Diasporumuzun inkişafı naminə...

Bakı:

10 °C

93 %

7 m/s

Əlaqə

AZ RU EN

Ana səhifə / MEDİA / Diasporumuzun inkişafı naminə...

Diasporumuzun inkişafı naminə...

12.12.2024 [08:27]

Mühüm işlər görülməkdədir

Bu gün Azərbaycan diasporunun təşkilatlanması və vahid ideya ətrafında birləşməsi olduqca mühüm əhəmiyyət kəsb edir. Diasporumuz Azərbaycanın xarici siyasətinə yön verən amillərdən birinə çevrilib. Bunun da əsas səbəbi dünya ölkələrindəki azərbaycanlılarla dövlətimizin koordinasiyalı fəaliyyətidir. Çünki Azərbaycan diasporunun arxasında dövləti, dövlətin siyasəti var. Bunun nəticəsidir ki, diasporumuz Azərbaycan həqiqətlərinin beynəlxalq aləmə çatdırılmasında yaxından iştirak edir, milli maraqlarımızın qorunması işində səmərəli fəaliyyət ortaya qoyur.

Diaspor siyasətinin həyata keçirilməsi, diaspor təşkilatlarının fəaliyyəti və soydaşlarımıza müxtəlif sahələrdə dəstək göstərilməsi məqsədilə Diasporla İş üzrə Dövlət Komitəsi də davamlı şəkildə fəaliyyət göstərməkdədir. Məlumdur ki, xaricdə yaşayan hər insanın arxasında bir dövlət, bir qurum yoxdursa, onun çox iş görməsi imkansızdır. Burada Azərbaycan dövləti rəsmi siyasətini ortaya qoyub. Dövlətimizin gerçək nümayəndələri onun xaricdə yaşayan soydaşlarıdır. Ona görə də ölkəmiz bu istiqamətdə lazım olan məqsədyönlü siyasət yürüdür. Artıq Azərbaycan diasporu kifayət qədər inkişaf edib.

Diasporumuz xarici ölkələrdə təhsil alan tələbələri də unutmur. Onlar üçün zaman-zaman layihələr təşkil edirlər. Bundan başqa, Azərbaycan həqiqətlərinin müxtəlif dünya ölkələrində təbliği üçün mühüm qurultaylar keçirilir, çoxsaylı tədbirlər baş tutur, eyni zamanda Azərbaycan evləri fəaliyyətə başlayır.

Azərbaycan-Moldova Dostluq xiyabanı

Dekabrın 5-də Kişineuda “Xarıbülbül” Azərbaycan-Moldova Dostluq xiyabanının açılışı olub. Diaporla İş üzrə Dövlət Komitəsindən verilən xəbərə görə, xiyaban Moldova Azərbaycanlıları Konqresi (MAK) ictimai təşkilatının təşəbbüsü, Azərbaycanın Moldovadakı səfirliyi və Kişineu Bələdiyyəsinin birgə əməkdaşlığı çərçivəsində salınıb.

Tədbirdə Azərbaycanın Moldovadakı səfiri Ülvi Baxşəliyev, Moldova parlamentinin üzvü və Moldova-Azərbaycan parlament dostluq qrupunun sədri Vitaliy Jakot, Moldovanın Ekologiya Nazirliyinin dövlət katibi Georqe Xadcer, Kişineunun vitse-prezidenti İrina Qutnik, MAK-ın sədri Elçin Bayramov və təşkilatın nümayəndələri, eləcə də bələdiyyə nümayəndəsi Dmitri Gorelko iştirak edib.

Açılış nitqi ilə çıxış edən Elçin Bayramov, eləcə də digər iştirakçılar Azərbaycan və Moldova arasında dostluq əlaqələrinin möhkəmlənməsinin əhəmiyyətindən danışıb. Həmçinin qeyd olunub ki, bu cür aksiya BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasından (COP29) ilhamlanaraq həyata keçirilib.

ABŞ-da yeni diaspor təşkilatımız...

Dekabrın 6-da işə ABŞ-ın Kolorado ştatında yaşayan soydaşlarımız Azərbaycan İcmasının “Koloradoda Azərbaycan Diasporu” adlanan ilk diaspor təşkilatını yaradıblar. Diasporla İş üzrə Dövlət Komitəsindən bildirilib ki, təşkilatın məqsədi yerli Azərbaycan İcmasının Amerika cəmiyyətində təmsilçiliyini artırmaq və bu missiyanı gələcək nəsillərə ötürməkdir.

Kolorado azərbaycanlılarının ABŞ-da yaşayan digər etnik qruplar, yerli icmalar və gənc nəsil arasında sıx əlaqələrinin qurulması, habelə Azərbaycan dilinin və mədəniyyətinin təbliği də təşkilatın əsas hədəflərindəndir. Yeni yaradılan təşkilatın təsisçisi və rəhbəri Nigar Şıxsəfiyeva Azərbaycanın diaspor fəaliyyətinin genişləndirilməsi, ölkəmizin ABŞ-da tanıdılması istiqamətində mühüm addımlar atılacağını vurğulayıb.

Rotterdamda mühüm qurultay...

Dekabrın 9-da Rotterdamda Benilüks Azərbaycanlıları Konqresinin (BAK) VI qurultayı keçirilib. Qurultay Azərbaycanın Dövlət Himninin səsləndirilməsi ilə başlayıb. Sonra tədbir iştirakçıları Azərbaycanın ərazi bütövlüyü uğrunda mübarizədə canlarını qurban vermiş şəhidlərimizin xatirəsini bir dəqiqəlik sükutla yad ediblər. Qurultayda əvvəlcə BAK-ın fəaliyyətinə həsr olunmuş videoçarx nümayiş etdirilib.

Qurultayda Azərbaycanın Niderlanddakı səfirliyinin birinci katibi Vüsal İbrahimov, Niderland-Azərbaycan “Odlar Yurdu” Cəmiyyətinin və Avropa Azərbaycanlıları Media Qrupunun nümayəndələri, həmçinin BAK-ın nəzdində fəaliyyət göstərən təşkilatların rəhbərləri, diasporumuzun fəal üzvləri iştirak ediblər.

Qurultayda təşkilati məsələlər müzakirə olunub, yeni sədr və 11 nəfərdən ibarət İdarə Heyəti seçilib. Elsevər Məmmədov yekdilliklə yenidən Benilüks Azərbaycanlıları Konqresinin sədri seçilib və bu vəzifəyə növbəti 4 il müddətinə təsdiqlənib.

Tədbir iştirakçıları BAK-ın növbəti 4 il üçün fəaliyyət planını müzakirə ediblər. Eyni zamanda, Diasporla İş üzrə Dövlət Komitəsinin sədri Fuad Muradovun təbriki qurultay iştirakçılarına çatdırılıb.

Yeganə BAYRAMOVA

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Diaspor quruculuğu, lobbiçilik və dünya azərbaycanlılarının həmrəyliyi” istiqaməti üzrə hazırlanmışdır.

Paylaş:

Baxılıb: 579 dəfə