Tərtərdə seçki hüququ üzrə ixtisaslaşdırılmış kurslar təşkil edilib

Bakı:

29 °C

53 %

13 m/s

Əlaqə

AZ RU EN

Ana səhifə / Siyasət / Tərtərdə seçki hüququ üzrə ixtisaslaşdırılmış kurslar təşkil edilib

Tərtərdə seçki hüququ üzrə ixtisaslaşdırılmış kurslar təşkil edilib

25.08.2015 [10:10]

Avqustun 24-də 95 saylı Tərtər seçki dairəsi Dairə Seçki Komissiyasında aşağı seçki komissiyalarının katibləri, üzvləri və məntəqə seçki komissiyalarının sədrləri üçün seçki hüququ üzrə ixtisaslaşdırılmış kurslara başlanılıb. Kurslar Azərbaycan Prezidentinin 2011-ci il 27 dekabr tarixli Sərəncamı ilə təsdiq edilmiş “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”na əsasən aşağı seçki komissiyalarının üzvlərinin maarifləndirilməsi məqsədilə təşkil olunub.
AZƏRTAC xəbər verir ki, Dairə Seçki Komissiyasının 9 üzvünün, 38 seçki məntəqəsi sədrinin, habelə qaçqın və köçkün rayonlarının seçki məntəqələri sədrlərinin iştirak etdikləri kursun ilk günündə Tərtər rayon İcra Hakimiyyəti başçısının müavini Ramiz Şabanovun “Seçici siyahıları ilə işin aparılması, seçkiqabağı təşviqatın aparılmasına şərait yaradılması, bildirişlərin seçicilərə çatdırılması və sair bu kimi istiqamətlərdə yerli icra və bələdiyyə qurumlarının rolu və onların seçki komissiyaları ilə səmərəli qarşılıqlı əlaqələrinin qurulması” mövzusunda məruzəsi dinlənilib.
Daha sonra Tərtər rayon Məhkəməsinin hakimi Həsən Qəniyev çıxış edərək, seçki hüququ və onun təminatının qanunvericilik əsasları, aşağı seçki komissiyaları və məhkəmələr tərəfindən seçki hüququnun qorunması mexanizmlərindən danışıb.
95 saylı seçki dairəsi Dairə Seçki Komissiyasının sədri Həmid Mehdiyev DSK üzvləri və məntəqə seçki komissiyaları sədrlərinin peşəkarlıq səviyyəsinin yüksəldilməsi və seçki hüququ ilə bağlı biliklərinin artırılması baxımından kursların əhəmiyyətini yüksək qiymətləndirib. Bildirib ki, kurslar komissiya üzvlərinin maarifləndirilməsi məqsədi daşımaqla yanaşı, həm də onların siyasi biliklərinin artırılmasında, həyata keçirdikləri hər bir seçki proseduruna məsuliyyətlə yanaşmalarında, seçkilərin demokratik və şəffaf keçirilməsində böyük təsirə malikdir.
Kurs çərçivəsində keçirilən seminarda DSK-nın sədri seçici siyahıları ilə iş qaydasına dair iştirakçılara geniş məlumat verib, mövzular ətrafında fikir mübadiləsi aparılıb.
Avqustun 24-də 48 saylı Yevlax şəhər, 49 saylı Yevlax-Mingəçevir, 81 saylı Beyləqan, 82 saylı Ağcabədi şəhər, 83 saylı Ağcabədi-Füzuli, 84 saylı Füzuli, 93 saylı Bərdə şəhər, 94 saylı Bərdə kənd, 118 saylı Ağdam şəhər, 119 saylı Ağdam kənd, 121 saylı Laçın seçki dairəsi dairə seçki komissiyalarında da müvafiq ixtisaslaşdırılmış kurslar başlayıb.

Paylaş:

Baxılıb: 565 dəfə