“Strateji yol xəritəsində iqtisadiyyatımızın reallıqları nəzərə alınıb”

Bakı:

27 °C

78 %

6 m/s

Əlaqə

AZ RU EN

Ana səhifə / Siyasət / “Strateji yol xəritəsində iqtisadiyyatımızın reallıqları nəzərə alınıb”

“Strateji yol xəritəsində iqtisadiyyatımızın reallıqları nəzərə alınıb”

08.12.2016 [10:10]

Prezident İlham Əliyev “Milli iqtisadiyyat və iqtisadiyyatın əsas sektorları üzrə strateji yol xəritələrinin təsdiq edilməsi haqqında” Fərman imzalayıb. Eyni zamanda, Prezidentin 2016-cı il 16 mart tarixli 1897 nömrəli Sərəncamı ilə “Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri” təsdiq edilmişdi. Həmin istiqamətlərə müvafiq olaraq inkişaf planlarının işlənilməsini təmin etmək üçün İşçi qrupu yaradılmışdı. Sərəncama əsasən, İşçi qrupu yerli və xarici ekspertlərin, təcrübəli mütəxəssislərin, məsləhətçi şirkətlərin və elmi təşkilatların iştirakı ilə, ölkədə fəaliyyət göstərən beynəlxalq təşkilatlarla səmərəli əməkdaşlıq şəraitində milli iqtisadiyyat və iqtisadiyyatın on bir əsas sektoru üzrə strateji yol xəritələrinin layihələrini hazırlamışdı. Strateji yol xəritələri 2016-2020-ci illər üçün iqtisadi inkişaf strategiyasını və tədbirlər planını, 2025-ci ilədək olan dövr üçün uzunmüddətli baxışı və 2025-ci ildən sonrakı dövrə hədəf baxışı özündə ehtiva edir. Layihələr açıq müzakirəyə verilib və yekun sənəd tərtib edilərkən maraqlı tərəflərin, o cümlədən vətəndaş cəmiyyəti təsisatlarının və vətəndaşların çoxsaylı rəy və təklifləri nəzərə alınıb.
Prezidentin Fərmanını “Publika.az”a şərh edən iqtisadçı-ekspert Vüqar Bayramov strateji yol xəritələrinin hazırlanmasına cəlb edilən mütəxəssislərin sırasında yer aldığını bildirib: “Bu proqramın əvvəlkilərdən əsas fərqi ondan ibarətdir ki, ayrı-ayrı fəaliyyətlər üzrə müddətlər qeyd edilib. Eləcə də onların reallaşdırılması yönündə konkret indiqatorlar müəyyənləşdirilib. Bu da hər bir fəaliyyətin nəticələrini qiymətləndirməyə imkan verəcək”.
Ekspert deyib ki, 3 dövrdə fəaliyyətlərin həyata keçirilməsi nəzərdə tutulur: “Yaxın dövrdə - 2016-2020-ci illər üçün iqtisadi inkişaf strategiyası və tədbirlər planı həyata keçiriləcək. Hansı ki, artıq onun icrasına başlanılıb. Növbəti tədbirlər planı 2025-ci ilədək olan dövr üçün uzunmüddətli baxışı və 2025-ci ildən sonrakı dövrə hədəf baxışı özündə birləşdirir. Azərbaycan ölkə iqtisadiyyatının 2025-ci ilə qədər və sonrakı illər üçün “yol xəritəsi”nin işlənməsi üçün “Mckinsey & Company” beynəlxalq konsaltinq şirkətini cəlb edib. Onu da bildirim ki, 2016-2020-ci illərdə həyata keçirilən islahatlar 2025-ci ildəki tədbirlər üçün baza rolunu oynayacaq. Yeni strateji yol xəritələri biznes mühitinin yaxşılaşdırılması, rəqabət mühitinin təmin edilməsini, əhalinin mənzil təminatının yaxşılaşdırılması, ağır maşınqayırma, neft-qaz sənayesinin, turizmin inkişafı və sair məsələləri nəzərə tutur”.
V.Bayramovun sözlərinə görə, strateji yol xəritəsi Azərbaycan iqtisadiyyatının reallıqları nəzərə alınaraq hazırlanmış bir sənəddir: “Sözsüz ki, onun icrasının çox yüksək səviyyədə təşkil edilməsi çox vacibdir. Bu proqramın ölkə iqtisadiyyatına təsirləri onun icrasından asılı olacaq. Eyni zamanda, bu tədbirlər planı strateji baxımdan Azərbaycan iqtisadiyyatı üçün vacibdir. Ümumiyyətlə, islahatlara aparan yol strateji olur”.
Ekspert hesab edir ki, həyata keçirilən islahatların real nəticələrini görmək üçün təxminən 3 il gözləmək lazımdır.

Paylaş:

Baxılıb: 523 dəfə