Musa Quliyev: Azərbaycanda qeyri-neft sektorunun inkişafı strateji düşüncə ortaya qoyulmaqla həyata keçirilir

Bakı:

23 °C

54 %

1 m/s

AZ RU EN

Ana səhifə / Siyasət / Musa Quliyev: Azərbaycanda qeyri-neft sektorunun inkişafı strateji düşüncə ortaya qoyulmaqla həyata keçirilir

Musa Quliyev: Azərbaycanda qeyri-neft sektorunun inkişafı strateji düşüncə ortaya qoyulmaqla həyata keçirilir

19.04.2017 [10:00]

Prezident İlham Əliyevin Sədrliyi ilə aprelin 17-də Yevlaxda keçirilən qeyri-neft ixracatçılarının respublika müşavirəsi çox vacib bir tədbirdir. Dövlətimizin başçısının söylədiyi kimi, Azərbaycan öz inkişafının yeni qeyri-neft dövrünə qədəm qoyub. Bu proses kifayət qədər uğurla planlaşdırılmış strateji düşüncə ortaya qoyulmaqla dünya və Azərbaycan reallıqları nəzərə alınmaqla həyata keçirilir.
Bu fikirləri Milli Məclisin deputatı Musa Quliyev AZƏRTAC-a açıqlamasında bildirib.
“Prezidentin dəfələrlə sahibkarlarla görüşü olub. Regionların sosial-iqtisadi inkişafı ilə bağlı dövlət proqramları qəbul olunub. Dəfələrlə sahibkarlığın inkişafı üçün dövlət yardımları olub, güzəştlər, imtiyazlar müəyyənləşdirilib. Bu gün dövlətimizin məqsədyönlü şəkildə apardığı tədbirlərin nəticəsində Azərbaycanda qeyri-neft sektoru uğurla inkişaf edir. Dünyada iqtisadi böhranın ağırlaşması, hərbi-siyasi vəziyyətin gərginləşməsi, neftin qiymətinin kəskin aşağı düşməsi nəticəsində bir çox ölkələrdə dərin iqtisadi böhranlar yaşanır. Amma Azərbaycan bu böhrandan kifayət qədər az itkilərlə çıxıb. Bu da Azərbaycan Prezidentinin strateji, uzaqgörən siyasətinin əyani nümunəsi və nəticəsidir”, - deyə deputat vurğulayıb.
Müşavirədə dövlətimizin başçısının sahibkarların, dövlət qurumlarının qarşısında mühüm vəzifələr qoyduğunu vurğulayan M.Quliyev deyib: “Dövlətimizin başçısı qarşıya çox mühüm vəzifələr qoydu. Bunlardan biri aqrar sektorun inkişaf etdirilməsindən ibarətdir. Belə ki, ənənəvi üzümçülük, pambıqçılıq, baramaçılıq, tütünçülük, bağçılıq, xüsusilə fındıqçılıq kimi sahələrin inkişafına təkan verilməlidir. Bu məhsulların istehsalının artırılması nəticəsində Azərbaycana daha çox xarici valyuta gələcək. Yerli məhsullarımız Azərbaycan brendi altında dünya bazarlarına çıxacaq.
Müşavirədə Azərbaycan Prezidenti ərzaq təhlükəsizliyi məsələsini də ön plana çəkdi, Azərbaycan əhalisinin keyfiyyətli və ölkə daxilində istehsal olunan ərzaqla tam təmin olunmasını, eyni zamanda, ixracı əvəz edəcək məhsulların Azərbaycanda istehsalını qarşıya hədəf qoydu. Azərbaycan brendinin dünyada təbliği, xarici bazarlara çıxması üçün sahibkarların, hökumət strukturlarının vəzifələrini müəyyənləşdirdi. Azərbaycanda demoqrafik proseslər, əhalinin urbanizasiya siyasətinin uğurla həyata keçirilməsi, regionlarda, kənd yerlərində yaşayan insanların məşğulluğunun təmini, onlara yüksək əməkhaqqının verilməsi məsələsi də müşavirədə diqqət mərkəzində oldu”.
Deputat bildirib ki, müşavirədə aqrar sektorla yanaşı, turizm, nəqliyyat, kommunikasiya, informasiya texnologiyaları sahələrinin daha da inkişafı və bütövlükdə Azərbaycanın qeyri-neft sektorunda ixrac potensiallı sahələrinin tərəqqisi ön plana çəkilib. Qarşıya qoyulan məsələləri reallaşdırdıqca Azərbaycan vətəndaşları öz sosial, mədəni, iqtisadi həyatında hökumətin apardığı bu uğurlu siyasəti əyani şəkildə hiss edəcəklər.

Paylaş:

Baxılıb: 482 dəfə