Kaliforniya Senatının Dağlıq Qarabağla bağlı qəbul etdiyi sənəd əhəmiyyətsiz kağız parçasından başqa bir şey deyil

Bakı:

20 °C

73 %

6 m/s

AZ RU EN

Ana səhifə / Siyasət / Kaliforniya Senatının Dağlıq Qarabağla bağlı qəbul etdiyi sənəd əhəmiyyətsiz kağız parçasından başqa bir şey deyil

Kaliforniya Senatının Dağlıq Qarabağla bağlı qəbul etdiyi sənəd əhəmiyyətsiz kağız parçasından başqa bir şey deyil

29.08.2014 [09:22]

ABŞ-ın Kaliforniya ştatı Senatının Dağlıq Qarabağa dair qəbul etdiyi qərəzli qətnamə əhəmiyyətsiz kağız parçasından başqa bir şey deyil. Çünki erməni mətbuatının təqdim etməyə çalışdığı kimi, bu sənəddə Dağlıq Qarabağ hansısa respublika kimi tanınmır və Senatın belə bir tanıma hüququ da yoxdur.
AzərTAc xəbər verir ki, bu sözləri Azərbaycan Xarici İşlər Nazirliyinin mətbuat xidmətinin rəhbəri Elman Abdullayev avqustun 28-də keçirdiyi mətbuat konfransında deyib.
Bildirilib ki, avqustun 27-də ABŞ-ın Kaliforniya ştatının Senatı qondarma “Dağlıq Qarabağ Respublikası”nın müstəqilliyinin tanınması üçün ABŞ Konqresinə və prezidentinə müraciət ünvanlayıb. Erməni Kütləvi İnformasiya Vasitələri isə bunu Kaliforniya ştatının “Dağlıq Qarabağ Respublikası”nın “müstəqilliyinin” “tanınması” kimi qələmə veriblər. E.Abdullayev qeyd edib ki, məsələ ilə bağlı artıq Azərbaycanın Los-Ancelesdəki baş konsulluğu Kaliforniya ştatı Senatının Dağlıq Qarabağa dair qərəzli qətnaməsi ilə bağlı bəyanat yayıb.
Qeyd olunub ki, erməni lobbisindən öz seçki kampaniyaları üçün daim külli miqdarda maliyyə dəstəyi alan, beləliklə, onlardan tam asılı vəziyyətdə olan senatorlar lobbini razı salmaq üçün bu qətnaməyə səs veriblər. Bu isə əsl siyasi korrupsiyadır. Buna başqa ad vermək mümkün deyil. Bu, həmçinin ABŞ demokratiyasının və siyasi sisteminin qüsurlu olmasının bariz göstəricisidir. Bu fakt həmin sənədin qəbul edilməsinə səs verən senatorların obyektivliyini şübhə altında qoyur. Kaliforniyalı senatorların bu hərəkəti beynəlxalq norma və prinsiplərə ziddir.
E.Abdullayev əlavə edib ki, qəbul olunan sənədə 40 senatordan 17-si, o cümlədən Senatın sədri də səs verməkdən imtina edib. Sənəd deklarativ xarakter daşıyır və heç bir hüquqi qüvvəsi yoxdur. Ancaq erməni tərəfi bunun üzərində yalançı təbliğat qurmağa, başda radikal erməni lobbisi olmaqla sadə erməniləri hər zamankı kimi aldatmağa çalışırlar.
İraqda yaşayan yezidi kürdlərin Azərbaycanın işğal olunmuş ərazilərinə köçürülməsi ilə bağlı danışan E.Abdullayev bildirib ki, bu, IV Cenevrə Konvensiyasının 49-cu bəndinin pozulması deməkdir. Diplomat qeyd edib ki, ermənilərin bu addımı beynəlxalq hüquqa ziddir və bu qanunsuz əməlləri dəfələrlə ATƏT-in Minsk qrupunun hesabatlarında da öz əksini tapıb.
Elman Abdullayev bu yaxınlarda Dağlıq Qarabağa səfər edən rusiyalı jurnalist Anastasiya Kərimova ilə bağlı bildirib ki, hazırda bununla əlaqədar araşdırma aparılır. Əgər jurnalistin rəsmi Bakının razılığı olmadan səfər etdiyi məlum olarsa, o, Azərbaycan Xarici İşlər Nazirliyinin “arzuolunmaz şəxslər” siyahısına daxil ediləcəkdir.
Elman Abdullayev, həmçinin qeyd edib ki, Dağlıq Qarabağa qanunsuz səfər edənlərin əksəriyyəti sonradan Azərbaycanın Xarici İşlər Nazirliyinə müraciət edərək bildirirlər ki, onlar işğal olunmuş torpaqlara aldadılaraq aparılıblar və həmin şəxslər nazirliyin “qara siyahı”sından çıxarılmasını xahiş edirlər.
Mətbuat xidmətinin rəhbəri deyib ki, Xarici İşlər Nazirliyinin “arzuolunmaz şəxslər” siyahısında 300-dən çox insan var. Azərbaycanın mövqeyi, bu məsələyə yanaşması prinsipialdır. Əgər işğal olunan ərazilərimizə Azərbaycan tərəfinin razılığı olmadan hansısa səfər həyata keçirilibsə, bu, təbii ki, qanunsuzdur. Belə qanunsuz səfərləri həyata keçirmiş şəxslərlə bağlı geniş araşdırmalar aparılır və nəticələr hamıya bəllidir.

Paylaş:

Baxılıb: 670 dəfə