Azərbaycan və Çin arasında kommunal təyinatlı nəqliyyat vasitələrinin təhvil-təslim aktı imzalanıb

Bakı:

27 °C

48 %

8 m/s

AZ RU EN

Ana səhifə / Siyasət / Azərbaycan və Çin arasında kommunal təyinatlı nəqliyyat vasitələrinin təhvil-təslim aktı imzalanıb

Azərbaycan və Çin arasında kommunal təyinatlı nəqliyyat vasitələrinin təhvil-təslim aktı imzalanıb

28.05.2016 [08:51]

Mayın 27-də Bakıda Azərbaycan Respublikası Hökuməti və Çin Xalq Respublikası Hökuməti arasında 50 kommunal təyinatlı nəqliyyat vasitəsinin təhvil-təslim edilməsi ilə bağlı akt imzalanıb.
AZƏRTAC xəbər verir ki, Azərbaycan Respublikası Hökuməti və Çin Xalq Respublikası Hökuməti arasında 2015-ci il yanvarın 27-də və fevralın 2-də mübadilə edilmiş notalara əsasən, Çin Hökuməti Azərbaycan Hökumətinə 50 kommunal təyinatlı nəqliyyat vasitəsi təqdim edib.
Çin Xalq Respublikası Hökuməti tərəfindən ayrılmış texniki yardım hesabına həmin 50 xüsusi təyinatlı nəqliyyat vasitəsi 2016-cı il aprelin 9-da Bakıya çatdırılıb. Onların sırasına məişət tullantıları daşıyan ortatutumlu, çirkab suları soran (assenizator), sudaşıyan, küçəsüpürən kommunal təyinatlı nəqliyyat vasitələri daxildir. Nəqliyyat vasitələri “China Civil Engneering Construction Corporation” şirkətinin istehsalıdır.
Aprelin 11-də Çin Xalq Respublikasından Azərbaycana gətirilmiş nəqliyyat vasitələrinə Biləcəri stansiyasında baxış keçirilib.
Tədbirdə Azərbaycan Respublikası Nazirlər Kabinetinin, “Azərbaycan Dəmir Yolları” QSC-nin, “Azəravtoyol” ASC-nin və Çin Xalq Respublikasının Azərbaycandakı səfirliyinin nümayəndələri iştirak ediblər. Çıxış edənlər Azərbaycanla Çin arasında qarşılıqlı əlaqələrin inkişaf etməsindən məmnun qaldıqlarını bildiriblər.
Tədbir çərçivəsində “Azəravtoyol” Açıq Səhmdar Cəmiyyətinə Azərbaycan Respublikası və Çin Xalq Respublikası hökumətləri arasında 2015-ci ildə imzalanmış texniki-iqtisadi əməkdaşlıq sazişi çərçivəsində ölkəmizə gətirilən və “China Civil Engneering Construction Corporation” şirkətinin istehsalı olan 50 kommunal təyinatlı xüsusi maşından dördü verilib.
Mayın 27-də isə Azərbaycan Respublikası Hökuməti və Çin Xalq Respublikası Hökuməti arasında 50 kommunal təyinatlı nəqliyyat vasitəsinin təhvil-təslim edilməsi ilə bağlı akt imzalanıb.
Azərbaycan Respublikası Baş nazirinin müavini Abid Şərifov bildirib ki, Azərbaycan və Çin hökumətləri arasında dostluq əlaqələri bütün sahələrdə inkişaf edir. Bu dostluq və əməkdaşlıq əlaqələrinin yaranmasında hər iki ölkənin rəhbərləri birgə səy göstərib və töhfələrini veriblər. Bu gün baş tutan təhvil-təslim aktı da bu əlaqələrin bəhrəsi və bariz nümunəsidir. Bu münasibətlər daimidir, hər iki ölkə yaranmış əlaqələr çərçivəsində mövcud əlaqələrin sıx olmasına çalışacaq.
Çinin Azərbaycandakı səfiri Xun Tsyuin ölkələrimiz arasında əlaqələrin inkişaf səviyyəsinin məmnunluq doğurduğunu bildirib. Çindən Azərbaycana 50 kommunal təyinatlı xüsusi maşının gətirilməsini və digər layihələri bu münasibətlərin Çin tərəfindən dəyərləndirilməsi kimi ifadə etmək olar. Bu münasibətlərin qorunması və daimi olması bizim üçün vacibdir.
Azərbaycan Respublikası Hökuməti və Çin Xalq Respublikası Hökuməti arasında 50 kommunal təyinatlı nəqliyyat vasitəsinin təhvil-təslim edilməsi ilə bağlı aktı Çinin ölkəmizdəki səfiri Xun Tsyuin və “Azəravtoyol” Açıq Səhmdar Cəmiyyətinin sədri Saleh Məmmədov imzalayıblar.
Xüsusi təyinatlı maşınlar Azərbaycan-Çin dostluq münasibətlərinin və texniki-iqtisadi əməkdaşlığın inkişafı məqsədilə Azərbaycan Respublikası Hökumətinə 4,5 milyon ABŞ dolları məbləğində ayrılan növbəti qrant yardımı hesabına təqdim olunub.
Gətirilən 50 maşından 4-ü (1 çirkab suları sovuran, 1 su daşıyan və 2 yolları süpürən maşın) “Azəravtoyol” Açıq Səhmdar Cəmiyyətinə verilib. Digər maşınlar isə respublika üzrə müvafiq dövlət qurumlarına paylanılacaq.

Paylaş:

Baxılıb: 734 dəfə