Fransalı jurnalistlər Milli Məclisdə olublar

Bakı:

26 °C

49 %

1 m/s

Əlaqə

AZ RU EN

Ana səhifə / Siyasət / Fransalı jurnalistlər Milli Məclisdə olublar

Fransalı jurnalistlər Milli Məclisdə olublar

08.10.2016 [10:11]

Oktyabrın 7-də Milli Məclis sədrinin müavini Bahar Muradova Azərbaycanda səfərdə olan fransalı jurnalistlər Klod Leblank və Emmanuel Dupuy ilə görüşüb.
Milli Məclisin mətbuat xidmətindən AZƏRTAC-a bildiriblər ki, Bahar Muradova qonaqları salamlayaraq, Azərbaycan-Fransa münasibətlərindən danışıb. Bildirilib ki, ölkələrimiz arasında iqtisadi, diplomatik, humanitar sahələrdə əməkdaşlıq yüksələn xətlə inkişaf edir. Azərbaycanda Fransa mədəniyyətinə böyük maraq var. Dövlət və hökumət rəsmiləri, habelə vətəndaş cəmiyyətinin nümayəndələri arasında sıx əlaqələr mövcuddur. Diqqətə çatdırılıb ki, ölkəmiz açıq cəmiyyət siyasəti həyata keçirir. Biz bütün dünyaya açığıq və Avropanın da bizə qapılarını açmasında maraqlıyıq. Bahar Muradova münasibətlərin inkişafında medianın rolunu yüksək dəyərləndirib. Milli Məclisdə KİV nümayəndələri üçün yaradılmış şəraitdən danışıb, mətbuatın vəzifəsinin obyektiv, qərəzsiz, bitərəf məlumat yaymaqdan ibarət olduğunu deyib.
Sədr müavini qanunverici orqanın işindən söhbət açaraq bildirib ki, Milli Məclisdə dünyanın 81 ölkəsi ilə parlamentlərarası əlaqələr üzrə işçi qrupları var. O, Azərbaycan-Fransa dostluq qrupuna ölkənin birinci xanımı, parlamentin deputatı Mehriban Əliyevanın rəhbərlik etdiyini söyləyib. Mehriban Əliyevanın iki ölkə arasında bütün istiqamətlərdə əlaqələrin möhkəmləndirilməsinə göstərdiyi xidmətlərin əhəmiyyətindən danışıb. Qeyd edilib ki, birinci xanım Mehriban Əliyevanın rəhbərlik etdiyi Heydər Əliyev Fondu və Fransa ilə parlamentlərarası əlaqələr üzrə işçi qrupu ölkəmizin mədəniyyəti, tarixi keçmişi və bu günü barədə geniş məlumatların dünya ictimaiyyətinə çatdırılmasında mühüm rol oynayır.
Sonra Bahar Muradova rəhbərlik etdiyi insan hüquqları komitəsinin fəaliyyəti barədə məlumat verib. Bildirilib ki, komitənin tərkibində həm iqtidar, həm müxalifət, eyni zamanda, mətbuat sahəsində fəaliyyət göstərmiş deputatlar təmsil olunurlar. Parlamentdə vətəndaşların hüquqlarının qorunması daim diqqət mərkəzində saxlanılır. Sədr müavini Milli Məclisdə insan hüquq və azadlıqlarının qorunması sahəsində bir sıra vacib qanunların qəbul olunduğunu, bəzi sənədlərin isə təkmilləşdirilməsi ilə bağlı müvafiq dəyişikliklərin edildiyini söyləyib.
Söhbət zamanı Ermənistan-Azərbaycan, Dağlıq Qarabağ münaqişəsi barədə qonaqlara ətraflı məlumat verilib. Bildirilib ki, ölkəmiz problemin beynəlxalq hüquq normaları çərçivəsində həllinə tərəfdardır. Biz BMT Təhlükəsizlik Şurasının qəbul etdiyi 4 qətnamənin yerinə yetirilməsini istəyirik. Münaqişə nəticəsində qaçqın və məcburi köçkün düşmüş insanların durumu barədə danışan Bahar Muradova diqqətə çatdırıb ki, dövlətimiz tərəfindən bu insanlar üçün digər ölkələrə nümunə olacaq müxtəlif proqramlar hazırlanıb həyata keçirilir. Lakin onların öz doğma yurdlarında yaşamaq hüququ təmin edilməlidir.
Fransalı jurnalistlər səmimi görüşə və geniş məlumata görə minnətdarlıqlarını ifadə edib, onları maraqlandıran bir sıra məsələlərlə bağlı suallarını Milli Məclis sədrinin müavininə ünvanlayıblar. Jurnalistlərin sualları ətraflı cavablandırılıb.

Paylaş:

Baxılıb: 545 dəfə