“Freedom House” təşkilatının Azərbaycana qarşı mövqeyi qərəzli və ədalətsizdir

Bakı:

22 °C

57 %

9 m/s

Əlaqə

AZ RU EN

Ana səhifə / Siyasət / “Freedom House” təşkilatının Azərbaycana qarşı mövqeyi qərəzli və ədalətsizdir

“Freedom House” təşkilatının Azərbaycana qarşı mövqeyi qərəzli və ədalətsizdir

04.07.2015 [10:26]

Təşkilat erməni lobbisinin sifarişini yerinə yetirərək ölkəmizin beynəlxalq nüfuzuna zərbə vurmağa çalışır
Birinci Avropa Oyunları başa çatsa da, bu möhtəşəm tədbir beynəlxalq aləmin gündəmindədir. Bir sıra xarici KİV-lər, o cümlədən, Avropanın idman ictimaiyyətinin tanınmış nümayəndələri Azərbaycanın bu Oyunları yüksək səviyyədə təşkil ediyini vurğulayırlar. Yəni, dünya miqyasında Azərbaycanın bu uğuru etiraf olunmaqdadır.
Amma müəyyən dairələr də var ki, bu Oyunların gedişi zamanı Azərbaycanın nüfuzuna zərbə vurmağa çalışırdılar. Bunlar Azərbaycanın müstəqil siyasət həyata keçirməsini, sürətli inkişafını qəbul edə bilməyən islamofob və ermənipərəst dairələrdir. “Freedom House” da bu qəbildən olan təşkilatlardandır. Əlbəttə, bu təşkilatın hesabatlarında Azərbaycanın daim qara rəngdə təsvir olunması, guya Azərbaycanda insan haqlarının pozulması iddiaları təəccüblü deyil və təsadüfi xarakter daşımır. “Freedom House”un mövqeyi hər zaman ölkəmizin beynəlxalq imicinə zərbə vurmağa yönəlib. Erməni lobbisinin maliyyəsi ilə fəaliyyət göstərən bu təşkilat hər zaman ölkəmizin iqtisadi, siyasi, demokratik və digər sahələrdəki inkişafını görməzdən gələrək cəmiyyətimizi yalnız qara rəngdə təqdim etməyə çalışır. Amma sevindirici haldır ki, bu tipli təşkilatların cəhdlərinə baxmayaraq, dünyanın nüfuzlu beynəlxalq qurumları Azərbaycanın uğurlarını xüsusi vurğulayırlar. Kimin nə deməsindən asılı olmayaraq, Azərbaycan demokratik dəyərlərin bərqərar olduğu müasir hüquqi dövlətdir. Demokratik, hüquqi dövlət, vətəndaş cəmiyyəti quruculuğu, dünya birliyinə fəal inteqrasiya müstəqil Azərbaycanın əsas hədəflərindən biri kimi elan olunub. Ölkə rəhbərliyi tərəfindən məqsədli və planlı şəkildə həyata keçirilən demokratikləşmə prosesi sosial, siyasi, iqtisadi olmaqla cəmiyyət həyatının bütün sferalarını əhatə edir. Ölkəmizdə demokratiyanın ən mühüm göstəricilərindən biri kimi, vətəndaş cəmiyyəti quruculuğu prosesi uğurla irəliləyir. Bu gün Azərbaycanda sürətlə artan vətəndaş cəmiyyəti institutları, yüzlərlə qeyri-hökumət təşkilatı dövlətin güclü dəstəyini hiss edir.
“Freedom House”, həmçinin, Ermənistan-Azərbaycan, Dağlıq Qarabağ münaqişəsinə münasibətdə də işğalçı dövlətin tərəfini tutur. Belə ki, təşkilat beynəlxalq hüququn norma və prinsiplərini pozaraq Azərbaycanı “qeyri-azad”, Ermənistanı isə işğal altındakı Dağlıq Qarabağla birlikdə “qismən azad” ölkələr sırasında təqdim edir. Bütün dünya ölkələri, eləcə də, BMT, ATƏT, Avropa Şurası, İslam Əməkdaşlığı Təşkilatı və digər beynəlxalq təşkilatlar Dağlıq Qarabağı Azərbaycan torpağı kimi qəbul etdikləri halda “Freedom House”un Azərbaycanın Ermənistan tərəfindən işğal olunmuş ərazilərini mübahisəli ərazilər şəklində göstərməsi, əslində, qurumun hansı qüvvələrin, maraq qruplarının əlində alətə çevrildiyindən xəbər verir. Bunlar isə, əlbəttə ki, sözügedən təşkilatın beynəlxalq hüquqa, demokratiya, insan hüquq və azadlıqları prinsiplərinə saymazyana münasibətini göstərir. Axı, Ermənistanda baş verən hadisələr, mülki vətəndaşların gülləbaran edilməsi, yüzlərlə insanın siyasi əqidəsinə görə həbs olunması və bir çoxlarının hələ də həbsxanalarda saxlanması, söz və mətbuat azadlığının olmaması bu ölkədə insan haqlarının kobud şəkildə pozulmasından xəbər verir. Bu da heç kəsə sirr deyil ki, hər il çoxlu sayda insan siyasi mövqeyinə görə üzləşdiyi təzyiqlər səbəbindən Ermənistanı tərk etmək məcburiyyətində qalır.
Üstəlik Ermənistan tərəfi Azərbaycan torpaqlarını işğal altında saxlamaqla beynəlxalq hüququn prinsiplərini kobud şəkildə pozmaqda davam edir. Məhz bu işğal nəticəsində öz doğma torpaqlarından qovulan, qaçqın və məcburi köçkün həyatı yaşamağa məcbur edilən bir milyondan artıq azərbaycanlı hüquqlarının bərpa ediləcəyi günü görmək arzusu ilə yaşayır. Belə olan təqdirdə, Ermənistanın “qismən azad” adlandırılması “Freedom House” təşkilatının hesabatların hazırlanmasına nə qədər qeyri-ciddi və məsuliyyətsiz mövqedən yanaşdığını göstərir. Bütün bunları vurğulayaraq bir daha deyə bilərik ki, “Freedom House” təşkilatının Azərbaycana qarşı mövqeyi tam qərəzli və ədalətsizdir.
Nardar BAYRAMLI

Paylaş:

Baxılıb: 702 dəfə