QHT Əməkdaşlıq Alyansının prezident seçkiləri ilə əlaqədar keçirdiyi monitorinqin birinci mərhələsinin nəticələri açıqlanıb

Bakı:

17 °C

67 %

6 m/s

AZ RU EN

Ana səhifə / Siyasət / QHT Əməkdaşlıq Alyansının prezident seçkiləri ilə əlaqədar keçirdiyi monitorinqin birinci mərhələsinin nəticələri açıqlanıb

QHT Əməkdaşlıq Alyansının prezident seçkiləri ilə əlaqədar keçirdiyi monitorinqin birinci mərhələsinin nəticələri açıqlanıb

19.09.2013 [09:34]

QHT Əməkdaşlıq Alyansının 9 oktyabr prezident seçkiləri ilə əlaqədar keçirdiyi monitorinqin birinci mərhələsinin nəticələri açıqlanıb.
AzərTAc xəbər verir ki, bununla bağlı Beynəlxalq Mətbuat Mərkəzində keçirilən mətbuat konfransında çıxış edən Alyansın həmsədrləri Rufiz Qonaqov, Rəfail Becanov və Yadigar Məmmədli monitorinqin birinci mərhələsinin yekunlarını şərh ediblər.
Bildirilib ki, monitorinqin birinci mərhələsi avqustun 12-dən sentyabrın 12-dək olan dövrü əhatə edib və 6 region üzrə 40 rayonda aparılıb. “Prezidentliyə namizədlərin daha çox hansına inanırsınız” sualına rəyi öyrənilən respondentlərin 89,32 faizi Yeni Azərbaycan Partiyasının (YAP) namizədi İlham Əliyevə, 7,94 faizi “Milli şura”nın vahid namizədi Cəmil Həsənliyə, 0,91 faizi Ümid Partiyasının namizədi İqbal Ağazadəyə, 0,55 faizi Bütöv Azərbaycan Xalq Cəbhəsi Partiyasının namizədi Qüdrət Həsənquliyevə, 0,35 faizi Ədalət Partiyasının namizədi İlyas İsmayılova, 0,31 faizi Azərbaycan Demokrat Partiyasının namizədi Sərdar Cəlaloğluna, 0,62 faizi isə digər namizədlərə inandıqlarını bildiriblər. “Bu gün seçki keçirilərsə, kimə səs verərdiniz” sualına isə monitorinqdə iştirak edən 10 min nəfərdən 89,32 faizi, yəni 8 min 932 nəfəri “İlham Əliyevə səs verərdim” deyə cavab verib. Onlardan 7,94 faizi, yəni 794 nəfəri Cəmil Həsənliyə, 2,74 faizi isə İqbal Ağazadəyə, Qüdrət Həsənquliyevə, İlyas İsmayılova, Sərdar Cəlaloğluna və digərlərinə “səs verərdim” deyə sualı cavablandırıblar.
Həmçinin qeyd olunub ki, siyasi partiyaların da reytinqlərinin öyrənilməsi monitorinqin əsas predmetlərindən biri olub. Bu sırada da birincilik YAP-a məxsusdur. Partiyaların fəaliyyətini dəyərləndirən respondentlərin 8 min 932 nəfəri, yəni 89,32 faizi YAP-ın fəaliyyətini daim müşahidə etdiklərini, bu partiyanın reytinqinin yüksək və üzvlərinin sayının çox olduğunu bildiriblər. Bu da partiyanın Sədri İlham Əliyevə olan etimaddan irəli gəlir. Respondentlərin 10,68 faizi isə digər partiyaların fəaliyyətini yüksək qiymətləndiriblər. Bu sırada 2,45 faizlə Azərbaycan Xalq Cəbhəsi Partiyası, 2,43 faizlə Müsavat Partiyası, 1,31 faizlə Klassik Xalq Cəbhəsi Partiyası, 1,12 faizlə Azərbaycan Liberal Partiyası, 0,91 faizlə Ümid Partiyası qərarlaşıb. Qalan 2,46 faiz isə Ədalət, Azərbaycan Sosial Demokrat, Müasir Müsavat və digər partiyalar arasında bölünür.
Ölkədə seçki mühitinə gəldikdə isə, monitorinq zamanı hər hansı qanun pozuntusu aşkarlanmayıb. İmzatoplama kampaniyası, namizədlərin qeydiyyatı, kütləvi aksiyaların keçirilməsi ilə bağlı məhdudiyyətlər müşahidə edilməyib. Eləcə də vətəndaş cəmiyyəti və medianın fəaliyyətinə də hər hansı problem yaradılmayıb. Əhali seçkidə iştirak etmək, səs vermək istəyindədir. Azərbaycan seçicisinin seçkidən gözləntisi iqtisadi artım, sosial inkişafın, infrastruktur layihələrinin davamlı olmasıdır. Ölkənin ümumi inkişafını müsbət dəyərləndirən respondentlərin 94 faizi bu tempin qorunub saxlanılmasının tərəfdarıdır.
QHT Əməkdaşlıq Alyansı Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə dəstəyi ilə “2013-cü il prezident seçkisinin monitorinqinin aparılması və vətəndaş cəmiyyəti institutlarının prosesdə iştirakının təşkili” layihəsini həyata keçirir.

Paylaş:

Baxılıb: 1027 dəfə