomobil yolunda görülən işlərlə tanış olublar. Eyni zamanda, Horadiz-Cəbrayıl-Mincivan-Ağbənd avtomobil yolunda aparılan minatəmizləmə işlərinə baxış keçirilib.

Böyük Qayıdışın ilk məntəqəsi

İşğaldan azad olunmuş ərazilərdə yaşayış məntəqələrinin bərpası istiqamətində də layihələr uğurla icra edilir. Yaşayış məntəqələrinin bərpası “Ağıllı kənd” və “Ağıllı şəhər” konseptinə əsaslanır. İşğaldan azad olunmuş ərazilərimizdə yaşayış məntəqələrinin müasir yanaşmalar əsasında bərpası istiqamətində ilk pilot layihənin icrası Zəngilan rayonunun Ağalı kəndində reallaşdırılır. Pilot layihə Zəngilanın 1-ci, 2-ci, 3-cü Ağalı kəndlərini əhatə edir. Layihənin icrası əsasən, 5 komponent üzrə aparılır. Bunlar yaşayış, istehsal, sosial xidmətlər, “ağıllı kənd təsərrüfatı” və alternativ enerji sahələridir. Artıq Zəngilan rayonunun Ağalı kəndində ilk “Ağıllı kənd” layihəsinin icrası tamamlanmaq üzrədir. Növbəti belə pilot layihənin icrası isə Füzuli rayonunun ərazisində həyata keçiriləcək. Səfər çərçivəsində nümayəndə heyətinin üzvləri Zəngilanda “Ağıllı kənd” ilə də tanış olublar. Kənd təsərrüfatı naziri İnam Kərimov diqqətə çatdırıb ki, bu kənd azad edilmiş ərazilərə qayıdışın ilk məntəqəsi olacaq.

Paylaş:

Baxılıb: 1017 dəfə