3 ay gözləmə ləğv edildi

Bakı:

23 °C

64 %

5 m/s

Əlaqə

AZ RU EN

Ana səhifə / İqtisadiyyat / 3 ay gözləmə ləğv edildi

3 ay gözləmə ləğv edildi

19.04.2022 [10:06]

İşsizliyə görə pulun asan yolu

Nicat DİLQƏMLİ

Prezident İlham Əliyevin rəhbərliyi ilə ölkəmizdə uğurlu sosial siyasət həyata keçirilir. Hər bir sahədə olduğu kimi, bu sahədə də son illər mühüm və ardıcıl addımlar atılmaqdadır. Dövlətimizin başçısı hər zaman öz çıxışlarında sosial siyasəti dövlət siyasətinin ən zəruri sahələrindən biri kimi dəyərləndirərək vurğulayıb ki, layiqli sosial siyasət qarşıdakı illərdə də Azərbaycan hökumətinin fəaliyyətinin prioriteti olaraq qalacaq.

Görülən işlərin nəticəsidir ki, bu gün Azərbaycanda işsizlik səviyyəsi minimuma endirilib. Rəqəmlərlə ifadə etsək, 5.2 faizə qədər endirilib. Ölkə başçımız öz çıxışlarından birində bununla bağlı deyib: “Son on il ərzində bizim ən böyük uğurlarımızdan biri də ondan ibarətdir ki, yoxsulluğun səviyyəsi 50 faizdən 6 faizə, işsizliyin səviyyəsi isə 5,2 faizə düşmüşdür”.

İşsizlik faizinin minimuma endirilməsi, vətəndaşların sosial rifahının daha da yaxşılaşdırılması istiqamətində tədbirlər planı bu gün də davam etdirilir. Yeri gəlmişkən, ötən həftə Baş nazir Əli Əsədovun imzaladığı müvafiq qərara əsasən, işsizlikdən sığorta ödənişi ilə bağlı gözləmə müddəti ləğv edilib, staj tələbi azaldılıb.

Qərara əsasən, müddətli əmək müqaviləsinin müddətinin bitməsi səbəbindən işdən azad olunan şəxslər üçün tələb olunan staj müddəti 35 aydan 30 aya endirilib. Sığorta ödənişinin təyin olunması üçün əmək qabiliyyətli şəxslərin işsiz kimi qeydiyyata alındığı tarixdən sonra 3 ay gözləmə müddəti isə ləğv edilib. Yəni sığorta ödənişi sığorta hadisəsinin baş verdiyi tarixdən təyin olunacaq, işini itirən şəxsin müraciət etdiyi aydan etibarən işsizlikdən sığorta ödənişi almaq hüququ yaranacaq.

Qeyd edək ki, işsizlikdən sığorta ödənişi işəgötürən tərəfindən ləğv edildikdə, ştat ixtisar edildikdə və müddətli əmək müqaviləsinin müddəti bitdikdə təyin olunur.

İşsizlikdən sığorta ödənişi almaq hüququnun yoxlanılması üçün ilk olaraq “Məşğulluq” altsistemində (DOST Mərkəzlərinə və ya ərazi məşğulluq filiallarına müraciət etməklə) qeydiyyatdan keçmək tələb olunur.

Şəxs üçün münasib iş tapmaq mümkün olmadıqda ona işsiz statusu verilir və şəxs işsiz kimi qeydiyyata alındıqdan sonra sistemdə yerləşdirilmiş ərizəni təsdiq edir. Sığorta ödənişinin təyin və ya imtina edilməsi barədə qərar çıxarılaraq bu barədə vətəndaşa məlumat verilir.

Vətəndaşların sosial rifahının daha da yüksəldilməsinə xidmət edən layihələrin uğurla həyata keçirilməsi bir daha bunu deməyə əsas verir ki, Azərbaycan siyasətinin mərkəzində Azərbaycan vətəndaşı dayanır. Ölkə başçımız çıxışlarında bu məsələyə dəfələrlə toxunub. Belə ki, Prezident İlham Əliyev çıxışlarının birində vurğulamışdı: “O siyasət ki, onun mərkəzində xalq dayanır, ölkə vətəndaşı dayanır. Biz məhz bu siyasəti aparırıq. Mən dəfələrlə demişəm, bir daha demək istəyirəm ki, bizim siyasətimizin mərkəzində Azərbaycan vətəndaşı, onun problemləri, onun qayğıları, onun rifahı dayanır”.

Paylaş:

Baxılıb: 921 dəfə