Gənc Tamaşaçılar Teatrı ötən il 14 ölkədə qastrol və beynəlxalq festivallarda çıxış edib

Bakı:

22 °C

83 %

9 m/s

Əlaqə

AZ RU EN

Ana səhifə / Mədəniyyət / Gənc Tamaşaçılar Teatrı ötən il 14 ölkədə qastrol və beynəlxalq festivallarda çıxış edib

Gənc Tamaşaçılar Teatrı ötən il 14 ölkədə qastrol və beynəlxalq festivallarda çıxış edib

09.01.2018 [10:20]

Ötən il Azərbaycan Dövlət Gənc Tamaşaçılar Teatrının yaradıcı heyəti üçün məhsuldar, unudulmaz səfərlər və premyeralarla əlamətdar il kimi yadda qalıb. İl ərzində teatr yeni səhnə əsərləri, premyeralarla tamaşaçıların görüşünə gəlib.
AZƏRTAC-a teatrın mətbuat xidmətindən verilən məlumata görə, görkəmli italyan uşaq yazıçısı Canni Rodarinin eyniadlı əsəri əsasında ərsəyə gələn “Çipollino”, Əməkdar artist Lətifə Əliyevanın anadan olmasının 70 illik yubileyi münasibətilə hazırlanan “Vurğuna vurğun gəlin”, Məhəmməd Füzulinin məşhur “Leyli və Məcnun” poeması əsasında ilk dəfə olaraq dramatik janrda hazırlanan eyniadlı səhnə əsəri, “Məlikməmməd” nağılı əsasında hazırlanan eyniadlı tamaşa, İsveçin ölkəmizdəki səfirliyi və “Azərcell” şirkətinin birgə layihəsi əsasında hazırlanan “Uzuncorab Pippi”, Əli Əmirlinin “Ünvansız qatar”, teatrın iki qocaman sənətkarı, Xalq artistləri Ağaxan Salmanlının 75, Yasin Qarayevin anadan olmasının 70 illik yubileylərinə hazırlanan “Açarını itirənlər”, Aprel döyüşlərində şəhid olan Azərbaycan Dövlət Rəssamlıq Akademiyasının heykəltəraşlıq fakültəsinin məzunu Samir Kaçayevin xatirəsinə həsr olunmuş “Yarımçıq qalmış...”, yazıçı-dramaturq T.Vəliyevanın “Xəyanət” povesti əsasında “Cəza” adlı mono-tamaşa, Bakı Yunus Əmrə İnstitutu ilə birgə layihə “Eşqi-Nigar” (“Koroğlu” dastanı əsasında), Conatan Sviftin məşhur “Qulliver Cırtdanlar ölkəsində” əsəri əsasında eyniadlı tamaşa, R.Hovardın “Qrinç”, H.Andersenin “Qar kraliçası” və Sten Linin “Hörümçək adam” tamaşaları teatrsevərlər tərəfindən maraqla qarşılanıb.
Teatrın kollektivi aprelin 19-dan 30-dək Gürcüstan Dövlət Peşəkar Gənc Tamaşaçılar, Vladiqafqaz Dövlət Gənc Tamaşaçılar və Çeçenistan Respublikası Dövlət Gənc Tamaşaçılar Teatrında qastrol səfərində olub. Səfər çərçivəsində gənc yazar Pərvinin “Dəcəl keçi” əsəri əsasında hazırlanmış eyniadlı tamaşa nümayiş etdirilib. Qastrol çərçivəsində teatrın direktoru, ASSİTEJ-Azərbaycan Milli Mərkəzinin prezidenti, Əməkdar İncəsənət Xadimi Mübariz Həmidov Gürcüstan və Rusiya ASSİTEJ Milli mərkəzlərinin rəhbərləri ilə görüşüb. Qarşılıqlı səfərlərin şərtlərinə əsasən cari ilin mayın 5-dən 7-dək Çeçenistan Dövlət Gənc Tamaşaçılar Teatrı A.Axmatovanın “Skazka o zolotom skakune”, 19-dan 21-dək isə Gürcüstan Dövlət Peşəkar Gənc Tamaşaçılar Teatrının kollektivi L.Titova və A.Starotorjskiyin “Korolevskaə korova” tamaşası ilə Azərbaycan Dövlət Gənc Tamaşaçılar Teatrının qonağı olaraq Bakı tamaşaçılarını sevindiriblər. Bundan əlavə, teatrın baş rejissoru, Əməkdar İncəsənət Xadimi Bəhram Osmanov mayın 26-dan 31-dək Moskvada Teatr Rejissorları Gildiyasının II Assambleyasında iştirak edib. Yaradıcı heyət iyunun 27-dən iyulun 3-dək Belarusun Bobruysk şəhərində keçirilən XIV “Dostluq çələngi” adı Beynəlxalq Xalq Yaradıcılığı Festivalında iştirak edib. Aprelin 20-dən 27-dək Kineşmada keçirilən “Hərarətli ürək” II Beynəlxalq teatr festivalı, iyunun 12-dən 18-dək Astanada “Səhnədən salam” V Beynəlxalq teatr festivalı, sentyabrın 7-dən 14-dək Rusiya Federasiyası Başqırdıstan Respublikasının Ufa şəhərində türkdilli xalqların VI “Tuqanlıq” Beynəlxalq teatr festivalı, oktyabrın 1-dən 5-dək Rusiyanın Elista şəhərində (Kalmıkiya Respublikası) “Keyeda” uşaq və yeniyetmələr üçün I Beynəlxalq teatr festivalında, oktyabrın 3-dən 9-dək Ukraynada “Mariya” adlı Beynəlxalq mono-tamaşalar və oktyabrın 25-dən 28-dək Rusiyanın Nijnevartovsk şəhərində “Şimal görüşləri” V Beynəlxalq teatr festivalında uğurla iştirak edərək Azərbaycan teatrını layiqincə təmsil və təbliğ ediblər. Ümumilikdə, teatrın kollektivi ötən il 14 ölkədə qastrol və beynəlxalq festivallarda çıxış edib.

Paylaş:

Baxılıb: 1275 dəfə