Qabriella Battaini-Draqoni: Azərbaycan dinlər və mədəniyyətlərarası dialoqla bağlı müzakirələrin keçirildiyi məkana çevrilib

Bakı:

25 °C

64 %

5 m/s

AZ RU EN

Ana səhifə / Siyasət / Qabriella Battaini-Draqoni: Azərbaycan dinlər və mədəniyyətlərarası dialoqla bağlı müzakirələrin keçirildiyi məkana çevrilib

Qabriella Battaini-Draqoni: Azərbaycan dinlər və mədəniyyətlərarası dialoqla bağlı müzakirələrin keçirildiyi məkana çevrilib

02.09.2014 [09:18]

Sentyabrın 1-də Bakıda “Mədəniyyətlərarası dialoq: mədəniyyət və din arasında qarşılıqlı əlaqə” mövzusunda 2014-cü il mədəniyyətlərarası dialoqun dini ölçüsü üzrə Avropa Şurasının mübadilə görüşü ilə bağlı mətbuat konfransı keçirilib.
AzərTAc xəbər verir ki, mətbuat konfransında Dini Qurumlarla İş üzrə Dövlət Komitəsinin sədri Mübariz Qurbanlı, Avropa Şurası baş katibinin müavini Qabriella Battaini-Draqoni, Avropa Şurası Nazirlər Komitəsinin təhsil, mədəniyyət, idman, gənclər və ətraf mühit üzrə məruzəçi qrupunun sədri, Portuqaliyanın Avropa Şurasındakı daimi nümayəndəsi Luis Filip Kastro Mendes iştirak ediblər.
Azərbaycanın hər zaman Avropa Şurasının fəaliyyətində yaxından iştirak etdiyini deyən Mübariz Qurbanlı bildirib ki, bugünkü mübadilə görüşü sayca yeddincidir. Bu cür görüşlər Avropa Şurasının Nazirlər Komitəsinə sədrlik edən ölkələrdə keçirilir.
Komitə sədri bildirib ki, Azərbaycan dünyada dini tolerantlıq baxımından nümunəvi bir ölkə kimi tanınır. Bu gün Azərbaycanda fərqli dinlərin nümayəndələri azad, sərbəst fəaliyyət göstərirlər.
Avropa Şurasının nümayəndələri də Azərbaycanda dini tolerantlıqla bağlı müsbət fikirdədirlər.
Ermənistanın Azərbaycana qarşı işğalçılıq siyasətindən danışan M.Qurbanlı deyib ki, rəsmi Yerevan bu siyasətinə dini don geyindirmək istəyir. Ancaq hamı bilir ki, bu, açıq təcavüzdür, işğaldır. Hazırda Azərbaycanda 30 minə yaxın erməni yaşayır. Onların Bakının mərkəzindəki dini məbədi də qorunub saxlanılır. Biz hətta ölkəmizə qarşı işğalçılıq siyasəti həyata keçirən bir dövlətin dini abidəsinə toxunmamışıq. Bu, həm də Azərbaycandakı dözümlülüyün nə qədər yüksək səviyyədə olduğunu göstərir.
Avropa Şurası baş katibinin müavini Qabriela Battani-Draqoni tədbirin təşkilinə görə Azərbaycan hökumətinə təşəkkür edib.
O, Azərbaycanın dinlər və mədəniyyətlərarası dialoqla bağlı müzakirələrin keçirildiyi məkana çevirdiyini söyləyib. Qeyd edib ki, bu gün Bakıda keçirilən tədbir din və demokratiya ilə bağlıdır. Biz istəyirik ki, müxtəlif dinlərin, irqlərin nümayəndələri arasında dialoqu təşkil edək, firavan, sabit və qarşılıqlı hörmətə əsaslanan bir cəmiyyət yaradaq.
Qabriela Battani-Draqoni vurğulayıb ki, uzun müddət ərzində Azərbaycanda fərqli dinlərin nümayəndələri - katoliklər, buddistlər, müsəlmanlar birgə yaşayıblar, bir-birilərinin adət-ənənələrinə hörmətlə yanaşıblar. Bu qədim tarixə malik ənənə cəmiyyətdə müxtəlifliyi qorumağa şərait yaradır.
Luis Filip Kastro Mendes isə Azərbaycanın hər zaman mədəniyyətlərarası dialoqa xüsusi önəm verən bir ölkə olduğunu söyləyib.

Paylaş:

Baxılıb: 729 dəfə