Dövlətimizin gənclər siyasəti

Bakı:

20 °C

88 %

10 m/s

Əlaqə

AZ RU EN

Ana səhifə / MEDİA / Dövlətimizin gənclər siyasəti

Dövlətimizin gənclər siyasəti

30.12.2022 [10:19]

Uşaqların fiziki-mənəvi inkişafı gələcəyimizin təminatıdır

Yeganə BAYRAMOVA

Uşaqların, yeniyetmələrin və gənclərin fiziki, eləcə də mənəvi inkişafı cəmiyyətimiz üçün layiqli vətəndaşlar olaraq yetişmələri hər zaman diqqət mərkəzində olmalıdır. Çünki gənclərin, yeniyetmələrin fiziki cəhətdən sağlam olmaları, hərtərəfli biliyə, geniş dünyagörüşə yiyələnən şəxsiyyət kimi formalaşmaları öz aktuallığını hər zaman qoruyur. Məhz bu baxımdan ölkəmizdə uşaqların, ümumilikdə gənc nəslin fiziki cəhətdən sağlam böyüməsi ilə yanaşı, intellektual inkişafı üçün imkanlar yaradılıb

Təbii ki, gənc nəslin sağlam, fiziki cəhətdən güclü yetişməsi üçün idmanın rolu danılmazdır və məhz bu baxımdan idmanın inkişafına ölkəmizdə xüsusi önəm verilir, diqqət yetirilir. Bu işlərin əsası, əlbəttə ki, Azərbaycan xalqının fiziki, eləcə də mənəvi sağlamlığına çalışan ulu öndər

Heydər Əliyev tərəfindən qoyulub və bu gün həmin işlər cənab Prezident

İlham Əliyev tərəfindən uğurla davam etdirilir. Məhz uşaqların, yeniyetmələrin və gənclərin mənəvi, eləcə də fiziki inkişafında mühüm rol oynayan idman sahəsinin maddi-texniki bazasının yaradılması bu sahəyə ayrılan diqqət və qayğının bariz nümunəsidir.

Əlbəttə ki, beynəlxalq səviyyəli idman yarışlarında ölkəmizin bayrağının dəfələrlə yüksəyə qaldırılması, idmançılarımızın uğurları, qələbələri, vətənə medalla qayıtmaları onu deməyə əsas verir ki, idman sahəsində böyük yüksəlişə nail olunub. Şübhəsiz ki, bütün bunlar səbəbsiz deyil, olimpiya idman komplekslərinin, idman zallarının inşası, bir sözlə, idman sahəsinə dövlət qayğısı sayəsində reallaşıb. Tamaşaçı tutumu 70 min nəfər olan Bakı Olimpiya Stadionu, Milli Gimnastika Arenası, Su İdmanı Sarayı və Bakı Atıcılıq Mərkəzi, həmçinin, Bakıda idman şəhərciyinin fəaliyyəti bu sahədə görülən irimiqyaslı işlərin, idman sahəsinə dövlət qayğısının bariz nümunəsidir.

Uşaq və gənclərin fiziki və mənəvi inkişafı onların mövcud olduğu cəmiyyətin, ölkələrinin, hətta mənsub olduqları xalqın inkişaf göstəricisidir, desək, yanılmarıq. Çünki uşaq öz böyüdüyü mühitdə görüb-götürdüklərini gələcəkdə də nəinki nümayiş etdirir, hətta tətbiq etməyi lazım bilir. Məhz buna görə də respublikamızda uşaqlara dövlət qayğısının gücləndirilməsi, diqqətin artırılması, uşaqlarla bağlı demoqrafik perspektivlərin müəyyənləşdirilməsi məqsədilə mütəmadi olaraq dövlət proqramlarının həyata keçirilməsi istiqamətində ölkə başçısı tərəfindın sərəncamlar imzalanır. Sözsüz ki, görülən işlər, atılan addımlar onu deməyə əsas verir ki, uşaq və gənclərin fiziki və mənəvi inkişafı ölkəmizin əsas prioritetlərindəndir.

Ölkəmizdə uşaq və gənclərin həyatını dəyişən, onlara hərtərəfli stimul verən, uşaq və gənclərin mənəvi və fiziki inkişafı üçün geniş şərait yaradan normativ aktlar da mövcuddur. 2005-2009-cu illəri əhatə edən gənclərlə bağlı Dövlət Proqramı bu sənədlərdəndir. Bu Dövlət Proqramı sözsüz ki, uşaq və yeniyetmələrin, eləcə də gənclərin inkişafı üçün geniş şəraitin yaradılması məqsədi daşıyırdı və bunun da nəticəsi özünü göstərməkdədir. Bu Dövlət Proqramı çərçivəsində görülən işlər, gənclərin potensialından ölkənin mənafeyi naminə tam və düzgün istifadə olunması, onların faydalı məşğulluğunun təmin edilməsi, dövlət idarəçiliyi sistemində iştirakının gerçəkləşdirilməsi yönündə ciddi irəliləyişə gətirib çıxardı.

Dövlət başçısının uşaq və gənclərin fiziki və mənəvi inikişafına diqqət və qayğısı dəfələrlə öz təsdiqini tapıb. Məsələn, 2007-ci ilin “Gənclər ili” elan edilməsi, “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramının təsdiq edilməsi” barədə Sərəncam imzalanması və bu proqram çərçivəsində 5 mindən artıq gəncin dünyanın nüfuzlu ali məktəblərində təhsil almağa göndərilməsini söyləyə bilərik. 19 dekabr 2011-ci il tarixində Azərbaycan Respublikasının Prezidenti yanında Gənclər Fondunun yaradılması barədə Sərəncam imzalanması, ölkə gənclərinin hərtərəfli inkişafını təmin etmək məqsədilə “2015-2025-ci illərdə Azərbaycan gənclərinin İnkişaf Strategiyası”nın təsdiq olunması sadalananların ölkə başçısının diqqət və qayğısının bariz nümunəsidir.

Uşaq və gənclərin fiziki və mənəvi inkişafı, onların müdafiəsi istiqamətində ölkəmizin gördüyü işlər təsdiq edir ki, gənclərimizin gələcəyi etibarlı əllərdədir. Əminliklə deyə bilərik ki, uşaqların, gənclərin layiqli vətəndaş kimi böyüməsi, təhsil alması, cəmiyyətdə mövqe tutması üçün Azərbaycan dövləti mümkün olan bütün imkan və şəraiti yaradıb. Heç şübhəsiz ki, bundan sonra da bu siyasətin davam etdiriləcəyi, uşaqların və gənclərin istər fiziki, istər intellektual, istər mənəvi, istərsə də digər istiqamətdə inkişafının təmin edilməsi üçün müvafiq addımlar atılacaq. Bu addımların isə məntiqi nəticəsi olaraq uşaqların, gənclərin gələcəkdə də fiziki və mənəvi inkişafı barədə nikbin proqnozlar vermək olar. Çünki atılan addımlar buna əsaslı zəmin yaradır.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Uşaq və gənclərin fiziki və mənəvi inkişafı” istiqaməti üzrə hazırlanmışdır

Paylaş:

Baxılıb: 852 dəfə

Xəbər lenti

Hamısına bax