“Qəbələ - MDB-nin mədəniyyət paytaxtı” çərçivəsində yekun tədbirlər başlayıb

Bakı:

15 °C

94 %

0 m/s

Əlaqə

AZ RU EN

Ana səhifə / Mədəniyyət / “Qəbələ - MDB-nin mədəniyyət paytaxtı” çərçivəsində yekun tədbirlər başlayıb

“Qəbələ - MDB-nin mədəniyyət paytaxtı” çərçivəsində yekun tədbirlər başlayıb

15.03.2014 [10:31]

Məlum olduğu kimi, Qəbələ şəhəri 2013-cü il üçün MDB-nin mədəniyyət paytaxtı elan olunub. İl ərzində rayonda “Qəbələ - MDB-nin mədəniyyət paytaxtı” çərçivəsində çox mühüm mədəni tədbirlər keçirilib.
AzərTAc xəbər verir ki, bununla bağlı yekun tədbirlərə isə Qəbələ Mədəniyyət Mərkəzində təşkil olunmuş konsertlə başlanılıb.
Konsertin aparıcısı, Rusiya Federasiyasının Əməkdar artisti Timofey Fyodorov Azərbaycanda olduğu müddətdə yüksək qonaqpərvərliklə qarşılandığını söyləyib. Qəbələnin 2013-cü ildə MDB-nin mədəniyyət paytaxtı elan olunmasının əhəmiyyətini qeyd edən aparıcı ölkəmizin gündən-günə gözəlləşməsindən də danışıb.
Sonra Qəbələ Mədəniyyət Mərkəzinin səhnəsi incəsənət ustalarının ixtiyarına verilib.
Rusiyanın və Moldovanın Əməkdar artisti Svetlana Toma bildirib ki, səhnədə olduğu müddətdə tamaşaçılara xoş enerji bəxş etmək üçün çalışıb. Bunun müqabilində isə alqışlar və isti münasibətlə qarşılaşıb. Svetlana Toma deyib: “Qəbələ gözəldir. Qaldığım mehmanxananın eyvanından baxanda dağları, gözəl şəhəri və gözəl təbiəti görürəm. Demək olar ki, sizdə hər şey yüksək səviyyədədir”.
Svetlana Toma Ulu öndər Heydər Əliyev ilə keçirdiyi görüşü xatırlatmaq istədiyini söyləyərək o zaman bu dahi şəxsiyyətin mədəniyyət və incəsənəti nə qədər dərindən bilməsinin şahidi olduğunu deyib. Bildirib ki, mən bu gün də o unudulmaz görüşün xoş anlarını xatırlayıram.
Müğənni Anastasiya Makayeva ilk dəfədir Qəbələdə olduğunu söyləyərək bu ecazkar diyarın ona çox xoş təsir bağışladığını deyib. Rusiyalı musiqiçi Qəbələdə son dərəcə qonaqpərvərliklə qarşılanmalarını, şəhərin qədim və müasir memarlığının, milli mətbəximizin hər kəsin xoşuna gəldiyini qeyd edib.
Aktyor və bəstəkar Qleb Matveyçuk burada gördüklərinin onu valeh etdiyini xüsusi vurğulayıb. Bildirib ki, Qəbələ hər cəhətdən gözəldir.
Gürcüstanın Xalq artisti İya Ninidze gördüyü bu gözəlliyin onda xoş təəssüratlar yaratdığını söyləyib.
Aktrisa Nino Ninidze yenidən Azərbaycana gəlməsindən çox şad olduğunu deyib. Səhnəyə çıxanda çox həyəcanlandığını vurğulayan gürcüstanlı aktrisa bu hissin qətiyyən qorxu ilə bağlı olmadığını nəzərə çatdırıb.
Rusiyanın Əməkdar artisti Boris Qalkin Qəbələdə olduqları ilk dəqiqələrdən xüsusi diqqət və yüksək qonaqpərvərliklə qarşılaşdıqlarını bildirib. O, 2013-cü il üçün MDB-nin mədəniyyət paytaxtından məhz bunu gözlədiklərini söyləyib.
Qəbələ rayon İcra Hakimiyyətinin MDB-nin Humanitar Əməkdaşlıq üzrə Dövlətlərarası Fondu ilə birlikdə həyata keçirdiyi mədəni tədbirlər martın 16-dək davam edəcək.

Paylaş:

Baxılıb: 1548 dəfə