İstanbulda III Beynəlxalq Türk Dünyası Sənədli Filmlər Festivalının qala gecəsi və mükafatlandırma mərasimi keçirilib

Bakı:

23 °C

78 %

10 m/s

AZ RU EN

Ana səhifə / Mədəniyyət / İstanbulda III Beynəlxalq Türk Dünyası Sənədli Filmlər Festivalının qala gecəsi və mükafatlandırma mərasimi keçirilib

İstanbulda III Beynəlxalq Türk Dünyası Sənədli Filmlər Festivalının qala gecəsi və mükafatlandırma mərasimi keçirilib

09.10.2018 [08:42]

İstanbulda III Beynəlxalq Türk Dünyası Sənədli Filmlər Festivalının qala gecəsi və mükafatlandırma mərasimi keçirilib.
AZƏRTAC xəbər verir ki, Türk Dünyası Qəzetçilər Federasiyasının təşkilatçılığı ilə “Səkkiz ölkə, səkkiz şəhər!” devizi altında keçirilən festivalın münsiflər heyətinin sədri görkəmli Azərbaycan kinorejissoru Vaqif Mustafayevdir.
Vaqif Mustafayevin sədrliyi ilə münsiflər heyətinin müəyyən etdiyi qaliblər elan olunub.
Təşkilat komitəsinin məlumatına görə, festivala Türkiyənin Mədəniyyət və Turizm Nazirliyinin kino idarəsi və 11 universitet dəstək verib. Festivala, ümumilikdə, 8 ölkədən 140 film təqdim olunub. Finala 12 peşəkar, 12 tələbə tərəfindən çəkilmiş 24 film seçilib.
Türk dünyasını təmsil edən görkəmli rejissorların, aktyorların, mədəniyyət xadimlərinin, ziyalıların iştirak etdikləri mərasim Türkiyənin dövlət himninin səsləndirilməsi ilə başlanıb.
Sonra Türk Dünyası Qəzetçilər Federasiyasının sədri, festivalın təşkilat komitəsinin sədri Menderes Dəmir çıxış edib. Festivalın məqsəd və vəzifələrindən danışan M.Dəmir Vaqif Mustafayevin sədrlik etdiyi münsiflər heyətinin fəaliyyətini xüsusi qeyd edib. O deyib ki, qaliblərin seçilməsində peşəkarlıq və ədalətli yanaşma əsas meyar olub.
Çıxışında indiyədək müxtəlif ölkələrdə keçirilən bir çox festivallarda münsiflər heyətinə sədrlik etdiyini söyləyən kinorejissor Vaqif Mustafayev ilk dəfədir ki, türk dünyasının festivalında iştirak etdiyini diqqətə çatdırıb. O, festivalın əhəmiyyətini və münsiflər heyətinin fəaliyyətini yüksək qiymətləndirib.
Vaqif Mustafayev qeyd edib ki, festivala təqdim olunan filmlər yüksək peşəkarlıqla çəkilmiş ekran əsərləridir. Münsiflər heyəti qalibləri müəyyən etmək üçün ədalətli, obyektiv mövqe sərgiləyib. O, türk dünyasının kinosunun bugünkü səviyyəsini göstərən bu filmlərin tamaşaçılar tərəfindən bəyəniləcəyinə inandığını bildirib.
Daha sonra Vaqif Mustafayevin Ümummilli lider Heydər Əliyev haqqında çəkdiyi “Heydər” bədii filmindən videoçarx nümayiş etdirilib, kinorejissorun bioqrafiyası təqdim olunub.
Maraqlı bədii hissə ilə davam etdirilən mərasim qaliblərin mükafatlandırılması ilə başa çatıb.
Məlumat verilib ki, qalib seçilən filmlər Bakı, İstanbul, Lefkoşa, Bişkek, Daşkənd, Skopye, Sarayevo, Almatı şəhərlərində nümayiş olunacaq.
Mərasim çərçivəsində, həmçinin türk dünyasının tarixini, mədəniyyətini, adət-ənənələrini, problemlərini əks etdirən fotosərgi nümayiş etdirilib. Sərgidə Xocalı soyqırımı ilə bağlı orijinal fotolar da yer alıb.

Paylaş:

Baxılıb: 1223 dəfə