Sədaqət Vəliyeva: Yas və toy mərasimlərinin tənzimlənməsilə bağlı geniş maarifləndirmə işləri aparılmalıdır

Bakı:

24 °C

68 %

3 m/s

AZ RU EN

Ana səhifə / Siyasət / Sədaqət Vəliyeva: Yas və toy mərasimlərinin tənzimlənməsilə bağlı geniş maarifləndirmə işləri aparılmalıdır

Sədaqət Vəliyeva: Yas və toy mərasimlərinin tənzimlənməsilə bağlı geniş maarifləndirmə işləri aparılmalıdır

26.09.2014 [09:34]

“Bu gün Azərbaycan ictimaiyyəti üçün aktuallıq kəsb edən məsələlərdən birini də məhz yas və toy mərasimlərinin keçirilməsinin tənzimlənməsi yollarının müzakirəsi təşkil edir. Düşünürəm ki, yas və toy mərasimləri adət-ənənələrimizdən qaynaqlandığından elə cəmiyyətin bütün üzvlərinin dəstəyilə tənzimlənməlidir”. Bunu Yeni Azərbaycan Partiyası (YAP) Nizami rayon təşkilatının sədri, Milli Məclisin deputatı Sədaqət Vəliyeva deyib.
Deputatın fikrincə, yas və toy mərasimlərində israfçılığa yol vermək həm dini baxımdan günahdır, həm də ailələrin büdcələrinə zərərdir: “Əslində, yas mərasimində mərhumun ruhunun şad olması üçün “Quran-i Kərim” oxunmalı, dualar edilməlidir. Əgər kimsə ehsan vermək istəyirsə bunu uşaqlar, yaxud ahıllar evində də təşkil edə bilər. Bunun, əlbəttə ki, böyük savabı var. Lakin yas mərasiminin keçirildiyi məkanda bir neçə cür yeməyin bişirilməsi və məclisdən sonra onun böyük bir hissəsinin qalması, yaxud atılması isə çox böyük günahdır. Dini Qurumlarla İş üzrə Dövlət Komitəsinin sədri Mübariz Qurbanlı bu məsələ ilə əlaqədar mətbuata verdiyi müsahibələrində, açıqlamalarında çox yaxşı qeyd edib ki, yalnız yemək verməklə vəfat etmiş əzizinin ruhunu şad edəcəyini düşünənlər səhv edirlər. Ona görə də, yas mərasimlərilə əlaqədar bütün hərəkətləri dinimizin qaydalarına uyğun şəkildə qurmalıyıq”.
Sədaqət Vəliyeva bildirib ki, toy məclislərində böyük israfçılığa yol verənlər də çoxluq təşkil edir: “Bu gün bir çox şadlıq evlərində həddindən artıq israfçılığa gətirib çıxaran toy məclislərinə rast gəlirik. Masaların üzərinə onlarla çeşid salat, yemək və s. düzürlər. Düşünmək lazımdır ki, toy məclisinə yığışanlar ailə quran gənclərin sevincinə dəstək olmağa çalışırlar. Lakin həddindən artıq təmtəraq və israfçılıq bəzi hallarda ailə quran gənclərin xoşagəlməz hadisələrlə qarşılaşmasına da gətirib çıxarır. Elə bir neçə gün öncə qərargaha müraciət edən bir xanım bildirib ki, həyat yoldaşı şadlıq sarayına olan borcuna görə çətin vəziyyətə düşüb. Bu səbəbdən də, həm toy, həm də yas mərasimlərinin keçirilməsində insanlar özləri müəyyən korrektələr etməlidir”.
Toy və yas mərasimlərinin keçirilməsinin qanunla tənzimlənməsi məsələsinə toxunan deputat vurğulayıb ki, bu məsələdə qanunvericilik deyil, daha çox cəmiyyət özü aktiv iştirak etməlidir: “Bir halda ki, yas və toy mərasimləri adət-ənənələrimizdən qaynaqlanır, o zaman cəmiyyətimizin ağsaqqalları, ziyalıları, din xadimləri bu işdə fəal olmalıdır. Eyni zamanda, mətbuat yas və toy mərasimlərinin tənzimlənməsilə bağlı geniş maarifləndirmə işləri aparmalıdır. Düşünürəm ki, bu yolla mövcud neqativ halları tezliklə aradan qaldıra bilərik”.

Paylaş:

Baxılıb: 1587 dəfə