Azərbaycan həqiqətləri Efiopiyanın dövlət qəzetində

Bakı:

22 °C

68 %

4 m/s

Əlaqə

AZ RU EN

Ana səhifə / Siyasət / Azərbaycan həqiqətləri Efiopiyanın dövlət qəzetində

Azərbaycan həqiqətləri Efiopiyanın dövlət qəzetində

13.11.2015 [10:05]

Efiopiyanın Azərbaycanda səfərdə olmuş ən böyük oxucu kütləsinə malik dövlət qəzeti “Əddis zəmən”in baş redaktorunun müavini Araya Getaço ölkəmizin inkişafı, iqtisadi qüdrəti, zəngin mədəniyyəti, geostrateji əhəmiyyəti və güclü dövlətçiliyimiz barədə silsilə məqalələr dərc etdirib.
Araya Getaço “Azərbaycanlıların torpağı: bir çox haqsızlıqlarla üzləşən tarixi millət” adlı məqaləsində Azərbaycan xalqının üzləşdiyi tarixi ədalətsizlikdən, torpaqlarımızın Ermənistan tərəfindən işğal edilməsindən və 1 milyon azərbaycanlının tarixi torpaqlarından qovulmasından bəhs edir. Müəllif məqaləyə efiop atalar sözü ilə başlayır: “Sülh şəraitində yaşamağım üçün qonşuluğumu sülh şəraitində saxlamağa çalışmalıyam, amma nə qədər sülhsevər olsam da qonşumun sülhü sevməməsi və istəməməsi mənim də bu istəyimi sarsıdır”.
O, azərbaycanlıların məhz bu problemlə üzləşdiyini xüsusi vurğulayır. Hərbi diktatura tərəfindən idarə olunan Ermənistanın azərbaycanlılara qarşı etdiyi zülmün şəxsən şahidi olan efiop jurnalist Quba məzarlığında olduğunu və Ermənistan tərəfindən 1918-ci ildə azərbaycanlılara qarşı törədilən soyqırımı qurbanlarının kütləvi məzarlığını ziyarət edərkən vahimə içində olduğunu vurğulayır. Azərbaycan hökumətinin bu qurbanların xatirəsinə memorial kompleks ucaltdığını qeyd edir.
Məqalədə bildirilir ki, ermənilərin Azərbaycan xalqına qarşı vəhşiliklərini əks etdirən digər abidə Azərbaycanın paytaxtı Bakı şəhərində yerləşir. Bu, Xocalı abidəsidir. 1992-ci il fevralın 26-da Xocalı şəhərinə hücum edən erməni hərbçilərinin 83-ü uşaq, 106-sı qadın və 70-i yaşlı olmaqla 613 azərbaycanlını vəhşicəsinə qətlə yetirdiyini qeyd edən jurnalist 1245 azərbaycanlının əsir düşdüyünü və onlardan 150-sinin bu günədək aqibətinin bəlli olmadığını vurğulayır.
Azərbaycanlılara qarşı ədalətsizliyin burada bitmədiyini yazan müəllif Ermənistan ordusunun cinayətlərinin çox olduğunu bildirir. Müəllif bütün bu cinayətlərin Ermənistanı idarə edən hərbi rejim tərəfindən törədildiyini qeyd edir.
Araya Getaço Dağlıq Qarabağın Azərbaycanın ərazisi olduğunu xatırladaraq, bu torpaqların Ermənistanın hərbi xuntası tərəfindən zəbt edildiyini və bu işğal nəticəsində 1 milyon azərbaycanlının öz torpaqlarından qovulduğunu vurğulayır. Bu çətinliklərə baxmayaraq, Azərbaycan hökumətinin qaçqın və məcburi köçkünlər üçün müasir evlər, məktəblər inşa etdiyini və onları iş yerləri ilə təmin etdiyini yazır.
Efiopiyalı jurnalist Azərbaycan Respublikası Prezidentinin İctimai-siyasi məsələlər üzrə köməkçisi Əli Həsənovla, Xarici İşlər Nazirliyinin nümayəndələri, Azərbaycanın digər rəsmiləri və ictimaiyyətin təmsilçiləri ilə görüşlərini və söhbətlərini xatırladır. Azərbaycan tərəfinin Ermənistan-Azərbaycan, Dağlıq Qarabağ münaqişəsinin sülh yolu ilə həllinin tərəfdarı olduğunu qeyd edir. Rəsmi şəxslərə, ictimaiyyət nümayəndələrinə və həmkarları olan jurnalistlərə istinad edən efiopiyalı jurnalist Ermənistanın işğalı altında olan ərazilərin dünya ictimaiyyəti tərəfindən Azərbaycanın tərkib hissəsi kimi qəbul edildiyini diqqətə çatdırır.
Müəllif Azərbaycana səfəri ilə bağlı təəssüratlarını da bölüşür. O, xüsusilə Heydər Əliyev Mərkəzinin onda yüksək təəssürat yaratdığını bildirir, bu Mərkəzin ən müasir texnologiya ilə təchiz edildiyini vurğulayır. Jurnalist Efiopiya xalqının milli lideri Meles Zenavinin adını daşıyan Fondun Azərbaycanın təcrübəsindən yararlanmasının vacibliyini qeyd edir.
Araya Getaço məqaləsini “Yaşasın Azərbaycan!” sözləri ilə bitirir.

Paylaş:

Baxılıb: 642 dəfə