Türkiyədə ilk dəfə ümumxalq səsverməsi ilə prezident seçkiləri keçirilib

Error:

AZ RU EN

Ana səhifə / Siyasət / Türkiyədə ilk dəfə ümumxalq səsverməsi ilə prezident seçkiləri keçirilib

Türkiyədə ilk dəfə ümumxalq səsverməsi ilə prezident seçkiləri keçirilib

12.08.2014 [09:50]

Eldar İbrahimov: Seçkilər çox sakit şəraitdə, müsbət ab-havada, qanunlar çərçivəsində keçirildi
Məlum olduğu kimi, avqustun 10-da Türkiyədə prezident seçkiləri keçirilib. Türkiyədə prezidentin ilk dəfə olaraq ümumxalq səsverməsi əsasında seçildiyi seçkilərin ilkin nəticələrinə əsasən, Baş nazir Rəcəb Tayyib Ərdoğan qalib gəlib. Xatırladaq ki, seçicilər 3 namizədə səs veriblər: hakim Ədalət və İnkişaf Partiyasının namizədi, Baş nazir Rəcəb Tayyib Ərdoğan, Cümhuriyyət Xalq Partiyasının (CHP) və Milliyyətçi Hərəkat Partiyasının namizədi, İslam Əməkdaşlıq Təşkilatının sabiq baş katibi Ekmələddin İhsanoğlu və “Xalqların Demokrat Partiyası” (HDP) sədri Səlahəddin Dəmirdaş. İlkin nəticələrə görə, ikinci yerdə Ekmələddin İhsanoğlu, üçüncü yerdə isə Səlahəddin Dəmirdaş gəlir. Seçkilərin yekun nəticəsi isə Türkiyə Yüksək Seçim Kurulu tərəfindən avqustun 15-də rəsmən açıqlanacaq. Türkiyənin fəaliyyətdə olan Prezidenti Abdullah Gülün səlahiyyətləri avqustun 28-də başa çatır.
Seçkilərdə əhalinin iştirakına gəlincə, ilkin məlumatlara görə, səsvermə hüququ olan 53 milyon vətəndaşın 74 faizi səsvermədə iştirak edib.
Qeyd edək ki, 2007-ci ildə baş tutmuş referendumun nəticələrinə əsasən, əvvəlki prezident seçkiləri ilə müqayisədə Türkiyə Prezidentini 2014-cü ildən parlament deyil, xalq əvvəlki 7 il əvəzinə 5 il müddətinə seçir.
Türkiyədəki seçkiləri Türkdilli Dövlətlərin Parlament Assambleyasının (TürkPA) xətti ilə Azərbaycan Respublikası Milli Məclisinin Aqrar siyasət komitəsinin sədri Eldar İbrahimov, Mədəniyyət komitəsinin sədri, Azərbaycan-Türkiyə parlamentlərarası dostluq qrupunun həmsədri Nizami Cəfərov və millət vəkili Sədaqət Vəliyeva da müşahidə ediblər. Millət vəkilləri Nizami Cəfərov və Sədaqət Vəliyeva Ankarada, Eldar İbrahimov isə İstanbuldakı seçki məntəqələrində müşahidələr aparıblar.
Milli Məclisin Aqrar siyasət komitəsinin sədri Eldar İbrahimov Tükiyədəki seçkilərlə bağlı təəssüratlarının yüksək olduğunu deyib: “İstanbulun Çamlıca bölgəsindəki 24 məntəqədə müşahidə apardım. Türkiyədə insanların seçkiyə münasibəti çox yüksəkdir. Mən bunu Türkiyədə sonuncu parlament seçkilərini müşahidə etdiyim zaman da görmüşdüm. İstər yaşlılar, istərsə də gənclər böyük həvəslə səsvermədə iştirak edirdilər”.
Eldar İbrahimov səsvermənin texniki cəhətdən yüksək səviyyədə təşkil olunduğunu da deyib: “İnsanların rahatlığı üçün çoxsaylı kiçik məntəqələr təşkil olunub, hər məntəqədə 400 nəfərə yaxın insanın səs verməsinə şərait yaradılıb. Doğrudur, burada Azərbaycandakı seçkilərdə olduğu kimi, məntəqələrdə kameralar quraşdırılmayıb, “exit-poll”lar keçirilməyib. Lakin bir çox Avropa ölkələri ilə müqayisədə, Türkiyədəki seçkilərin daha yaxşı təşkil olunduğunu deyə bilərəm. Ümumilikdə, seçkilər çox sakit şəraitdə, müsbət ab-havada, qanunlar çərçivəsində keçirildi”.
Göründüyü kimi, Türkiyənin prezidentin ümumxalq səsverməsi ilə seçilməsi təcrübəsini ilk dəfədir yaşamasına baxmayaraq, proses kifayət qədər sabit və şəffaf şəraitdə baş tutub. Bu isə onu deməyə əsas verir ki, Türkiyədəki sabitlik və inkişaf prosesi prezidentin seçilməsi ilə başlanan yeni mərhələdə də davam edəcək.
Hülya

Paylaş:

Baxılıb: 786 dəfə