44 günə yazılan tarix!

Bakı:

14 °C

62 %

11 m/s

Əlaqə

AZ RU EN

Ana səhifə / MEDİA / 44 günə yazılan tarix!

44 günə yazılan tarix!

01.05.2025 [10:34]

Ermənistanın əməliyyatları yalnız fiziki zərərlə kifayətlənməmişdi...

İkinci Qarabağ müharibəsi Azərbaycan xalqının və dövlətinin gücünü, iradəsini və mübarizliyini bütün dünyaya sübut edib. Ordumuz cəbhədəki hərbi əməliyyatların uğurla aparılması, eyni zamanda diplomatik səylərlə beynəlxalq aləmdə Azərbaycanın haqlı mövqeyinin müdafiə edilməsi ilə müharibənin qalibi oldu. Azərbaycan Silahlı Qüvvələri yalnız Ermənistanın işğal etdiyi əraziləri azad etmək deyil, həm də ərazi bütövlüyünü bərpa etmək üçün böyük bir iradə nümayiş etdirdi.

Bu qələbə, yalnız hərbi müstəvidə deyil, həm də Azərbaycanın müstəqilliyinin və suverenliyinin təmin edilməsi üçün əhəmiyyətli bir addım oldu. Azərbaycanın ərazi bütövlüyünü pozan Ermənistanın 30 illik işğalı nəticəsində yaranan gərginlik və təhdidlər, 44 günlük müharibə ilə sona çatdı.

Beynəlxalq hüququn kobud şəkildə pozulması

Mövzunu “Yeni Azərbaycan”a şərh edən millət vəkili Elman Məmmədov bildirib müharibə müddətində Ermənistanın həyata keçirdiyi bir çox qanunsuz hərəkət, beynəlxalq hüquq və insanlıq əleyhinə cinayətlər bütün dünyaya sübut oldu. Ermənistan Silahlı Qüvvələri tərəfindən törədilən bu cinayətlər, müharibə qanunlarına və ümumbəşəri prinsiplərə zidd olaraq Azərbaycanın sülhə və insanlığa qarşı cinayətlərini təşkil etdi: “Müharibə zamanı Ermənistanın yalnız hərbi hədəflərə deyil, həm də mülki obyektləri, evləri, məktəbləri, xəstəxanaları bombardman etməsi bir çox sivil insanın ölümünə və yaralanmasına səbəb oldu. Ermənistanın döyüş zamanı qadağan olunmuş silahları, o cümlədən ballistik raketləri və fosfor bombalarını istifadə etməsi, beynəlxalq hüququn kobud şəkildə pozulmasıdır. Bu silahların istifadəsi yalnız fiziki zərər verməklə qalmayıb, həm də müharibə sonrası ətraf mühitə və insanların sağlamlığına uzunmüddətli zərər vurub”.

Ermənistan psixoloji təzyiqlər də yaradıb

Deputat qeyd edib ki, müharibə zamanı Azərbaycan ordusunun əsgərləri və mülki vətəndaşlarının cəsədləri təhqir edilmiş, qeyri-insani şəkildə rəftar edilmişdi: “Bu, müharibə qanunlarının pozulmasının ən ciddi nümunələrindən biridir və Ermənistanın cinayətkar siyasətini göstərir.

Ermənistanın hərbi əməliyyatları yalnız fiziki zərər verməklə kifayətlənməyib, eyni zamanda psixoloji təzyiqlər yaradıb. Dinc sakinlər arasında qorxu və təlaş yaratmaq məqsədilə, mülki şəxslərə qarşı hədə-qorxu mesajları və təcavüzkar davranışlar da tətbiq edilib. Azərbaycan, 44 günlük müharibə zamanı, yalnız hərbi deyil, həm də diplomatik cəbhədə Ermənistanın törətdiyi insanlıq əleyhinə cinayətləri beynəlxalq ictimaiyyətə çatdırmaq üçün səy göstərib. Azərbaycanın haqlı mövqeyini təbliğ etmək, həmçinin Ermənistanın müharibə cinayətlərini dünya gündəminə gətirmək məqsədilə müxtəlif beynəlxalq təşkilatlarla əlaqələr qurulub.

“Ermənistanın bu cinayətləri, bir çox beynəlxalq təşkilatlar tərəfindən ciddi şəkildə pislənib, lakin hələ də bəzi ölkələr bu məsələyə qeyri-kafi yanaşırlar. Bu da Azərbaycanın beynəlxalq müstəvidə daha çox mübarizə aparmasına səbəb olub. Bununla yanaşı, Azərbaycan beynəlxalq tribunallar qarşısında Ermənistanın məsuliyyətə cəlb olunmasını tələb edib” - deyən deputat həmçinin əlavə edib ki, ermənilər tərəfindən törədilən vəhşilikləri beynəlxalq ictimaiyyətə çatdırmaq istiqamətində təbii ki, təsirli addımlar atılır: “Kifayət qədər ciddi faktora söykənərək Ermənistanın Azərbaycan dövlətinə, xalqına qarşı törətmiş olduğu cinayətlərə görə məsuliyyətə cəlb olunması üçün beynəlxalq hüquq müstəvisində ciddi addımlar atılmaqdadır. Düşünürəm ki, mütləq bunun nəticəsi olacaq”.

Təsirli addımlar atmaqdayıq

E.Məmmədov hesab edir ki, Azərbaycanın siyasi gücü artdıqca bu proses də sürətlə baş verməkdədir: “Biz Ermənistanın ölkəmizə, xalqımıza qarşı törətmiş olduğu cinayətlərə görə cavab verməsinə nail olacağıq. Azərbaycan torpaqlarını 30 illik işğal altında saxladığı dövrdə Ermənistanın ölkəmizə vurduğu olduğu zərərlər də dəqiqliklə hesablanmaqdadır. Bu istiqamətdə beynəlxalq səviyyəli mütəxəssislər cəlb olunmaqdadır. Bu işlər də təbii ki, davam etdiriləcəkdir. Biz öz haqlı mövqelərimizin müdafiəsi istiqamətində təsirli addımlar atmaqdayıq. Bunun da mütləq nəticəsinin olacağına inanırıq”.

Yeganə

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Müzəffər Ali Baş Komandanın rəhbərliyi ilə 44 günlük “Vətən müharibəsi”ndə qazanılmış tarixi qələbə, Ermənistan tərəfindən törədilmiş sülh və insanlıq əleyhinə cinayətlər, habelə müharibə cinayətləri ilə bağlı həqiqətlərin dünya ictimaiyyətinə çatdırılması” istiqaməti üzrə hazırlanmışdır.

Paylaş:

Baxılıb: 509 dəfə