Rusiyalı pianoçu Mixail Lidski Bakıda Bramsın şedevr əsərlərini ifa edib

Bakı:

24 °C

88 %

3 m/s

Əlaqə

AZ RU EN

Ana səhifə / Mədəniyyət / Rusiyalı pianoçu Mixail Lidski Bakıda Bramsın şedevr əsərlərini ifa edib

Rusiyalı pianoçu Mixail Lidski Bakıda Bramsın şedevr əsərlərini ifa edib

07.12.2024 [15:58]

Müslüm Maqomayev adına Azərbaycan Dövlət Akademik Filarmoniyasının səhnəsində bədii rəhbər və baş dirijor, respublikanın Əməkdar artisti Fuad İbrahimovun rəhbərliyi ilə Üzeyir Hacıbəyli adına Dövlət Simfonik Orkestrinin konserti olub. Gecənin solisti məşhur pianoçu Mixail Lidski (Rusiya) olub.

AZƏRTAC xəbər verir ki, gecədə Yohans Bramsın Fortepiano və orkestr üçün 2 №-li konserti si-bemol major (Op.83) və 3 №-li simfoniyası fa major (Op.90) səsləndirilib.

Virtuoz pianoçu, Moskva Konservatoriyasının professoru Mixail Lidski ilkin musiqi təhsilini Moskva Dövlət Konservatoriyasında alıb, burada dünyaşöhrətli professor Lev Naumovdan sənətin sirlərini öyrənib. Lidski həm klassik musiqi ifaçılığı sahəsində, həm də pedaqoji sahədə böyük təcrübəyə malikdir, gənc pianoçuların hazırlanmasına mühüm töhfə verir.

“Bu mənim Bakıya ilk səfərim deyil. Mən burada ilk dəfə 43 il əvvəl, hələ məktəbdə oxuyanda, 5-6-cı sinifdə olarkən çıxış etmişəm. Bu müddət şəhər üçün nisbətən qısadır, lakin çox şey dəyişib. Bakı getdikcə gözəlləşir. Buraya gəlmək həmişə xoşdur. Burada mənim çoxdankı əlaqələrim, tanışlarım var”, - deyə pianoçu AZƏRTAC-ın müxbirinə müsahibəsində bildirib.

Fuad İbrahimov da öz növbəsində gecənin proqramı haqqında ətraflı danışıb: “2 №-li konsert həm pianoçudan, həm də orkestr musiqiçilərindən böyük zəhmət tələb edir. Biz çox çalışdıq, məşq etdik və hazırlaşdıq. Mixail Lidskinin Bakıda çoxlu konserti olub. O, solo və ya maestro Rauf Abdullayevin müşayiəti ilə çıxış edib. Bu gün mənə ilk dəfə onunla çıxış etmək qismət oldu. Düşünürəm ki, biz yaxşı tandem yaratdıq: bütün iştirakçılar bir-birini musiqi cəhətdən dəstəklədilər. Bramsın 3 №-li simfoniyası çox vaxt Bethovenin “Qəhrəmanlıq” kimi tanınan 3 №-li simfoniyası ilə müqayisə edilir. Əsərin hər hərəkəti pianoda tamamlandığından Brams simfoniyası ilə böyük uğur qazandı, baxmayaraq ki, özü də buna şübhə edirdi. Adətən simfoniyalar sensasiya yaratmaq və alqış fırtınasına səbəb olmaq üçün yüksək səslə başa çatır. Lakin Brams qeyri-adi bir yanaşma seçdi, şübhələrinə baxmayaraq, bu, inanılmaz dərəcədə uğurlu oldu”.

Dirijorun sözlərinə görə, Brams uzun müddət ilk simfoniyasını yazmağa cəsarət etməyib. “O, doqquz məşhur simfoniyanın müəllifi olan Bethoveni ilahiləşdirirdi və başa düşürdü ki, belə bir irsdən sonra eyni dərəcədə dahi bir əsər yaratmaq çətin olacaq. Yalnız uzun illər sonra Brams “Bethovenin onuncu simfoniyası” kimi tanınan ilk simfoniyasını yaratmağa qərar verdi. Bramsın yaradıcılığı həqiqətən də Bethovenin irsi ilə sıx bağlıdır və Bramsın 3 №-li simfoniyası müəyyən dərəcədə Bethovenin 3 №-li simfoniyası ilə əks-səda yaradır”, - deyə maestro bildirib.

Konsert çoxsaylı klassik musiqi həvəskarlarını, mədəniyyət nümayəndələrini və incəsənət xadimlərini bir araya toplayıb. Rusiyalı pianoçunun Azərbaycan orkestrinin müşayiəti ilə çıxışı alqışlarla qarşılanıb.

Paylaş:

Baxılıb: 799 dəfə